OBADIA 1
1
Rengpa’n Edom hrem a ti
1Obadia inlârna kha Rengpa Pathian khan
Edom chungchânga hiang hin a ti.
Rengpa kuanga irthokin thu kin inhriata,
namhai laia khan palai tîr a ni:
“Thoi unglân! irdoinaa Edom doi hrangin irthok ei ti,” tiin.
2Irngai ta, namhai laia khan nang kin chîntir tâk a ni;
mi tinin a saterengin nang hmusit ta an ti.
3O nang, lung kul sûng kâra oma,
hmun irsâng luatu,
‘Tu’n mo hnuaia ni sukthâk hrang?’ ti lungrîltu,
ni lungrîl lârirpâkna hin nang a ihuang tâk a ni.
4Irmu angin irsâng taka vuang khomin lân,
nir bu kha ârsi laia zep ni khom sianlân,
khatak ata nang kai thapai ki ti, Rengpa’n a ti.
5Ni kuanga inrûhai,
mi phil hmanghai zâna honghai sianlân,
(irhmangtir ni ini hrang kêng!)
an indit dôrin an inrûk loi hrang ma ni?
Ni kuanga Grep irhmaltuhai honghai sianlân,
Grep irhmal hrang senkhat an imâksan loi hrang ma ni?
6Esaua thilhai zong suak a ini tâk kêng!
A’rchon kok thuphai kêlsuak a ni ta!
7Nangma tianga kophai murdi’n ramri dênin nang an hong intunga;
mi irngei taka ni iompuihai khan nang an hmanga,
nang an inhnê tâk a ni!
ni bai fâktuhai khan ni hnuaia châng an kama;
amaa khan inhriat thiamna zel a iom loi a ni.
8Kha nikhuaa khan Edom ata mi vârhai inboipai ki ti,
Esaua tâng ata inhriat thiamna ki inboipai loi
hrang ma ni? Rengpa’n a ti.
9O Temana, Esaua tânga irthoka mi tin irhmangtira an om zitna hrangin,
ni mi hrâthai kha a saterengin chi an ti.
Edom hrem nasan
10“Ni urêngpa#10 Ni urêngpa: Israel mihai hi Jakoba irchi ata a nia, a upa Esaua hi Edom-hai irchibul a ni Jakoba irchihai ni thata,
ni rok sikin, kumkhua’n mualinphoi le irhmangtirin om ni ti.
11Kiangtiang ni ngîr nia,
mikhualhaiin a sum an lâkpai nia,
nam dang mihai an kul mikota an lûta,
Jerusalem chunga tâ an sân lai khan,
nang khom anni laia kop angin ni om kha.
12Aniachu ni urêngpa siatna a tong nî khan thîr no’n lân,
Juda nâihai chunga an irhmang ni khan râiinfân no’n lân;
intak an tong ni’n lârirpâk takin chong ual no roh.
13Ki mihai an vânduai nî khan an kul mikota lût no’n lân;
an vânduai niin an tuangnahai kha thîr no’n lân,
an vânduai ni’n an sum le puanhai chunga ni kutin inban ual no ro.
14 #
Isa 34.5-17; 63.1-6; Jer 49.7-22; Ezek 25.12-14; 35.1-15; Amos 1.11-12; Mal 1.2-5 A mi senkhat irtan suakhai that hrangin lam suama lei ngîr no’n lân;
intak nia a mi la omsunhai kha incheltirhai no roh.
Pathianin nam tinhai chunga roirêl a ti
15“Nam murdi chunga Rengpa nikhua kha anai tâka:
ni lei itho tâk ang dênin ni chunga itho nih a ta;
ni itho lam ang ngeiin ni chunga a hong irlet hrang a ni.
16Ki tâng irthianga siatna khilât,
ki mihai iin tâk ang khan, nam murdihai khan an in mai hen hrang a nia,
in paiin irlem zit an ta, irzir loi ang dênin om an ti.
17Zion tânga rêk chu,
irtansuakhai kha om an ta, irthiang a ti.
Khan, Jakoba insûng mihai khan an irchon donghai kha chang an ti.
18Jakoba insûng mihai kha mei ang ni an ta,
Josefa insûng mihai chu meiri-al ni an ta,
Esaua insûng mihai kha fapôl ni an ta,
anni laia chok suak an ta, kâng irhmanghai zit an ti.
Esaua insûng mihai kha damsuak zel om no nihai;
Rengpa khan a ti tâka.
19Sim tianga mihai khan Esaua tâng kha dong an ta;
phâiram tianga mihai khan Filistia ram kha dong an ta:
Efraima loi le Samari loi kha dong an ti.
Benjamina-hai khan Gilead ram kha dong an ti.
20Kanaan mihai laia hi Israela irchi sal intâng mipuihai hin Zarefat ram dênin dong an ta;
Sefarada#20: Sefarada hi Sardis khua irhming dang a ni. rama Jerusalem kho mihai sal intâng khan sim tiang khopuihai kha dong an ti.
21Zion tânga khan Esaua tâng rêl pe hranga sansuaktuhai hong kâi an ta;
Khan, ram kha Rengpa ta ni a ti.
Currently Selected:
OBADIA 1: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
