ROM 9
9
Pathian nam inthang Israel
1Kristaa khan thu dik tak ki insîr a ni; milak ma ung: Irtha Irthiang zâra ki sia le sa inhriatna khomin an hriat infel a ni. 2Ki lungrîl intak lam irkhêlzia le ki chardongna a iboi thei loizia hi! 3Ki urênghai, taksa tianga ki chipuihai irthûla hin khosâl tongin Krista kuang ata indang ni inlân, ki ti rak ngai a ni. 4Israel mi an nia, nâi nina hai, roiinpuina hai, thuthung hai, dân hai, sin thôna sin hai, Pathian thu’nkung hai an changa;#Fes 9.4 5irchibulhai kha an puhai an nia, taksa tianga suiin chu Krista ngei khom kha an irchi a ni; itinrêng chunga om Pathian chu kumtuanga inpâkin om ri se! Amen.
6Pathian thu chu mâkana a ni ta tihna chu ni viat mah; Israel irchi murdi Israel mi ni zit mahai. 7Abrahama irchi murdi khom a nâihai ni zit ual mahai. “Isaka hin nir chihai sui ni a ti,” Pathianin a iti ual kha.#Irp 21.12 8Khanchu taksa tianga a nâihai chu Pathian nâihai ni ual hliak mahai, Pathian thu’nkung sika a nâihai chu Abrahama irchi dik taka bê an ni. 9“Atûn zoro anga hin zuang a ta, Sari’n chu nâipasal nei a ti,” tia inkung a ni kha.#Irp 18.10 10Kha vai kha ni maka, Rebeki khan nâipasal inkhat, ei irchibul Isaka ata inphîr a vonga, 11nâite suak mân a sia mo a sa mo an ti thei mân khan Pathianin a nuamlam angin inkhat kha a inthang a nih ti an lang: 12sintho sika ni loiin, a koitu nuamlamin Rebeki kuang, “A ulian ualin a nâipang ual sintho a ti,” Pathianin a ti kha.#Irp 25.23 13Pathian Thu bu’n,
“Jakoba lung ki thunga,
Esaua chu ki khôkmâk,”
ti irziak a ni sa.#Mal 1.2-3
14Khaang kha a niin chu imo ei insîr hrang tâk? Pathiana felloina a iom ma ni? Om mak e! 15Ama khan, “Lung ki inkham murdi chu lung ki inkham ni a ta, za ki irngaiina murdi chunga za irngai ki ti,” tia Mosia kuanga a insîr kha.#Fes 33.19 16Khasikin, mihriam nuam lama mâni sinthoa ni loiin, Pathian lungkhamnaa a irnghat ual a ni. 17Pathian Lekha Thu’n Faroa kuang, “Hi mi sika ringot hin nang kin dingtir nôk a ni, nangmaa ki sinthotheina nang kin entir theina hrang le rammual pumpuia ki’rhming an thang theina hrangin,” a tia.#Fes 9.16 18Khanchu Pathian khan a inuam murdi lung an kham ngaia, a inuam murdi khom an tukulliantir ngai a ni.
Pathian ningmurna le lungkhamna
19Khaang khan a ni’n teh ithoa mo Pathianin mi a la idem hrang? A inuamlam kha tu mo khâl theia? nin iti a ni thei.
20Khannisian, o mihriam, Pathian sêltu kha tu mo ni ini? Thil siam khan a siamtu kuang? “I hrang mo hiang hin ni ni isiam?” a iti hrang ma ni?#Isa 29.16; 45.9 21Bêlpil tang khat ata bêl inkhat hlu ual takin le bêl inkhat hlu loi taka hrangin bêl suktu’n chu pilbêl chunga khan ircham a inei mo ni ma? 22Khaang khan Pathianin a tho ngai, a ninginmurna le a sinthotheina inlang nuam khomsian, a ninginmurna dongtu bêl irhmang zôi zâthai chu a tuang zâm zâma, 23Khan, a lunginkhamna bêl, a roiinpuina dong hranga a isinsiam, einihai kuanga hin, a roiinpuina irkhêl tak a zuang inlangtir tâk a ni. 24Judahai lai ata vai ni loiin Jentailhai lai ata a ikoi suakhai hi, khaang bêlhai kha ei ni. 25Hosea lekhabua hiang hin a insîr kha,
“Ki mi ni ngai loihai kha ‘Ki mihai’ ti ki ta,
Lung ki ithung loinu kha ‘Lungthungnu’ ti ki ti.#Hos 2.23
26‘Ki mihai ni mak chêi,’
an itihna hmuna ngei khan Pathian ihring nâihai ibe’n om an ti,”
tia irziak ang khan. #Hos 1.10
27Isaia khom khan Israel mihai thu khêkpuiin, “Israel mihai chu tuikhanglian chiai dôrin tam khomhai sianlân, a ihrem ban tômte vai saninhring ni an ti.#Isa 10.22-23 28Rengpa khan irnêng chunga a roirêlna hrang kha a hlen lat hrang a ni,” a ti kha.
29Isaia dênin,
“Rengpa Itinrêngthothei khan irchi ni lei hôi pe no sian chu,
Sodom angin ni ta a ta,
Gomora ang dênin ni ta ei ti,”
tia a lei insîr ang khan. #Isa 1.9
Israelhai le Thurchi Sa
30Imo ei insîr hrang tâk? Jentail thiam chang tum ual loihai chu thiam inchangtir an hong ni ta, iamna sika thiam changna kha. 31Dân zôma thiamchang tum Israelhai khan kêng dân angin chu thiam chang zoi ta mahai. 32Itho sikin mo? Iamna’n zong loiin sinthoa hmu an tum sika a ni. Tûkna lunga khan an itûk tâk a ni.
33Pathian Thu Bu khan,
“Irngai ta, Zion-a khan tûkna lung le khâlna lungpui ki siaa,
Tukhom ama iam murdi’n chu mualinphoi no ni,”
ti irziak ang khan.#Isa 28.16
Currently Selected:
ROM 9: HRACLBSI
Highlight
Share
Compare
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
