FESUAKNA 15
15
Mosia hla
1 #
Thup 15.3
Kha irzoiin chu Mosia le Israelhaiin Rengpa inpâkna hrangin hi hla hi an saka,
“Rengpa inpâkna hrangin hi hla hih sak ki ti,
Ama’n roiinpui takin an hnê tâk sikin,
Sakor le a chunga chuanghai kha tuipuia a pai lûthaia.
2 #
Ipn 118.14; Isa 12.2 Rengpa chu ni changpuitu hrât tak a nia,
Ki saninhringna a nia, ki Pathian a ni,
ama inpâk ki ti,
ki Pathian a ni, ama chôiindôm ki ti.
Kin pahai Pathian a nia, a roiinpuizia hril kin ti.
3 Rengpa chu irdoi mi a nia,
a’rhming khom Rengpa a ni.
4Faroa sakor tâli le a sipaihai kha tuipuia a pai lûthai tâka,
A sipai lian a sa murdi Tuipui Sena a pai lût zoi ta.
5Tui inthûk takin a ngîmhai tâka,
an thûkna taka khan lung angin an tâk zoi ta.
6Ni kut chang tiang kha,
O Rengpa sinthotheina roiinpuiin ni kut chang tiang khan,
O Rengpa râlhai irsem darin.
7Ni roiinpuina liantak khan,
nangma nang a doituhai an irhmang zoi ta;
Ni ningmurna ni zuan suma,
fapôl angin an kâng zoi ta.
8Ni hnâra phûkin tui an irhloma,
Tuihai kha bang angin an indingtira;
Tuipui inthûknahai khom a kang zoi ta.
9Râl kha irpâkin, irzûl ki ta,
pha ngêt ki ti, râllâk sum sem ki ta,
annia khan ki’rzukna murdi khopna hmu ki ti.
Ki khandai kêlsua ki ta,
ki kut leh anni thathai ki ti,” tiin.
10Ni phâivua kha nin sêmtira,
tuipui khan a’rkhû zoi ta,
tui inthûk taka khan sisâr tang angin an tâk zoi ta.
11“O Rengpa nangma anga Pathianhai laia tu mo a om?
Tu mo nangma anga irthiangna tianga roiinpui?
Tu mo sinirkhêl le sin roiinpui ni isin anga sin thei?
12Ni kut chang tiang ni phara,
khanchu irnêngin an volhai zoi ta.
13Nangma lungkhamna sika irtan sai tâk,
ni mihai hruai ni ta;
ni hrâtna’n ni omna hmun irthianga hruai intunghai ni ti.
14Nam tinin inhria an ta; ngîkin inthing an ti;
Filistia omhai kha an milung kângpuihai a ti.
15Edom rama hruaituhai chitna’n sip an ta,
Moab mi hrâthai insînain chelhai an ti,
Kanaan rama mihai zâmirzal ving an ti.
16Chitna le ngîkna an chunga chum a ta,
Ni bân irnakhrât khan lung angin omchian an ti;
O Rengpa ni mihai an thang zoi mâka chu.
17Nangma’n hruai intunghai ni ta,
ni tâng sîpa phun ni ti,
O Rengpa nangma omna hranga hmun ni irfûktirna khan,
O Rengpa, hmun irthiang ni kuta ni lei inding ta kha.
18 Rengpa’n kumtuangin roirêl a ti,” tiin.
Miriami hla
19Faroa sakorhai kha sakor tâlihai le a chunga chuang mihai leh khan tuipuia an tâk ving tâka, Rengpa khan tuikhanglian tuihai leh a hong vurhai nôka; Israelhai rêk chu tuipui sûng irnêng châra khan an kâi zoi ta.
20Khanchu deipu Miriami, Arona farnu khan khuangte a kut leh a lâka, nupang murdi’n khuangte chôia lâmpuiin an zuia. 21Miriami’n, anni hrang hla a sak pehaia:
“Rengpa chu inpâkin hla sak roi,
ama khan inhnêna roiinpui takin an hnê tâk sikin;
sakor le a chunga chuang murdi’n tuipuia an pai lût tâka.
Tui khâ
22Kha hnung chu Mosia khan Israelhai kha tuipui sena irthokin a hruaihaia, Sur ramchâr tiang panin an suak tâka; sûn thum sûng ramchâra khan tui hmu viat loiin an inzina. 23Mara an itihna hmun an hong tungin chu tui kha a khâ pehai sikin in thei mahaia; khasikin a’rhming khom Mara ibe a ni. 24Mipuihai khan Mosia kuang khan, “Imo kin i-in hrang tâk?” tiin an chiara. 25Mosia’n Rengpa kha a sâma, Rengpa khan thing inkhat a’rhmua, kha kha tuia khan an dêngzuanin chu, tui kha a hong tui pehai tâka. Kha hmuna khan Rengpa’n an izôm hrang dân a pêkhaia; a fiahai saa. 26“Rengpa ni Pathian hnuk irhâi kha ngûk takin irngaiin lân, a mit hmua a sa a iti murdi ni sina, ni pomin chu Aigupta mihai chunga hri ki inlêngtir ang khan ni chunga inlêngtir no ning. Keima hi Rengpa nang an damtirtu ki ni,” a tia.
27Kha hnung chu Elim an itihna hmun an hong tunga, kha hmun khan tuihnâr sômhleihni le tûm kung sômsari a oma; tui kôla khan riakbuk irpuk an khôr ta.
Currently Selected:
FESUAKNA 15: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
