ROM 12

Krista ha hayu gadain

1Odebani, daphlungrao, Madai ni khasaoma ni khlai hi, bandai gathang odehe Madai jang khaja jaogothai nisi ni saomang khe yaopha mani khlai hi nisi khe ang khainsu du; ebo se nisi ni khusi dangthai gibiyaba de. 2Ebo habsao ni dongthai lai dongya hi, Madai ni nangjaothai hamba ode khaja jao gothaiyaba sothar si hamba khe nisi ragaosisi mithi phu mani khlai hi, nisi jarni khah gadain jahi gibin ja lang lah.

Khasaoma ni yaosandi

3Madai riyaba khasaoma ni khlai hi ang nisi khe thi du: Nisi ni bising ha asababo bedehe bujima nang du botha bara hi da buji thing, Madai ning khrip subung niha lonma riba lai ning, jar jarni khah ha jajao lah. 4Saomang masi ha bedeb gabang jini ha dongyaba, boni khrip bedeb buthu ni khusi dangthai baosi ja tharya; 5Olei jasosi ning, jing gabang bang la khabo, Krista ha jini saomang masi se. 6Khasaoma riyaba khe jing mai lai ba lai ning jinis riyaba gibin gibin khe jing mai kha; jing grao thima ni jakha de, jini lonma jang jing blaiba lai lai thi lai nang. 7Khusi dang mani gede thikhade, khusi dangyaba ha jing khah ri lai nang, slingriyaba gede thikhade, slingriyaba ha ning khah rilai hi; 8sibringyaba bo, khah muh jang sibring la thing; jinis riyaba bo, khaithiya hi ri la thing; hojabo hamsisi langsmai la thing; khasaoyaba de khajama jang khasao la thing.

Hamjaoma

9Hamjaoma de hamya giriklaiyaba laya hi ja thing; hamya khe regejao lah, hamba khe mani lah. 10Daphlungrao, hamjaoma ha de nisi saosi jang saosi hamjao lai hi, bakhan khlai lah. 11Khah muh ri bani balam ha seleya hi, bese ni balam ha de, khah ri hi Gabra ni khusi khe dang lah. 12Asama ha ning bai hi; dukhu habo khah lao hi, asaba bubli habo bi lah. 13Subung gatharrao bao joyaba ha juru lah; naorai ni basao ha hamba phnu lah.

14Nisi khe dukhu riyarao khe, hamthai ri lah; da sari. 15Khajayarao jang khaja pha lah, grayarao jang gra pha lah; 16Saosi jang saosi nisi khah masi jahi phuthan da ja lah; subung khasibarao jang lugu ja lah, jar khe da ju ri lah.

17Asaba ni hamya khebo hamyayaba jang da suphin lah; khrip subung ni baothai majang khe bao lah. 18Blai khade nisi ni gede thikhabo, subung khrip jang mili hi dong lah. 19Hamdao thaoyarao, baslai da lah, Madai ni thamsi ha yaopha lah. Baslai laba de ani phantha se, ang baslai suphin nang, Gabra ning odehe thi du, thihi reb du. 20Bokhe garhibo, Nini sotru hukhri jaokha de, ji mani ri lah; dih gangjao khade, dih ling mani ri lah; olei ning dang kha de, boni bokhro ha ning waithai deng ba lai jama se. 21Hamya jang ning dejao hi da dong, hamma jang hamya khe de lah.

Currently Selected:

ROM 12: DIMASBSI

Highlight

Copy