LUKE 24
24
Jisu baijaphin ba
(Mt. 28.1-10; Mk. 16.1-8; Jn. 20.1-10)
1Sainsni ni basain sagangthao ni phorongma ha, masainjikrao thao midim bonsi salaiyaba khe langhi mangkhlong ha thang ba. 2Mangkhlong daoglap ni phrang longthai disaijao hi dongba khe bonsi nuhi ba, 3ode bonsi bising ha hap ba, thikhabo bonsi Gabra Jisu ni manggathi khe nuya. 4Bonsi nuya bani waimu nanghi dongba ha, subung gini, rih guphu phin hi, bonsini rogong ha songpha phai ba. 5Hamsi ning khin hi, masainjikrao hah ha gonggalai ba ha, subung buthu bonsi khe thi ba, “Nisi sumjabani githirao ni bising ha gathang khe smai ba? 6Eraha bo de giri kha, bo baijaphin kha. Galili raji ha bo dongba ha nisi niha thiyaba khe wainso lah. 7Marsini Basa de subung phaphirao ni yao ha yaopha jao ma, kross ha dikthai ma, ar saintham ha baijaphin ma, bo thiyaba khe wainso lah.”
8Bo thiyaba grao buthu khe masainjikrao wainso phin kha, 9mangkhlong ni phrang thangphin hi, bonsi khrip grao khe jhiseh ar gibinrao niha khna ri ba. 10Bo masainjikrao de Mari Magdalin, Joana ar Mari, Jakob ni buma, bonsi ar gibin masainjikrao se. 11Thikhabo, rikphayarao la masainjikrao thiyaba grao khe grao haglai thihi bao ba, odebani bonsini grao khe bonsi lonya. 12Thikhabo, Peter baija dada, mangkhlong gede khailang ba; bo gonggalai hi naiba ha, bo rih miyao dudu phinyaba khe garhi de musi khebo nuya, ar bo noh ha thangphin hi, sumjadi japhai ba, bo gmang ba.
Emau gede nolei ha thangyarao
(Mk. 16.12,13)
13Okhali ni basain ha boni rikphayarao ni bising ha subung gini, Emau nolei gede thang ba. Jerusalem ni phrang mel sni lai jain du. 14Bo bubli ha japhaiyaba grao khe sainlai ba. 15Bonsi hemlang hi grao sainlai saiba ha, Jisu jar ning bonsi niha sophai hi bonsi jang thangpha ba, 16bonsi bo khe nu ba, thikhabo bo sere thihi bonsi mithiya. 17Jisu bonsi khe thi ba, Nisi sumjadi grao khe sainlai ba?
Waimu phnu hi bonsi songthao ba. 18Bumu Kleopa thiyaba bokhe sing ba, Jerusalem ha donghi, dini dakhna ni grao baigoyaba jathai khe ning sao jang se ning mithiya hi dong ba?
19Sumjadi grao? bo singalai ba.
Bonsi thi ba, Nazareth Jisu ni grao. Madai ar khrip subung ni muh ha boni grao jang raothai ni khusi dang phuyaba gorasali ni grao, 20bokhe jarni Jonthairao, ar hojarao thih mane bokhe yaopha ba, ar bokhe kross ha dikthai bani grao buthu khe. 21Jing la, Israel sarao khe sogo mane se jing asa khlai ba; bo se ning niya, okhali ni phrang dini jang saintham ja kha. 22Jini bising ha masainjikrao gejesi jing khe gmang rila ba, phorongma ha bonsi mangkhlong ha thang ba, 23thikhabo, bonsi Jisu ni manggathi khe nuya bani, bonsi phaiphin hi, jing sorgo ni degla khe nu ba, bonsi jini ha thi ba, bo de thangphin kha thihi bonsi thiphai ba. 24Ode jini bising ha, gejesi mangkhlong ha thang ba, ar masainjikrao thiba lai ning bonsi nuhi ba, thikhabo bokhe de nuya.
