1 KORENMEI 16
16
Kamalum mei jangpii sanah tiikaha
1Aitoinii Judiya kito kalei kamalum mei jangpii njai pyii njoi matu tang karam mah kaang kito Inii Galatimei hang dakii tam kabam takumpii, gonyiiniido teita- kumpii tiipyiilo. 2Inii kagong tinglang kak sanah poi ndwi katu tei gatang karam jangpii, gonyiinii mpou mpoumah doukalu njai taiswisii hapta hapta kito leimik karei piinei tei meihangnii sanah chengniikii poitaamsii mpou mpou bah kikii kai ndwi matulo. 3Sateichii Inii gong- sekchii, gonyiinii kamazhiimei gotei Inii jukamati sambang mah chiti tei pyiisanii ahnyiigo langsii gonyiinii kapyii sanah tei Jerosalem ki poimaa matu tangle. 4Sateichii I-do kamaa tei kabi lei lepochiinii ahnyiinii n-gu kaswisii tat tobuile.
Polnii reipii kamaning
5Inii Mesidoniya sumto tat majupatsanii gonyiida gong tangle; Kadapokii Inii Mesidoniya sum tat majupat tangle. 6Inii gonyiigo ka- swisii tinglang shangniikii mak-kii satai tinglang hangtei kaswisii bamdo malahle; tei taito gumah mbui ai tatjou kabui tiisii, Inii adoi tat tang karam bam hang kito gonyiinii n-gu tiiha wobuile. 7Kadapokii gonyiigo Inii aitoi pwidi lamsangto kadou katu tei mareimakle; kadapokii Bang- piinii mazhiipyii leponii, Inii go- nyiigo kaswisii tinglang kathangkii bamnyiile.
8Pentikos piinei leimik katang tei Inii aiki Iphisas ki bam tangle. 9Kadaponii ngou karoumei hangkii leisii leikado, sangtingsii tha tiimatu tang karam takam kadi tei n-gu laatpyiibam takle.
10Timothinii gong leponii, gonyii- nii tiigatpii lukaipyii tang karam jangpii gonyiinii juseilo; kadapokii Inii tiikalei takumpii mpouniido Bangpii tha tiileile. 11Teijangpiinii mei kaniido mpougo maning malah tei tiimatu sulo. Nlenii mpounii guda gong tang karam jangpii, majungsii mpougo pwidikii kapouseilo; kadaponii Inii mpougo kangsanameigo kaswisii nlaigong tang karam jangpii koisii bamle.
12Aitoinii kangsanapii Apolos mah kaang kito, Inii mpougo kang- sanameigo kaswisii gonyiida gong matu tang karam jangpii teisii tam katwi bamle; nlenii aitoi toi gongtang karam tei mpounii maningsang maning makle, nlenii tinglang kabi tei dousekchii mpounii gong tangle.
Kalui mah samtam
13Gonyii sakai wolo, kamalum kito sangtingsii satlo, pfiimeinii tiikamajyii tha tei tiilo, rai gasulo. 14Gonyiinii katii hangtei lungkasyii kito tiilo.
15Kangsanamei, gonyiinii Stifa- nas ninado mpouki kalungmeimah kaang kito tile; katunii Akaiya kito Kristen tiipat karei tei ahnyiile, sateichii ahnyiinii ahnyii roinapii Saraa tha tiisii kaleimei nga ngatang karam jangpii pyiile. 16Ai kakum ai, sateichii ai kakum tha tiisii kaleimei, ninado ahnyiigo tiiha punghasii kaleimei kang tei gonyiiniido nkang seilosii Inii gonyii dato khang leile.
17Sateichii Stifanas, Forchunatas ninado Akaikas, ahnyiinii gong kapyii jangpii Inii nta rangale; kadapokii gonyiinii gong kasu jangpii tang kasu hangtei ahnyiinii tiitokryii pyiitakle. 18Kadapokii ahnyiinii n-gudo gonyii godo tii ntapyii takle, teijangpii gonyiinii tei kakum mei gotei jutiseilo.
19Asia kito kalei charsh hangnii gonyiigo salam pyii leile. Akuila nei Prescillanii ahnyii kilungto gong kadou kadou kalei Charsh meigo njasii Bangpii zei kito ka-nta mah salam tei gonyiigo pyii leile. 20Aikito kalei kangsanamei hangnii gonyiigo salam tei pyii leile. Kamatei kamatwum teipii njasii hangninanii hangniniigo salam tiilo.
21Pol, Inii salam ai gubah sekpiinii ryii leile.
22Bangpiigo lungsyii kasumei hang teinii sheeng kapyii tei doumatulo!
23Bangpii Jisu mah jumage kapyii tei gonyiigo kaswipyii matulo.
24Gumah lungkasyii tei Krista Jisu zei kito gonyii hang go kaswipyii matulo.
Currently Selected:
1 KORENMEI 16: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
