NAMBAR 32
32
Jordan nisua tianga nam omhai
(Dhn 3.12-22)
1Reubena le Gada irchihaiin a sate’n ram an nei intôma; khan Jazer ram le Gilead ram an hmu’n chu, kha hmun kha sa vâina hmun satak a lei nia. 2Khanchu Gada irchihai le Reubena irchihaiin Mosia le ochai Eleazara le panam hruaituhai chu an va chongpuihaia. 3“Atarot, Dibon, Jazer, Nimra, Hesbon, Elealea, Sebam, Nebo le Beon ramhai kha sa vâina hranga satak a lei nia. 4Khan, ni sinthotuhai hin sa kin neia, khasikin irngaihoi takin hi ram hi kin irchon hrangin ni pêkin lân, Jordan râl nin kâitirin, so taka son nin omtir no ro,” an tia.
5Khan Mosia’n an kuang, 6“Nin urênghai irdoina hmuna fe an ta, nangni chu hi hin mo nin lei iom rak hrang? 7Itho sika Rengpa’n a ipêk rama lût loi hrangin Israel irchihai milung nin irzaltir mo? 8#Nam 13.17-33 Kadesbarnea ata ram va enirchik hranga ki ti lai khan hiang dên hin nin puhai khan an tia. 9Eskol irhôr an hong tung khan ram kha an hong hmua, Rengpa’n ram a ipêka khan an lût loina hrangin Israel irchihai milung an irzaltir pehaia. 10#Nam 14.26-35 Khasikin kha ni khan, Rengpa chu a ning an mura, khomâkirsâmin. 11‘Aigupta, ram ata hong suak, kum sôminhni chung tianga mihai kai chu Abrahama hai, Isaka hai, Jakoba hai kuanga chonginkung pehai hranga ki inkung ram chu tukhomin hmu no nihai; an ni zui ta tak no sikin. 12Keniz mi Jefunea nâipa Kaleba le Nuna nâipa Josua hai ti bana chu, anni’n chu Rengpa an zui ta tak sikin,’ tiin. 13Khan Israelhai chunga Rengpa chu a ning an mura, Rengpa mithmua sinsiat tho irchi murdihai kha an hek mâka chu ramchâra khan kum sômminli an va tîrhai tâka. 14Khanchu irngai roi, Israelhai chunga Rengpa ninginmurna ichiom tak chu bôk pe sain nangni irchi pualoihai hin nin puhai hmun chu nin luapai tâka. 15Khan nangni Reubena le Gada panamhai hin nin nuam noa ni’n chu, mipuihai hi ramchâra hin masanhai nôk a ta, an siatna mô chu nin chunga irnghat a ti,” a tia.
16Khan anni’n Mosia an va nâia, a kuang, “Hitaka hin kin sahai ta hrangin irkul le kin mihai ta hrangin khua nin chuantirin lân. 17Khannisian keini chu an hmun hrang ei tung mâka chu Israel irchihai maton tiang fe mai hrangin râltukfam irfûk saiin om kin ta, hi rama mihai ata zôk theina hrangin kin nâi le têhai chu kulnei khuahai hin om an ta. 18Israel irchi, mi tinin a hmun lua hrang an lua mâka chu kin in tiang kîr no ni ung. 19Kin ilua hrang chu hi tiang râl Jordan nisua a ni sikin Jordan so tiang râl le a khêl tiang chu luapui no ni ung,” an tia.
20Mosia’n an kuang, “Nin thuhril kha a diktaka nin ihril a ni’n chu, Rengpa makunga irdoia fe hrangin irsiam diam roi. 21Nin râl doi mi murdihai chu Rengpa thupêkna hnuaia omin Jordan irkân an ta, ei râlhai chu anni’n doi mai an ta, Rengpa’n an boipaihai tâka. 22An ram a lâk pehai mâka chu kîr nôk thei ta nin ti, Rengpa chunga le nin irchipui Israelhai chunga nin sintum chu nin izoi hrang a ni tâk sikin. Khanchu Rengpa’n hi Jordan nisua tianga ram hi nin ram a nih ti nangni inhrepui ta a ti. 23Khannisian nin thu inkung kha nin pom maia ni’n chu, irngai roi, nangni ki hril hi, Rengpa chunga nin insual ni a ti. Khasikin nin inchâi viat hrang ni ma, khano’nchu nin sualna sikin hremin om nin ti. 24Khasikin nin omna hrangin khopuihai le nin sahai ta hrangin irkulhai siam roi, khannisian nin iti angin tho ngêt roi,” a tia.
25Khan, Gada le Reubena irchihaiin Mosia kuang, “Ka pu ni thupêk ang lam takin tho kin ti. 26Kin dôngma le kin nâihai le kin sial le belrahai chu Gilead rama khopuihai hin lei om an ta, 27khannisian keini chu kin rêngin Rengpa thupêkna hnuaia irdoia fe hrangin irsiam diamin om kin ta, Jordan râl kâiin ni iti lam ang takin doihai kin ti,” an tia.
28 #
Jos 1.12-15
Khanchu Mosia’n Eleazara, Josua le Israel irchi hruaituhai kuang hi thu hi a hrilhaia, 29“Khan Gada le Reubena panamhaiin Jordan irkânin Rengpa thupêkna hnuaia irdoina siamin anni zâra ram nin lâka ni’n chu, Gilead ram chu an irchon hrangin pehai roi. 30Khannisian Jordan irkân loiin irdoina khan nangni an zui sa no’n chu, Kanaan rama nangni laia om sa an ti,” a tia.
31Khan Gada le Reubena panamhaiin, “Ka pu Rengpa thupêk lam ang takin tho kin ti. 32Ama thupêkna hnuaia kâiin Kanaan rama lût kin ta, khanchu kin ram lua hrang chu Jordan dung râl tiang la ni a ti,” an tia.
33Khanchu Mosia’n Gada le Reubena panamhai le Josefa nâi Manasea nam chimriphai chu Amor rêng Sihona ramhai, Basan rêng Oga ramhai chu a khuaa om murdihai le a vêla ram om murdihai leh khan a pêkhaia. 34Khan Gada panamhaiin Dibon hai, Atarot hai, Aroer hai, 35Atrot-sofan hai, Jazer hai, Jogbeha hai, 36Beth-Nimrah hai, Betharan hai, an indinga, khopui kulneihai, belra irkulhai leh. 37Khan Reubena panamhaiin Hesbon Elealea, Kiriathaim, 38Nebo, Baal-meon (a’rhminghai hi thûl a ni ta) Sibma hai an indinga; an kho siamhai chu irhming dang an phuaa. 39Khan Manasea nâipa Makira irchihai chu Gilead ram chu doiin an lâka. Amor mi, khataka omhai kha an irzûlpaihaia. 40Khasikin Mosia’n Gilead ram chu Makira irchihai a pêka, khataka khan an om tâka. 41Khan Manasea nâipa Jaira irchihaiin kho senkhat doiin an lâka, “Havot-Jair,” tiin an khua irhming an phua tâka. 42Khan Noba’n Kenat a va doia, a kho chîn danghai leh a lâka, ama irhming chôiin, “Noba” tiin a phua tâka.
Currently Selected:
NAMBAR 32: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.