NUJAOYABA 13
13
Mih rege magin
1Sagor ni phrang mih rege baigo buba khe ang nu ba, bogrong grong jhi odehe bokhro khro sni dong; boni bogrong buthu hade raja ni khrothu dong, boni bokhro buthu hade Madai khe sijiyaba ni bumu buthubo dong. 2Ang mih rege nuyaba misisathrai lai se, boni igah buthubo musuburma ni igah lai se; boni bukhuhbo misiraigonma lai se. Dragon de jar ni raothai jang jar ni singhason ni hukhum gedeba khe boniha ri ba. 3Bo mih rege ni bokhro ni khro si thima jasi bumai nang hi dukhu jaba lai nujao ba, thikhabo, thima jasi sayaba hamphin lang la kha. Habsao ni subung khripbo hamsi ning gmang hi, boni yaohon rikpha ba. 4Mih rege niha hukhum ri kha bani subung buthu Dragon khe khlim ba. Subung buthu thi ba, Mih rege lai sere dong, sere bo jang nanglai phu ma? Mih rege khebo bonsi khlim ba.
5Mih rege niha sanggayaba odehe Madai khe sijiyaba grao buthu thiphuyaba bukhuh ri ba; odehe badain jang bisagin dain gin sosi raothai ni hukhum ri ba. 6Odebani, Madai khe siji mani khlai hi bo bukhuh khru hi, Madai ni bumu khe odehe dongyaba hathan odehe sorgo ha dongyarao khe bo siji kha. 7Subung gatharrao jang nanglai hi de mani raothaibo bonthane ri ba, khrip greng, khrip subung, khrip jadi grao, odehe khrip jadi ni basao ha grao ni hukhum khebo bo ri ba. 8Odebani, phirthi ha dongyarao khrip habsao sangsai jenba ni phrang sthai jaoyaba Melmasa ni hayu laisi bajap ha bumu gakhuyayarao khrip mih rege khe, Madai khe khlimba lai bonsi khlim ba.
9Sere niha khmao dong, khna la thing! 10Sere leng ne langjao khade, bo leng jahi thang nang; asababo seng jang subung sthai khade, bode seng jang ning sthai jaoma se. Ebo ha subung gatharrao khah lao hi lonma gnang jang dong ma nangthai khe phnu du.
11Odehe mih rege, hah bakhla ni phrang baigo phai ba khe ang nu ba; Melmasa lai bogrong grong gin dong, Dragon lai grao jo ba. 12Mih rege sagang ni khrip hukhum khe boni sagang ha yaowai hi phirthi jang boni basao ha dongyarao khrip khe thima jasiyaba bumai ham phinyaba mih rege sagang ni khe bonsi khlim ri ba. 13Bo mih rege ning gmang thaosisi khusi gedeba buthu khe dang hi, khrip subung ni muh ha sorgo ni phrang phirthi ha wai galai ri re. 14Sagang ni mih rege ni baslai ha gmang thaosi khusi raothai rijao hi dongyaba buthu khe dang hi, phirthi ha dongyarao khrip khebo thokhi hi, seng ha bumai nang hi, ham phinyaba mih rege khe bakhan khlai mani khlai hi boni saokhuli khe bonsi slam lai ba. 15Odehe, mih rege ni saokhuli grao jophu mane odehe mih rege ni saokhuli khe bima nangjaoyayaba si khe sthai phu mani khlai hi, mih rege ni saokhuli niha hang ri mani raothaibo ri ba. 16Bo mih rege se khrip subung gede khasi, gnang, dukhisa, leng jang leng niyayaba bo bonsi ni yaoda gede ha ja thing, bonsi ni bathain ha bol jang sin nising ri hi, 17mih rege ni bumu ja thing, boni bumu ni lombor ja thing, sin riyaba giri khade saosibo jinis barai hi phain phuya. 18Eraha jing girikma nang du. Sere bujima dong mih rege ni lombor khe khru thing, bode subung ni lombor se. Bo lombor de rjado bisatham madoh se.
Currently Selected:
NUJAOYABA 13: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
