FESUAKNA 26
26
Rengpa omna puan in
(Fes 36.8-38)
1“Puan in irthiang, ki omna puan in chu patzâi irhmi thûr sai, samul rông dum, a senduk le a sen inpôl cherub dûr a ze enhoi taka zep, puan hlek sômkhat không sai hmangin sin ro. 2A hlek murdi kha irtiat natin, mûk sômhni le kiriata sei, a khang mûk minlia sei, siam roh. 3A phêk ringahai kha insui irkoptirin lân, a dang ringa khom kha khaang dên khan tho roh. 4Ringa hmor insui irchunna hmor taka khan a mikuar, pat dum inhrual leh ni inkhop chit hrang a ni. 5Mikuar sômringa seng a’rkop inhnia khan inkhophai roh. 6A mikuar le irkoptirna hrang rângachak kuaikim sômringa siamin lân, kha khan puan insuiin irkop inhnihai chu inkhâihaiin lân, khanchu puan in chu puan phêk khata siam chang thei ta a ti.
7“Puan in chung chu kêl mul puan hlek sôm hleikhata không hrang a ni. 8A’rhlek tin kha a irtiat hrang, mûk sômthuma sei le mûk minlia khang lianin siam roh. 9Ringa kha buk khatin insui irkoptir sa roh. A’rhlek kirukna kha puan in maton tiang khan ni ithep hrang a ni. 10A rênga insui irkop maton tak le hnungkhôn tak hmora khan a mikuar irang natin sômringa inkhopin lân, a mikuar sômringa insui irkop dang hmora khan inkhop sa roh. 11Dâr sen kuaikim sômringa siamin lân, in chung inkhata siam hrang puan in inhnihai irzom hrangin, a mikuarhai khan inkhop roh. 12A chimrip la om kha chu puan in hnung tiang khan kâi chian ri se. 13A sîr inhni tiang khan mûk khat a sei la om a ti; a’rkhûna hrangin a sîr tianghai khan nin insei hrang a ni.
14“A chung irthua inrâng inhni, kêlbelra vun, le savun a sazât hmangin siam sa roh.
15“Puan in banga intung hrang sitim thing irfangin lân; 16mûk sôma irsângin a khang lian mûk khat a chimripin siamin lân. 17Chontan tina khan a’rzomna hrangin a’rlût mat theia a ke inhni a iom hrang a ni. Puan in chopui danghai khom, khaang khan thohai ving roh. 18Sim tianga banga khan chopui sômhni siamin lân, 19sumru invit ir-ông sômminli a hnuai tianga omin, chopui hnuaihaia khan a ke inhni irlût theina hrang sumru invit sai inhni a ikop chit hrang a ni. 20Puan in maton tianga khan intung hrang chopui sômhni siamin lân, 21sumrua siam an toina sômminli a chopui irkipa inhni kop saiin siam sa roh. 22Nitâk tianga puan in hnung tianga hrangin chopui kiruk siam sa’n lân, 23a kila om hrangin inhni chu se sa roh. 24A sîr taka chopuihai chu a bula irthokin a sîp dênin ni irkoptir chit hrang a ni, a kila bang hrang chu a kil irzom sai a ini hrang a ni. 25Khaang khan chopui kiriat, sumrua siam an toitirna sômhleirukhai le om a ta, inhni senin om sa a ti.
26“A bang tung indetna hrang chu sitim thing tuan sôm hleiringa siamin lân, a banga khan banglâi ringa in om sa sianlân, 27a hnung tiang ringa, a sîr tianghai khan ringa sengin om sa ri se. 28A laia banglâi khan puan in bang kha a irtongtir hrang a ni. 29Thing chopui intung kha rângachaka tuam hrang a ni, an sui irkoptirna hrang banglâi tung inkhopna hrang rângachak irki neia siam sa hrang a ni, rângachak ngêta siam ni ri se. 30Puan in chu tâng chunga an dûr nang ki irhmu ang zekin siam roh.
31“Chontana zâr hrang patzâi irhmi samul dum a senduk le a sen pôl không sai, a’rvôna cherub dûrhai zepin siam roh. 32Rângachaka tuam sitim chopui minliin siamin lân, a toina hrang sumru tumin siam sa roh. Chopui khan thil inkhâina hrang kuaikim siamin lân, kha khan puan kha zâr roh. 33#Heb 6.19; 9.3-5 Puanzâr tentan sûnga khan Thuthung Bôm a sûnga lungphêk inhni om kha se’n lân, puanzâr chu hmun irthiang tak le Hmun Irthiang kâr indangna ni a ti. 34Thuthung Bôm chu a sîngna leh sîngin lân, hmun irthiang taka khan se roh. 35Hmun Irthiang tak pên tiang dokâng kha, hmâr tiang khan sia’n lân, meiser siana chu sim tiang pang khan om ri se. 36Puan in mikota zâr hrang patzâi irhmi thûr sai samul dum, a senduk le a sen pôl a’rvotirna hrang puan không hrang a ni. 37Kha zârna hranga khan sitim thing chopui ringa rângachaka tuam, a toina dâr sen ir-ông inthûk le an khâina hrang thil incher rângachakin siam roh.
Currently Selected:
FESUAKNA 26: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
