FESUAKNA 18
18
Jethroa’n Mosia a hro
1Jethroa Midian ochai, Mosia tarpu kha Pathianin Mosia le a mihai thil a tho pehai zia murdi le, Rengpa’n Israelhai Aigupta ram ata a hruaisuak ziahai a le’nhriata. 2-3#Fes 2.21-22; Tîr 7.29 Mosia tarpu Jethroa khan Mosia dôngma Zipori, Mosia’n a itîrpai kha, a nâihai inhni a hruaihaia; inkhat irhming chu Gersoma a nia, “Mi rama om ki ni sikin,” a tia. 4Inkhat irhming chu Eliazara a ni, “Ki Pathian chu ni changpuitu a nia, Faroa khandai ata a ni saninzôk tâk sikin,” a tia. 5Jethroa, Mosia tarpu kha Mosia nâipasal hnihai le a dôngma leh khan Mosia kuang ramchâra a riakna Pathian tânga khan an honga. 6Mosia kuang khan, “Keima hi ni tarpu Jethroa, ni dôngma le ni nâipasal hnihai le kin hong,” iti chong a len thuana. 7Khanchu Mosia khom a tarpu lei don hrangin a’rthoka, a makunga a kûna, a poma, damhar thu an irdon irhlôma; khanchu Mosia puan in sûnga an lût tâka. 8Rengpa’n Israelhai sansuak hranga Faroa le Aigupta-hai chunga a sintho murdi le, lam laia intak tuang lamhai le Rengpa’n a saninzôkhai lam murdi chu Mosia’n a tarpu kha a hrila. 9Rengpa’n Israelhai, Aigupta ata a saninzôka, thil a lei itho pehai lam le an chunga satna tamtak sika khan Jethroa chu a lôm sabak tâka. 10Rengpa’n Aigupta-hai irthoka, Faroa irthoka, nangni saninzôktu chu inpâkin om ri se; ama khan Aigupta thuhnuaia om mipuihai chu a saninzôk ta hi, 11atûn ata chu Rengpa chu pathian tinhai nêkin a roiinpui ual ti kin hriat ta, Israelhai hmusitin, khaang dôra dengintheiin, a saninzôk tâk sikin, a tia. 12Khanchu Jethroa khan thil inhlanin, a pum kai hâlirvôm le irbôlna hrang danghai a hong chôia. Arona le Israel hruaituhai murdi kha Mosia tarpu kuanga khan Pathian makunga bai fa hrangin an fe.
Roirêltu hrang irbêna
13Zîng nôka chu Mosia kha mipuihai roirêl hrangin a toia; khante mipuihai khan zîng ata khohloi dênin Mosia kôla an om maia. 14Mosia tarpu khan khaanga mipuihai hranga a sintho kha a hmu’n chu, “Mipuihai hi i ual mo ni itho pehai tâk? Itho sika mo sûn khat vaiin roirêltu’n ni toina zîng ata khohloi dêna mipuihai hi ni kôla an ingîr chian?” a tia.
15Mosia’n, “Mipuihaiin Pathian nuam lam irchu hrangin ki kuang an hong sikin ki itho ngêt a nang a ni, tiin a sâma. 16Thubuai i ma ni, an neiin chu ki kuanga hin an hong ngai, khanchu keima’n an tualbômhai an thubuai kha ki lei rêl pehai ngai, khanchu Pathian inkung le a dânhai chu ki lei inhriat ngai a ni,” a tia. 17Mosia tarpu khan, “Ni thil tho dân hi sa mah. 18Nangma leh hi mipuihai ni kuanga honghai hi sûn khat sûnga tho hrangin chu a intak hrai a ni. 19Atûn hin, ki chong hi irngai ta, thurôn nang pe ki ti; Pathian chu ni kuang om sianlân, Pathian makunga nang chu mipui irthûltu nin lân; nangin Pathian makunga thubuaihai kha intung thiaiin lân: 20khan, dân irziakhai le dânhai chu anni irchutirhai ni ta, an sintho hranghai le, lam an ihrô hrang kha inkhîk irhmuhai ni ta. 21Kha no khomin, mipui laia irthok mi theithiam, Pathian chi mi, mi dikhai, fâkinrûk fel loi khôkmâk mihai inthangsuakin lân, anni chu sâng khat chunga roirêltu, irza chunga roirêltu, sôm ringa chunga roirêltu, sôm ruk chunga roirêltuhai ni hrang se roh. 22khahai khan itiklai khomin mipui roirêl pe ri sehai, thu intak ual kai chu ki kuang hon tunghai sian, thu ol ualhai chu anni’n rêl infel ri sehai. Khaang khan nangma ta hrangin chu nang irzâng pe ok a ti; anni’n nang an isan hrang a ni. 23Khaang khan ni thoa, Pathianin chong nang a pêkin chu tho thei ni ta, khaang khan mipuihai milung inchukin mâni in tiang an ichîn thei hrang a ni,” a tia.
24A tarpu Jethroa thuhril chu Mosia’n a poma, a iti lam angin a thoa. 25Mosia’n Israelhai laia mi kâmom u ual an thanghaia, mipuihai laia hruaitu’n a siamhaia, sâng chunga hruaitu le irza chunga hruaituhai, sômringa chunga hruaitu hai, sômkhat a bêhaia. 26Khahai khan itiklai khomin mihai roi an rêl pehaia, thu intak ual kai chu Mosia kuang an intung ngaia, thu intak ok loi chu an bingin an rêl ngai. 27Khanchu Mosia khan a tarpu kha an fetir tâka. A omna ram tiang a kîr nôk ta.
Currently Selected:
FESUAKNA 18: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
