2 THURCHI SUINA 29
29
Juda rêng Hezekia
(2 Rng 18.1-3)
1Hezekia chu kum sômhni ringa a niin Judai rama rêng a chang irphuta, Jerusalema kum sômhni kuak an lala. A nu chu Zekaria nâinu Abija a ni. 2A pu Davida’n Rengpa nuamlam a itho ngai angin ama khomin a thoa.
Tempil thâr irthiangtirna
3An lal phut kum, tha maton taka, Hezekia chu tempil inkhârhai chu an honghaia, a siathai chu an sintirhaia. 4Tempil nisua tianga tuala khan ochaihai le Levi irchihai a koibukhaia. 5An kuang, “Nangni Levi irchihaio, irthiang infâi unglân, nin pahai Pathian Rengpa in hi irthiang infâitir roi; tempil ata hi thil porinche murdi paisuak ving roi. 6Kin pahai chu Rengpa kin Pathian ata iamom loiin, a inuam loi lamtak an thoa. Tehel an zong pea, a omna in chu mâksanin an hnôla. 7Tempil mikot chu an kala, meiser an thata, mirimhoi hâl mahaia, hmun Irthianga Israelhai Pathian ta hrang hâlirvôm thilinhlan inhlan mahai. 8Hi sika hin Rengpa chu Juda le Jerusalema mihai chunga a ning an mura, mi tinin ar khêl tia danginchek khum rakin an isoisak tâk a ni; khahai kha nangni khomin nin ihmu mai a ni. 9Kin pahai chu khandai leh tukthat an nia, kin nâinuhai le nâipahai, kin dôngmahai leh sala an chelhai a ni. 10Kin chunga a ningmurna hi an tômtir sabeiin Israelhai Pathian Rengpa leh Thuthung siam ki itum tâk a ni. 11Ki nâihaio, omchian ta no roi, Rengpa chu a makunga a ngîra, a sin tho hrangin nangni an thanga, khasikin a sin zong unglân, thilinhlanhai inhlan roi,” a tia.
12Khahai laia khan Levi irchihai hi an oma: Kohata irchihai laia mi, Amasaia nâipa Mahata le Azaria nâipa Joela, Meraria irchihai laia mi: Abdia nâipa Kisa le Jahalelela nâipa Azaria; Gersona irchihai laia mi. Zima nâipa Joa le Joa nâipa Edena. 13Elizafana irchi laia mi: Simria le Jeuela; Asafa irchi laia mi; Zekaria le Matania; 14Hemana irchi laia mi: Jehuela le Simeia; Jeduthuna irchi laia mi: Semaia le Uziela. 15Hi mihai hin an irchipui Levi irchihai an bukkhôma, an irthiangtirhaia; rêng thupêk angin tempil an irthiangtira. Rengpa dân bua hril angin an irthiangtira. 16Rengpa tempil sûnga ochaihai an lûta, thil porche an ihmu murdi chu Rengpa in tuala khan an hong sia suakhaia; Levi irchihai chu Kidron tuia an paia.
17Tha khatna, sûn maton taka tempil irthiangtir an phuta, a sûn riatna nî chu tempil sum omna dênin an infâia. Sûn riat dang, sûn sômhleiruk dênin tempil sûng chu Pathian biakna inruk hrangin an infâi nôka, an irthiangtir tâka.
Tempil inhlan thar nôkna
18Levi irchihai chu rêng Hezekia kuang an fea, “Tempil sûng kin irthial irthiangtir ta. Hâlirvôm thilinhlan hâlna maichâmhai, bai ser siana dokânghai le a hmangrua murdi kin irthiangtir ta. 19Ahaza’n Rengpa kuang ata tho’nchâina sual a tho laia tempil bêlbûr a ilâksuakhai kha kin sia nôk ta, kin irthiangtir zoi tâka, Rengpa maichâm kôla itinrêng hrê infel a ni ta,” an hong tia.
20Reng Hezekia chu Jerusalema hruaitu u ualhai chu a koibukhaia, Rengpa tempila khan an fea. 21sherâtchal sari, kêlbelrachal sari, kêlbelrate sari le sual irbôlna thilinhlan kêlchal sari an hong chôia; ochaihai chu Rengpa maichâma inhlan hrangin a tia. 22Sehrâthai chu an thata, an thisen chu maichâma an intheka, kêlbelrate khom kha an thata, a thisen chu maichâma an intheka. 23Reng le pungkhômhai makunga khan sual irbôlna thilinhlan hrangin kêlchalhai an hong kaia, an lu chunga an kut an irnghata, 24ochaihaiin an thata, an thisen chu sual irbôlna’n an hmanga, Israel mi murdihai sual irbôlna’n an inhlan a ni. Reng thu angin hâlirvôm thilinhlan le sual irbôlna thil inhlan chu Israel mi murdi ta hranga inhlan a ni.
25Reng deipu Gada le deipu Nathana hmanga Davida kuang Rengpa iti angin Levi irchihai chu perkhuang, serânda le têngrep chôiin tempila khan an siaa. 26Davida itum ngai ang tum zât an chôia. Ochaihai khom bekul chôiin an ngîra, 27Reng Hezekia chu hâlirvôm thilinhlan chu inhlan hrangin an hrila; an hor hlanin chu mipuihaiin Rengpa inpâkna hla an saka, bekulhai an tuma, chi danghai khom an tum tâka. 28Khataka om murdihaiin Pathian chubai an mûka, hla an saka, an thilinhlan a kâng zoi mân chu mirimhoi an hâl zui pata. 29Reng Hezekia le mipuihai chu an khûksadela Pathian chubai an mûka. 30Reng le hruaituhaiin Davida le deipu Asafa hla phua, Rengpa inpâkna hla kha, Levi irchihai an insaktirhaia. Khûksadela Pathian chubai mûkin an rêngin râifan takin an om tâka.
31Hezekia’n mipuihai kuang, “Rengpa hrang nin infâi irthiang tâka; thilinhlanhai, lômthu hrilnahai, Rengpa tempila hong la ta roi,” a tia. 32A’rbukkhômhai khan thilinhlanhai, lômthu hrilnahai an hong inhlana, a nuam murdihaiin hâlirvôm thilinhlanhai an inhlana. A’rbukkhômhaiin hâlirvôm thilinhlan hrang an hong ichôihai chu sehrâtchal sômsari le belrate irzahni le belra irzakhat a ni. 33Sehrâtchal irzaruk le belra sângthum khom thilinhlan chi danga an inhlana. 34A that hrang ochai an ruk no sikin an that zoi mân chu Levi irchihaiin an sanhaia. A hnungkhôn tiang chu ochai tam ual khom an thâr irthianghai tâka. Levi irchihai hi ochaihai nêkin an lei irvong irthiang thei ual a ni. 35Mipuihai thilinhlan hâlhai hi ochaihai tho hrang a nia, an sa that mipuihai fâk hranghai khom hi an ihâl hrang a ni; hâlirvôm thilinhlan leh irrualin uain an hong inhlanhai khom hi ochaihaiin an ibun bak hrang a ni. Khanchu tempil sin thôna chu an phut nôk tâka. 36Reng Hezekia le mipuihai chu an râiinfân oka, Pathianin hianga tho thei nôk hranga a tempila hmang thei hrang le hruai theia an om sika hin.
Currently Selected:
2 THURCHI SUINA 29: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
