KOLOSIMEI 1
1
Salam kapyii sam
1Saraanii kamaning kamarei kito Krista Jisumah tiilamlwi kapyiimei hangninii tiisii kalei, Pol ninado nyii sanapii Timothi dato. 2Kolosi kito kalei Krista zeikito kamalum meihang ninado malum kabui kangsanamei dakii: Nyii pfii, Saraanii kamajung ninado jumage kapyii tei gonyiigo pyii matulo.
Hakalang katam mah kariita
3Gonyii jangpii nyiinii kariita tinglang kak, Nyii Bangpii Jisu Kristamah pfii Saraago nyiinii tinglang kaleita halangle, 4daponii Krista Jisu dakii gonyiinii kamalum sateichii kamatei meihang dakii gonyiinii lungkasyii tei nyiinii shiitakle. 5Kasang samtam katunii, kabi rasam teinii gonyiida gong kareiki, teiteinii pyiisii kalei maning kamalum mah kaang tei shiitakle, teipiinii gonyiimah kamalum ninado lungkasyii teinii gonyii jangpii sating gamkii kaidek kabam gonyiinii maning malumsii kalei taiswi takle. 6Saraamah jumage kapyiimah kaang kito gonyiinii karei reisang ki shiiwosii teigotei tigong kalu sekpii gonyii kak kito pat kalei takumpii, kabi rasam teinii satoi tei taksupii punghumsii sazyii pouryii bamlyii kikii jai nhasii bamle. 7Saraamah jumage kapyii tei nyiitung tiisii Kris- tamah tha tiisii kalei malum kabui, nyiigo masamsii kikalei lungkasyii Ipapros dato gonyiinii shiitakle. 8Rangiinii gonyiigo pyiikabam lung- kasyii tei mpounii nyii dakii tam mangou takle.
9Kaang aijangpii nyiinii gonyii kaang kito shii kalu piinei sekpii, gonyiinii rangiimah swirek kabi ninado swikati hang kito mpoumah kamaning kamarei tei swirek kati teipiinii tokryiipyii matutang karam jangpii nyiinii gonyii jangpii Saraa dato kariita tei takmakle. 10Saraago kati kito kibui buisii sateichii kabi tha katiilyii kito ti matisii mpou doito matwi mashangsii djyii karanga tiisii, Abangpiinii kamarei tiilung tei lung matutang karam jangpii. 11Ka-nta tei njasii lunglum kati sateichii lungleh kati hang kito, mpoumah pumtei kavamah teima- ham taiswisii pumtei hang teipiinii gonyiigo tiisangting pyiisii, 12kama- teimei hangnii kava kito doukamajyii mahtou kiteito njai dou njoi matu- tang karam jangpii nyiigo tiimajyii kapyii tiikapyii pfii dakii hakalang tamlo. 13Kamyii teinii apum tiisii kalei kiteito mpounii nyiigo poi mpat- pyiisii mpounii hangkapii lungkasyii mpounah sapfii mpoumah sagong sazyii kikii pang gongkaipyii takle. 14Nyiigo kaleikapyii katunii, nyii kem maga kapyii tei ai nah sapfii mpouda aito leile.
Krista tapo sateichii mpoumah tha tei dapeipo
15Krista ainii meinah mikpii ngoukasu Saraa njoi karei mikpii kangou teile. Mpou ainii baichem lyiihang phyiiryii kasat, manaa karei nah sapfii mpou teile. 16Kadaponii sating gamto sateichii mikpii ngou- kasu rangiimah teimaham, mak-kii Abang katiimei, mak-kii apum katiimei, mak-kii teimaham kajum meihang kado mahlyiihang ai mpou paito mpoujangpii tiibam takle. 17Kristanii mahlyiihang doireisii leile, sateichii mpou dato mahlyii- hang jum njabamle. 18Sateichii mpounii pum mah, katunii charshmah phyii kasat teile, mpounii mahlyii- hang kito abam karei tei doumatu tang karam jangpii mpounii kahao, ninado kataimeihang kak kito ring- khii karei manaa karei Nah sapfii mpou teile. 19Kadapokii mpou dato Saraamah katokryii hangtei leitang karam, 20sateichii mpoumah krosh mah zai teipii tiimajung pyiisii, sazyii pouryiito kado, sating gamto kado, kalei mahlyiihang tei mpou dato, mpou paito pang gong njaloi matutang karam jangpii Saraanii sat totakle.
21Gonyiiniikashyii katii ninado kamaning jangpii tinglang hang- niniiki gonyiinii Saraa dato dhiisii mpoumah ngou karoumei tiisii leile. 22Nlenii aitoinii, gonyiigo mateisii sateichii sajek gasii, mpou doi poigong tang karam jangpii mpounah sapfii mpounii pum zai kito taikapyii teipii Saraanii gonyiigo mpoumah kangmei tiipyii takle. 23Nlenii gonyiinii kabi rasam shiikalu ting- lang kak doukalu gonyiimah maning kamalum kiteito nlai matusupii kasangting soikalak bangmaa kiteito malum kabui tei tiijousii leitang karamle. Pol, Inii nga ngakalei ai aimah kabi rasam katunii, sazyii pouryiito kaleihang go tam ralipyii kabam kitole.
Charsh ki nga kangamei hangninii tiisii Polnii tha katii
24Aitoinii gonyii jangpii Inii kamage kalak leh kalei kaang kito Inii ntale, kadapokii gupum guzai kito Inii kamage kalak leh kalei aipiinii Kristamah pum, katunii charsh tung tiisii Kristamah kamage kalak tangkasu hangtei tiimashang matu tang karam jangpii Inii tiiha leile. 25Sateichii gonyii kabi jangpii tha tiilosii gudakii ai tha kapyii Saraanii n-gu charsh mah nga kangamei hangninii tiipyii takle. Tha teinii mpoumah kabi rasam tei mashangsii tam katat, 26katunii, tinglang sateichii meilui meiha kadaziikii jangpii kabai kabam kamakum, nlenii aitoinii mpoumah kamateimei hangdakii mati mangou pyii kalei teile. 27Saraanii kamaning teinii mpounii meihang jangpii kabam kani kahii ninado pumtei kavamah kamakum tei mpoumah meihang go timatu tang karam jangpiile. Sateichii kamakum teinii gonyii lung kito Krista leile. Katunii, Saraamah pumtei kava tei gonyii njai dou njoi tangle. 28Teipii nyiinii meihang dakii Krista tam ralipyiile, Kristago hangninii tiisii nja kalu kito, mei hang go nyiinii tiimatui mashang kalu mei nsang nsang tiisii Saraa doi poigong tang karam jangpii, swirek kabi hangteipii ahnyiigo tiiloi sulosii nyiinii kakhatle sateichii ralipyiile. 29Ai tiitang karam jangpii gulung kito tha tiisii kalei ninado Kristanii pyiisii kalei teimaham kadi tei jumsii Inii mahungsii tha tiileile.
Currently Selected:
KOLOSIMEI 1: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
