DANIELA 4
4
Reng Nebukadnezara irmang voihnina
1Rêng Nebukadnezara’n, mi tin, chong tin hmanghai laia, irnêng pumpui chunga omhai laia, irngeina inpungin om ri se. 2Anchungtak Pathianin thil inentirnahai, thil irkhêl a ithohai hi an langtir ki nuam.
3A thil inentirnahai chu a roiinpuiin,
a thil irkhêl tho khom a irkhêl ok a ni.
A ram chu ramhlu a nia,
a roirêlna chu irlo tin tina rêl a ti.
4Khan kei Nebukadnezara hi ki ina hoitak le in hoitak sûnga ki fâkin ki nêka. 5Irmang ki ichitak ki phana; ki zâlhmuna ki ngaituana le ki lua inlârna khan a nin buaia. 6Khasikin Babulon mi vâr murdihai ni hrilfia pe hrangin thu ki pêkhaia. 7Khanchu dôi theihai, tasân theihai, Kaldai mi tasân theihai an honga, ki’rmang chu ki hrilhaia, khannisian a hrilfia thei om mahaia. 8A hnungkhôna chu Daniela, ki Pathian irhming ang irput, ar hming Beltesazzara Pathian irthiang irtha omna chu ki kuang a honga; ki’rmang chu a hrila, 9o, Beltesazzara mitvai dôitheihai hruaitu, nangma hin Pathian irthiang irtha a om ti le thu’rthup murdi’n nan buai ngai mah ti kin hriat sikin: ki’rmanga ki ihmu inlârna le hrilfiana nin hril roh.
10Ki zâlhmuna ki lua inlârna chu hi hi a ni: ki hong tanga, irnêng lai taka hin thing a oma; a’rsâng lam chu hril zoi loi a ni. 11Thing chu a’rsôna, a’rsânglam chu irvân phâk ang dôr a nia, kôlkil ata an lang thei vinga. 12A hnâ en hoiin, a ra khom a tama, thilhring murdihai fâk hrang a oma; ramsahaiin dâihlîmin an hmanga, chunglêng vatehaiin a ôna an riaka, taksa nei murdihai chu ama infâ ang an ni.
13Ki zâlna rengata inlârna khan a hong ena, irngai ro, irvân ata enkoltu, mi irthiang a zuang suaka, 14inring takin, “Thing chu tukin lân, a ônhai irhlei ro, a hna insil haiin lân, a rahai dêng zuan ro: a hnuaia ramsahai khom irzûlhaiin lân; a ônhaia vatehai khom vuanghai sian. 15Khannisianlân rama hloisûlhai laia mông, irnêng thingkung bul chu, thîr le dârsen hruia khitin irnênga khan ma roi. Khanchu, irvân irdo’n buak sian, a dongtum chu irnênga hloisûl le ramsa leh omsuam ni sian. 16A lungrîl chu mihriam lungrîl ang ni loiin danglam ni ri se; ramsa ngaitua ang ni sian, a chunga hunbi sari hek ni ri se. 17Hi thu hlu hi a entuhai thu a nia, thil inphût hi mi irthianghai thua tho a nia, anchungtakpu’n mihriamhai inlalna rama hin thu a neia, a inuam takhai a pêka, mi irhnuai takhai khom an luatirhai ngai a nih ti mihriamin an inhriatna hrangin,” tia khêkin. 18Khan, Nebukadnezara’n, “Hi irmang hi keima rêng Nebukadnezara’n ki iphan a ni,” a tia. “Nang o Beltesazzara, a hrilfiana chu inpuang ro, ki rama mi vâr murdihaiin chu a hrilfiana ni hril thei mahai; nangma’n chu thei ni ti, nangmaa hin chu Pathian irthiang irtha a om sikin,” tiin.
Daniela’n a hrilfia
19Khanchu, Daniela, ar hming Beltesazzara chu chidêk dôkin, ar ngaituana a buaia; Rêngin a kuang, “Beltesazzara, irmang a hrilfiana’n mo nang a inbuai,” tiin a hrila.
