NUJAOYABA 4
4
Sorgo ha Madai khe khlimyaba
1Boni yaohon ha ang naikhu kha; ode khna lah, sorgo derga khruba khe ang nuha ba. Ode, bibul biringba lai ang jang sainlaiyaba khurang khe ang khna ba, Ejang basao gede phai lah, duha ni yaohon ha japhai ginyaba buthu khe ninthane ang phnu ri nang, ode bo thi ba. 2Ode, boha ning bese ha ang dong kha. Odehe, nai lah, sorgo ni singhason srap sophai hi, oraha subung saosi kham hi dong ba. 3Boni mukhang de jaspar jang kornelian longthai lai se. Ode singhason sere bere ha smaragdin longthai ni rong lai jengglong mander su ba. 4Raja ni khamthan sersi giding hade singhason gibin makhon bri bo dong. Singhason buthu hade khrao khon bri kham du, bonsi rih guphu phin hi gajao ni khrothu buthu khe thu hi bonsi kham du. 5Singhason ni phrang se nokhasao gurjliya ba, jinis ho sar jaya ba, nokhasao grimyaba khurang gurung gurung jahi baigo phai ba; odehe, singhason ni sagang hade waimijing masni hur hur waijing ba, bo buthu de Madai ni bese masni se. 6Odehe, bo singhason ni sagang hade, krustal longthai ha jnahi derphai lai sagor nu ba. Bo singhason gejer ni sersi giding ha, khrip nogrong grongbri ha hang gnang mih mabri, yaohon gede sagang gede muthai jang gablaiyaba dong ba. 7Hang gnang mih masi de misiraigonma lai se, hang gnang mih maginyaba de musu jla lai se, hang gnang mih mathamyaba de subung ni mukhang lai ja du, hang gnang mabriyaba de daoling biryaba lai se. 8Odehe, hang gnang mih mabri de bagrang madoh khrip nihabo dong, bonsi ni baji gede ar bising gedebo muthai jang gablai du;
Gabra Madai, khrip dangphuyaba,
Donglangyaba, dongyaba, ode dong phaiginyaba khe,
Bo gathar se, bo gathar se, bo gathar se, thi dada bo sain-hor lenggoya.
9Odehe, hang gnang mih buthu de singhason ha kham hi, thaoglao thaoglao thang hi dongyaba niha, muima, bakhan, khajama ni grao thiyaba bonsi yaopha kha ning, 10singhason ha khamyaba ni sagang ha bonsi blip pha hi, thaoglao thaoglao ha thang hi dongyaba khe bonsi khlim ba; singhason ni sagang ha bonsi ni Raja ni khrothu buthu khe deng hi bonsi rajab ba:
11Ning jini Gabra jang jini Madai!
Muima, bakhan, raothai, ning mai jayaba se,
Bedethikhala, ning khrip sangsai ba,
Nini grao jang slam bani se dong thar ba, ode thi ba.
Currently Selected:
NUJAOYABA 4: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
