EZRA 8
8
Sal ata hong kîr nôkhai
1Hihai hi rêng Artazerzia inlal laia Babulon ram ata ki kuanga honghai, in sûngkua le an irchihai irhming chu a ni. 2Finehasa irchihai laia Gersoma; Ithamara irchihai laia Daniela; Davida irchihai laia Hatusa; 3Sekania irchihai; Parosa irchihai laia Zakaria; pasal irzakhat sômringahai le. 4Pahat-moaba irchihai laia Zerahia nâi, Eliehoenaia; pasal irzahni le. 5Sekania irchihai laia Jahaziela a nâi, pasal irzathum le. 6Adina irchihai laia Jonathana nâi Ebeda, pasal sômringahai le. 7Elama irchihai laia Athalia nâi Jesaia, pasal sômsarihai le 8Sefatia irchihai laia, Mikaela nâi Zebadia, pasal sômriathai le. 9Joaba irchihai laia Jehiela nâi Obadia, pasal irzahni sômhleiriat hai leh. 10Selomita irchihai laia Jasifia nâi pasal irzakhat sômrukhai le. 11khan Bebaia irchihai laia Bebaia nâi Zekaria, pasal sômhni kiriathai leh. 12Azgad irchihai laia Hakatana nâi Johanana, pasal irzakhat sômkhathai le. 13Adonikama irchihai laia an irhming chu hihai hi an ni; Elifeleta, Jeuela, Semaia, pasal sômrukhai leh. 14Bigvaia irchihai laia Uthaia le Zakura, pasal sômsarihai le
Tempil sintho hrang Levia irchi Ezra’n a buk
15Ahava tuidunga ki buk khômhaia; kha khan sûn thum kin oma; mipuihai le ochaihai ki enhaiin chu, Levi irchihai zel hmuhai ta ma unga. 16Khasikin a hruaitu u ualhai, Eliezera, Ariela, Semaia, Elnathana, Jariba, Elnathana, Nathana, Zekaria, Mesulama hai ki koihaia: mi irchutu Joiariba le Elnathana hai khom. 17Khan Kasifia hmuna hruaitu Idoa kuanga ki tîra; kin Pathian ina sintho hrang hong hruai hranga Kasifia hmuna Idoa le a urênghai Nethinim hai kuanga an hong tîrhai hrang ki hrilhaia. 18Khan Pathian inrenna sikin Issekela; Mahlia irchihai laia; Israel nâipa, ama nâipa Levia; Serebia, a nâihai le a urêng sômhleiriathai le: 19Hasabia, Meraria irchihai laia Jesaia, le a urênghai le an nâihai sômhnihai le; 20Nethinim hai, Davida le an milianhai le Levia irchi a sintho hranga irpêkhai laia mi Nethinim hai irzahni sômhnihai a ni hruai pea: an rênga irhming irziak an ni.
Ezrahai bu ngheia chongchaina
21Khanchu kin Pathian makunga kin irhnuaia; a kuanga keini le kin nâihai leh kin bungrua murdihai kin chôi theina hrangin Ahava tuidunga khan bu nghei hrang thu kin inpuanga. 22“Kin Pathian inditna chu ama zongtuhai murdi chunga an sana hrangin an langtir maia; a sinthotheina le a ningmurna chu ama mâksantuhai chunga an langa,” tia rêng kuanga kin hril tâk sikin, lampuia kin râlhai ata ni san hrangin ni sipai le sakor chung chuang mi rêng kuanga zong chu inzak ki tia. 23Khanchu bu kin ngheia, kin Pathian kuanga zong tatakin; kin izongna chu hlo a nin chuktir pea.
Tempil sinna hranga thilpêk
24Khanchu ochai bîk ualhai laia mi sômhleihni Serebia le Hasabia le an urênghai laia mi sômkhat kin danghaia, 25rêng le a roirêltu, a milianhai, le khataka om Israelhaiin kin Pathian in hranga thilinhlan sumru, rângachak, bungruahai ki buka, kin hlana; 26ki ibuk sûnga an kuta ki inhlan chu sumru, talênt irzaruk sômringa, bungrua talên irzakhat; rângachak talênt irzakhat; 27rângachak berbu sômhni, sumthîr sângkhat chitin; dâr irtêk enhoi tak, rângachak anga hlu bungrua inhni a nia. 28An kuang, “Rengpa hranga irthiangtir nin nia, bêlbûrhai khom nin irthiangtir a ni; sumru le rângachak hai hi Rengpa, nin pi le puhai Pathian hranga, mâni nuam thua irhlan a ni. 29Ochai hruaitu inchang ualhai le Levi irchi le Israel mi in sûngkua ar luahai laia Jerusalema, Rengpa ina tentan an sin mân chu hrung unglân, fe roi,” ki tia. 30Khanchu ochaihai le Levi irchihaiin Jerusalema kin Pathian ina chôi hrangin sumru le rângachak le bêlbûr bukhai chu an lâk tâka.
Jerusalema kîr nôkna
31Khanchu Jerusalema kîr nôk hrangin tha khatna, sûn sômhleihni nia chu, Ahava tuidung ata kin suaka; kin Pathianin a nin rena, râlhai ata le lampuia ni len ruanghai ata a nin zôktira. 32Jerusalem kin tung tâka, sûn thum sôl irngamin kin oma. 33Khan sûn minli nî chu, sumruhai, rângachak hai, bungruahai chu kin Pathian inah bukin ochai Uria nâipa Meremota kuta kin irhlana; a makunga khan Finehasa nâipa Eleazara a oma; an kôla khan Levia irchi Jesua nâipa Jozabada le Binuia nâipa Noadia hai an oma: 34Tep le varh ving a nia; an ivarh zât khom an irziak vinga.
35Sal ata zôkhaiin Israelhai Pathian kuanga hâlirvôm thil an inhlana, Israel mi murdihai hrangin sehrâtchal sômhleihni, kêlbelrachal sômkuak kiruk, Belrate sômsari sari; sual irbôlna kêlchal sômhleihni: hihai murdi hi Rengpa kuanga hâlirvôm thilinhlan ving an ni. 36Khan rêng thu’nkunghai chu rêng ulianhai le varâl tianga ram optuhai an hrilhaia; anni’n mipuihai changpuiin Pathian in sin chu an suiirzompuihai tâka.
Currently Selected:
EZRA 8: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