Beltesazzara’n, “Ki rêngpa irmang chu a en nuam loituhai hrang ni sian, a hrilfiana khom ni râlhai hrang ni sian. 20Thing ni ihmu irsôn insa, irvân dêna kha, kôlkil ata inlang ving le 21a hnâhai satak le ra tamtak, thilhring murdi fâk hrang om le ramsahai oma, a ôna vatehai riakbuk lei ni ngai chu, 22o inlaltak, nangma ni nia; nir sôna, ni hrâta, ni roiinpuina chu a’rzata, irvân dênin, ni roirêlna chu kôlkil dên a nia. 23Khan irvân ata enkoltu mi irthiang a hong suaka, thing chu phûrin lân, irhmang ri se: khannisian rama hloisûl laia môngin irnêng rîla chu thîr le dâr irzêl chu hôiin lân, irvân irdo’n buak sian, a om hrang dân chu ramsahai angin, a chunga zoro sari a tung khomin a hon lalin a hmua; 24a hrilfiana chu hi hi a ni, o inlaltak, a’rsângtakpu thupêk, an lal tak ki rêngpa chunga hong tung chu a ni: 25Mihriam lai ata inhnotsuak ni ni ta, ni omna hrang chu ramsahai laia ni a ti, sehrât angin hloisûl fa ni ta, irvân irdo’n nang buak a ta, ni chunga zoro sari hek a ti; anchungtakpu’n mihriamhai inlalna ram chunga thu a neia, a inuam tak a pêk ngai a nih ti nin hriat mân chu. 26Khanchu a sûngril hoi hranga thu a ipêk ang khan irvâna thu a nei ti nin hriat hnung le chu ni ram chu ni ta ni mai a ti. 27Khasikin o inlaltak, ki thu nang tihai hi pomin lân, ni sualna chu felna’n thûlin lân, nin châinahai chu, mi inrianghai nin renhaiin chu, ni khonhoinahai hi a la sei khom a ol,” tiin a sâma. 28Hihai murdi hi rêng Nebukadnezara chunga thil hong tung chu a ni. 29Tha sôm tha hni hek tiang chu Babulon rêng in sûnga a lêng vêl laiin, 30rêngin, “Hi Babulon inlalna hi keima hrâtna ngêtin rêng omna hmun hrang le ki roiinpui satna hranga ki isiam mo ni ma?” tiin a hrila. 31Kha thu kha rêng hmûra a suak lai takin, irvân ata irhâi a hong suaka, “O rêng Nebukadnezara ni kuang thu a hong tung: inlalna ram khan nang a mâksan ta. 32Mihriam lai ata inhnotsuak ni ni ta, ni omna hrang chu ramsahai laia nih a ti: sehrât angin hloisûl fa ta ni ta, ni chunga zoro sari hek a ti; anchungtak khan mihriamhai inlalna ram chunga thu a neia, a inuam takhai a pêk ngai a nih ti nin hriat mân chu” tiin.
33Kha zoro lai takin kha thil kha Nebukadnezara chunga a hong tung zela; mihriam lai ata inhnotsuakin a om ta. Sehrât angin hloisûl a fâka, a taksa chu irvân irdo irsilin a oma, a sam khom irmu mul ang le a mitinhai khom va mitin anga omin a iom a ni ta.
Nebukadnezara’n Pathian a inpâk
34Khan zoro hek tiang chu kei Nebukadnezara hin irvân tiang ki tanga, ki hor hriat suaka, anchungtakpu sat ki vura, a hring mai chu kin pâka, kin zaa.
A roirêlna khom kumtuanga roirêl a nia:
a ram khom rammuala irlo tamtaka om a ni sikin.
35Khan irnêng luatu murdihai hi ite bêa bê loi a ni.
Irvân sipai rualhai laia chu ama thutak a nia,
tûte’n ama kut chu irngamtir thei ni ma,
nangin te itin mo ni ti?
ti lua irdon ngam mahai.
36Kha lai taka khan inhriatna ki nei nôka; ki ram sûnga kin lalnahai le ki satnahai chu ki nei nôkin ki’rhriata; khan a nir fûkpuituhai khan an ni hong pana, ki ram indetin a oma, roiinpui tamtak pêk belsa ki nia.
37Khanchu kei Nebukadnezara’n irvân Rêng chu kin pâka, ki ichôiirsângin ki inzâ a ni, a sintho a fel sikin; mualinphoia omhai khom a irhnuaitir thei a ni.
Currently Selected:
DANIELA 4: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
