1 PITAR 3
3
Kristenmei nou ninado naa
1Tei takumpii gonyii noumei, gonyii naamei kang nkanglo, katunii, kadapokii ahnyii kak kito mei kata hangninanii Saraa samtam tei malum suleponii, 2gonyiimah adzyii ka-nrou ninado matei kabi jairali tei ahnyiinii ngou wosii, sam kaangkiido tamsupii ahnyiimah noumei hangmah jairali teipii ah- nyiigo douwo tang karam jangpii- niile. 3Gonyiimah ngoukabi tei aphyiitaam kakhi, sona kakai ninado peimani ngoukabi, sabaju ngoukabi tei matu sulo. 4Nlenii gonyiimah ngou kabi tei gonyii lungto kalei mikpii ngou kasu kasangmei, kamanoi ninado kamajung mah gasang gakalak ngoukabi jairali tei haitang karamle, hangkapii maikateeng tiisii Saraanii kapoi tei ai kakum ngoukabi aile. 5Kadapokii tinglang kareiki Saraago kamalum sapwimei teinii ahnyii naamei kang nkangsii kalung teipii ahnyii roinapii ahnyiigo ngoukabi tei tiileile; 6tei takumle Sarah tei, Abrahamnii katam tei mpoupeinii swile sateichii mpougo mpoupeimah apumpii sii latle. Gonyiinii kabi tei tiileponii sateichii samah kagodo hing suleponii gonyii ai aitoinii mpoupeimah nahmeihang takle.
7Tei takumpii gonyii naamei, gonyii noumei ai kisii kasui pumle katu tei tiigatpii tikasei tei njasii gonyii noumeigo kaswisii lung tang karamle. Ahnyiigo sadzyii ngariit tii- sii jupyiilo, dapokii gonyiigo kaswisii, ahnyiiniido Saraanii matapii kapyii kalui kaga karing tiilung tei doutangle. Gonyiimah kariita hang kito mah kado doidang matulak tang karam jangpii ai ai tiilo.
Kasang kabi katii jangpii kamage kalak kadou
8Kalui kito, kamaning lungswi hangninii, ti njoi katu, lung kamanoi, lungkasyii, sateichii detdi kasu lung- swi tei gonyii hang leilo. 9Kashyii jangpii kashyii teipii kaleipyii sulo, mak-kii tam kamashyii jangpii nlai- loisii tam mashyii sulo, nlenii tei tungpii satoi pyiilo; kadapokii gonyiinii satoi doumatu tang karam jangpii, aijangpii gonyiigo latto takle. 10Kabi rasam kito tam kalei takumpii:
“Tiilung go lungkasyii ninado kabi tinglang leimik ngoukanyiimei hangteinii,
kashyii kahong tamsii kalei ninado kachuisam tamsii kalei kito ahnii ntak tang karamle.
11Kashyii kahong kito ahnii tat nrek wosii,
kabi tei tiitang karamle;
mpounii kamajung tei fiisii,
teitei kabasii fiimatulo.
12Kadapokii Bangpiimah mik hoi teinii Kasang kamajyii tha katiimei phyiiryiito leile,
sateichii mpou koi tei ahnyiimah kariita kitei leile.
Nlenii kashyii kahong tha katiimeigo mpounii mazhii makle.”
13Sateichii gonyiinii kasang kabi tei tiinyiisii leitak leponii tanii gonyiigo tam mashyii tangpo? 14Nlenii gonyiinii kasang kamajyii jangpii kamage kalak doutuchiido, gonyii sadoi bile! Ahnyiigo hing sulo, lungdo mage sulo. 15Nlenii gonyii lung kito Krista ai Bangpiilesii sadzyii ngariit tiilo. Gonyii lung kito kalei maning kamalum mah kaang tei gonyii dato n-nhii katumei hang go kekhalatpyii tang karam jangpii tinglang kaleita tiikadasii leilo, nlenii lung kamanoi ninado sadzyii ngariit katii tei njasii tiilo. 16Krista dato gonyiimah jairali kabi gotei tam kamashyii meinii gonyii phyiiryiikii tam mashyiisii katam kiteito ahnyiinii nrouwo kabui tiisii, gonyii lungswi tei mateisii mbamlo. 17Ka- dapokii ai ai Saraamah kamaning kamazhii tei tangle leponii, gonyiinii kashyii kahong katii jangpii kamage kalak kadou sungnii kabi katii jangpii kamage kalak kadou teinii bile. 18Kadapokii Saraa dakii pang gong pyii tang karam jangpii, kakui kama meihang jangpii kasang kamajyii katunii, Kristaniido kem jangpii binii taipyii takle hang jangpii; mpougo pumpot lamto tai malei takle, nlenii rangii lamto ringkhii matu takle; 19sateichii mpoumah rangii lamto ringkaleiki kabang kito kalei rangii hangda mpounii maasii tam ralipyiile. 20Ai hang ai Nohanii malyii likalei kak Saraanii katam swikasu rangii hang teile. Malyiilung mei chengniikii kalei kagapii siisat tei dwi kito keipyiile. 21Dwi ainii teimah ajai nda tei tiisii, katunii, dwi ka-mpum teipiinii, aitoi gonyiigo keipyiile, pumpotmah kahong kara poitoi tang karam jangpii makle, nlenii Jisu Kristamah ringkakhii paikito lung mateisii Saraa dakii riishii katii teile. 22Mpounii sating gam khiisii Saraamah bah ajiilamto bam takle. Sating gamlui hangdo, sating gam mah teimaham kajum hangdo, sateichii pumtei kalei hangdo, mpoukang nkang matu takle.
Currently Selected:
1 PITAR 3: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
