IPISAMEI 3
3
Lui kakimei jangpii Polnii tha katii
1Ai kaang jangpiinii, gonyii luikakimei hang jangpii Krista Jisumah kabang kito kaleimei hangninii tiisii kalei, Pol, Inii, Saraa dakii riitale, 2madousupii gonyiinii shiitakle, katunii Saraanii mpoumah jumage kapyii kito gonyii jangpii kabi tha tiilosii aimah tha ai gudakii pyiibam takle. 3Saraanii mpoumah tiitang karam karaang kamaning kamakum tei mati mangoule satei- chii gudakii mati pyiile. Ai kaang kito Inii dwisii ryiibamle. 4Sateichii Inii ryiikabam tei gonyiinii fiileponii, Kristamah kamakummah kaang kito gumah kati tei gonyiinii tiwobuile. 5Karei tinglang kinii aimah kama- kum ai meinah dakii tam makle, nlenii aitoinii teitei Saraanii rangii teipii mpoumah tiilamlwi kapyii kamateimei ninado doisam katam meihang dakii mati mangoupyii takle. 6Kamakum teinii kabi rasam paikito luikakimei hangteinii Sara- amah satoi doutang karam kito Jehudimeigo kaswisii njai bamle, ahnyii ai pumpot hangniniimah nsang nsangle ninado Saraanii pyiitanglesii mpounah Krista Jisu paikito riishii tiikabam mah njai poi njoi katumeile.
7Tha tiisii kalei mpoumah teimaham paikito gudakii pyiikabam Saraamah jumage kapyiimah luha kapyii taiswisii n-gu kabi rasam mah nga kangamei hangninii tiimatupyii takle. 8Saraago kamalum meihang kak kito ka-nkhii khiisang tei I-le, teitii kido fiipei kalak Kristamah kani kahiimah kaang kito luikakimei dakii kabi rasam ai tam ralipyii matu tang karam tinglang kabi ai Saraanii n-gu pyiile. 9Sateichii mahlyii hang go tii mpat kapyii Saraa dato tat tukalei tinglang kareiki Saraamah tiitang lesii raang kabam kamakum kabai kabam tei kadapeipo katu meihang go ngoumatu tang karam jangpii, 10katunii, charsh paikito sating gam mah pum katiimei sateichii sating gam sazyii kito kalei teimaham hangnii Saraamah swirek kabi tei jai katham katham tiisii aitoi timatu tang karam jangpiile. 11Saraanii saroisekto raang kabam teiswisii mpounii tiile, ai ai pat matutang karam jangpii mpounii Krista Jisu nyii Bangpiigo poisii tha tiitakle. 12Mpougo nyiinii kamalum paikito ninado nyiinii Kristago hangninii tiisii nja kalu kito, maning kamalum hangteipii lungnyii lunghou katu gasii lungdisii Saraa doi liit tang karam tei nyiinii doule. 13Teipiinii Inii gonyii jangpii kamage kalak pungsii kalei jangpii gonyii lung tailam nlaitu sulosii Inii gonyiigo khang leile; Ai hang ai gonyiimah kabi jangpiile.
Kristamah lungkasyii
14Ai kaang jangpii sating gamto ninado sazyii pouryiito kalei kikalung mpung hangnii mpou dato zei tak kabam, 15pfii doi teito Inii kok kumsii khangleile, 16katunii, alungto kalei mei dakii mpou rangii- mah paikito gonyiigo teimaham pyiisii tiisangtingpyii matu tang karam jangpii, 17sateichii kamalum paikito Kristanii gonyiigo lung kito liitbam pyii matu tang karam jangpii; mpou pumtei kavamah kani taiswisii mpounii gonyii dakii pyii matutang karam jangpii; gonyiinii lungkasyii kikii maakhiisii sang- tingsii leisanii, 18teimah det kamaja, ta kathang, sagoi ninado kathok tei kadapeipo katu tei gonyiinii kama- teimei hang go kaswisii titang kabui, 19sateichii meinah swipii tipei kalak Kristamah lungkasyii tei tikabui jangpii, katunii Saraamah katokryii hang teipii gonyiinii tokryii matu tang karam jangpii, Inii khangleile.
20Aitoinii nyii lung kito tha tiisii kalei mpoumah teimaham teipiinii nyiinii kakhang mak-kii kamaning hang sungdo kisii moisii tikabui mpougo, 21Charsh kito ninado Jisu Krista zei kito meilui meiha hangnii kalui gasii pumtei kava tei matulo, Amen.
Currently Selected:
IPISAMEI 3: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
