THUVÂRHAI 1
1
Thuvârhai hlutna
1 #
1 Rng 4.32
Israel rêng, Davida nâipa Solomona thuvârhai chu. 2Vârna le irchûtirna sa, inhriat theina hranghai le thu omzia inthûk taka inhriat theina hrang chu a ni. 3Vâr taka omlam le felna hai, dikna hai le theibîk nei loinahai nang irchutir an ti. 4Inmôlhai vâr takin a siam theia; ruathartehai inhriatna irzat nei lam ar chutirhai ngai. 5Hi thuvârhai hin mi vârhai inhriatna ar bôktir theia; mi thiamhai lampui a’rhmutir thei ngai. 6Khanchu, thuvârhai omzia irthup hrilfia theina hrang le mi vârhai thubuai phorsuaka inhriat thiamna hranghai chu an ni.
Ruathartehai kuanga chongbe
7 #
Job 28.28; Ipn 111.10; Thuv 9.10 Rengpa chi chu inhriatna bul a ni. Khannisianlân, invêthaiin chu vârna le irchûtirna an hmusit ngai.
8Ki nâipa, ni pa irchûtirna hi irngaiin lân, ni nu irchûtirna hi irheisan no roh. 9An irchûtirna khan ni lua hrangin lukhum roiinpui tak le ringa irthei enhoi tak angin ni nunchan inlang a ti.
10Ki nâipa, mi sualhaiin nang an inthêmin zôm no ro. 11“Tho ba, mi that hrang lei zong rei! A bi om loiin mi poi tholoihai len ruang hi rei! 12Ei irtong tiang a hringin irtongpui khom inlân, ei irsen tiang chu a thiin lei mahai rei! 13Thil hlu tinrêng nei ei ta, râllâk sumin ei in lei insip rei! 14Tho, kin laia kopin lân, ei iman murdi lei irkop rei” an tia.
15Ki nâipa, khaanga mihai laia kop no’n lân, anni ata irkêm ro. 16Anni chu thilsual tho hrangin an irhnota, thisen insua hrangin an irsiam chak a ni. 17Vahai mithmua châng kam ite ar fêna om mah; 18Khannisianlân, khaanga mihai khan anni ngei in ôkna hrang châng an kama, an thina hrang ngei châng an ikam a ni. 19Itiklai khomin inru thilin an rûktu hringna a lâk ngaia, khasikin, tukhom thisen insua mihai murdi fena lampui chu khaang kha a ni.
Vârna ikoihai
20Irngai ta! vârna chu khopui mikotsua haia khan inring takin a khêka.#Thuv 8.1-3 21Inring takin khopui mikotbâi irsenna hmuna#1.21: Hi hi Hebraiin fel loi a ni. a ikhêk a ni.
22“Inmôlhaio! I dôr ten mo nin inmôlna nin ikan hrang? I dôr ten mo inhriatna hmusitna hin nin râi nin infân hrang? Ni irchû viat loi hrang mo? 23Nangni ki hrilna tiang hin nin mikuar sung roi; thu sa nangni irchûtir ki ta, kin hriatna nangni lei sem hi rong. 24Nangni ki koi maia, hong hrangin nangni ki ifial a ni, khannisianlân, ite bê’n bê mak chêia, keima tiang khom nin mikuar sung nuam mak chêi. 25Nangni ki’rchûtirna uksak nuam mak chêia, nangni ki hrilna murdi khom pom nuam mak chêi. 26Khasikin, intak nin tong tikin nangni phengsan ki ti. 27Nin chunga irlo inthingna phâivua angin a hong tunga, lungzîngna phâivuapui angin a hong hrânga, dengthei le irthanvâia nin om tikin. 28Kha tenin chu ni koi nin ta, khannisianlân, nangni sâm thei no ning. Kil tina ni zong vêl nin ta, khannisian ni hmu ta no chin ni. 29Inhriatna hmang nuam viat mak chêia, Rengpa thu khom zôm nuam viat mak chêi. 30Nangni ki irchûtirna hi dong nuam mak chêia, ki ihrilhai murdi nin ngainêpa. 31Khasikin nin irhoi lam ang takin hmu nin ta, nin sinthohai ngei khan nangni zêm a ti. 32Mi’nmôlhai chu vârna an hmusit sikin an thi ngaia. Intohai khom an lungchukna kha an irhmangna a ni ngai. 33Ki thu irngaihai rêk chu hoi takin om an ta, chitna zel om loiin, hoi riamin om ta an ti,” tiin.
Currently Selected:
THUVÂRHAI 1: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
