ZAKARIA 7
7
Bunghei dân dik loi Rengpa’n a dem
1Khan Daria an lal kum minlina, a tha kuakna (Kisleu tha) a sûn minlinaa khan Rengpa’n ki kuang thu a zuang hrila.
2Kha zoro lai khan Bethel mihaiin Sarezera hai, Regenmeleka hai, an mihai leh Rengpa satvurna zong hrangin le, 3Sipaihai Rengpa, ochai kuanga le deipuhai kuang khan, “Kha dôr ten kum sûnga kin lei itho ngai ang khan, tempil siatna sika tha ringanaa bu kin inghei ngai hi kin la itho mai hrang ma ni?” tiin an irdonhaia.
4Khan hi hi Rengpa rengata ki kuanga thu zuang tung chu a ni. 5“Hi rama mipuihai le ochaihai kuang hin hiang hin hril ro, kum sômsari sûng tha ringana le tha sarina bu an inghei hi keima ta hranga an inghei ni mah. 6An fâkin an nêk khomin, kha kha chu an ta hranga an ifâk le an inêk kêng a ini” ti hi. 7Khan, hi hi matona Jerusalem chu tuanintung taka a oma, mipui tamtak a sip laia le, a khopuihai ti bana, sim tiang le nitâk tiang tâng kôlhaia an om laia deipuhai kuanga Rengpa’n a lei ihril kha a ni.
Thuzômloina sika sal intângna
8Khan Rengpa’n hi thu hi Zakaria kuang a hrila: 9“Matona ki mihai chu hiang hin thu ki pêkhaia: roirêlna dik chu inlangtir unglân, khonzâna le inrenna khom inlangtir sa roi. 10Nin ram sûnga ram dang mihai, meithâihai, farahai le inrianginvâihai chu nuam le ningin lohai no unglân, khabana mâni urênghai chunga tukhomin sinsiat ngaitua no ri sehai,” tiin.
11Khannisian mihaiin chu an tukullian insua’n, irngai nuam loiin an oma; an milunghai khâr khapin, 12lung angin an inngartira. Matona deipuhai hmanga ki thuhrilhai kha an irngai no sikin, a sân an chunga ki ning an mur tâka. 13Thu ki hril lai khan an irngai no sikin, kei khoma an thuhril chu irngai pehai ma ung. 14Kêllaiher#7.14: Kêllaiher ti omzia chu phâivua irvêl zela irvêl ti ang hi a ni. angin, ram danga om hrangin ki phît infâihai zit tâka. Hi ram satak hi masanin khoram inchangtirin, mi inkhat lua a sûnga om loiin an siam tâk a ni.
Currently Selected:
ZAKARIA 7: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