25Odehe, Jisu bonsi khe thi ba, Nisi subung gibirrao! Gorasalirao grao sainthiyaba khrip khe mani bani balam ha khah raoyarao! 26Krista, boni muima ha hap mane ebo dukhu buthu khe mai ma nang ma niya? 27Ode, Moses ni laisi buthu ni phrang jenhi khrip gorasalirao rebyaba grao buthu khe Jisu bonsine bujai ba.
28Thangma baoyaba nolei ha bonsi sophaima ja ba ha, Jisu bokhe lailang maisi ba, 29thikhabo, bonsi bokhe mathao ba, Jing jang dongpha lah, duha sari bo ja kha ar andar bo ja ma kha. 30Bonsi jang jimane khalai khamba ha, hon khe lahahi bo hamthai ri ba, sbai hi bo bonsine ron ri ba. 31Olei baha, bonsini muthai khru lang kha, ar bonsi bokhe basao mithi kha, thikhabo boha ning bo gma langla kha. 32Bonsi thilai ba, Lama ha bo jini ha grao johi Madaini laisini grao khe bo bujaiba jang jini khah bising ha sring jaba niya?
33Ode, bonsi srap ning baija hi, Jerusalem gede thangphin ba. Oraha rikphayarao jhiseh jang ar bo jang dongphayarao bojom jalaiba khe bonsi nuhi ba, 34ar bonsi thi ba, Gibi jang Gabra baijaphin kha, Simon nihabo bo nujao ba.
35Bonsi gini bo, lama ha japhaiyaba ar bedehe Gabra hon sbaiba jang bonsi bokhe basao mithiba khe bonsi niha sainthi ba.
Rikphayarao niha Jisu nujao ba
(Mt. 28.16-20; Mk. 16.14-18; Jn. 20.19-23; Dang. 1.6-8)
36Bo grao sainthi saibaha, Jisu jar ning bonsini sagangha songphai hi bonsi khe thi ba, Nisini basao ha shanti dong thing.
37Bonsi hamsi ning khin ba; bonsi bese khe nu kha thihi bao ba. 38Odebani, Jisu bonsi khe thiba, Sumjabani nisi khin ba? Sumjabani nisini khah ha lonsoya ba? 39Ani yao ar igah buthu khe nai lah. Nisi ang jar se thihi nu nang; ar ang khe yao dopha hi nai lah, ang khe nisi nuba lai bese de bahain begreng giri.
40Ebo khe thihi bo bonsi niha boni yao ar igah khe phnu ba. 41Ode, bonsi khaja bang bani bonsi lonsingya ja ba, ode bonsi gmang bani bising ha, bonsi niha thi ba, “Eraha asaba jimani dong?” 42Bonsi nah saoyaba khe bone ri ba, 43bonsini sagang ha bo bokhe ji ba.
44Ar bonsi khe thi ba, Nisi jang ang dongpha ba ha, nisi niha sainthiyaba ebo buthu ning. Moses ni Dara ha gorasalirao ni laisi bajap ha ar Bakhan ni Rajabthai ni laisi ha rebyaba ani grao khrip bo gibi sophaima nang ma.
45Ode, Madai ni laisini grao khe mithiso phu mane, bo bonsi ni khah khe khru ri kha. 46Ar bonsi khe thi ba, Edehe ning reb da, Krista sao ha dukhu mai hi, nokha saintham ha baija phin ma, 47ar Jerusalem ni phrang jenhi, khah phin bani grao, ar phap khe map khlai bani grao khe khrip jadi niha sainthi ma nang ma. 48Khrip ebo ni grao ha sakhi riyarao nisi ning. 49Ar sumjadi ani bupha hanggai ba bokhe ang jar nisine ri nang. Thikhabo, nisini basao ha basao ni phrang raothai phaiya si de nisi Jerusalem ha jonhi dong lah.
Sorgo ha sugu lang ba
(Mk. 16.19-20; Dang. 1.9-11)
50Ar bo bonsi khe nogor ni phrang Bethani nolei sosi langpha ba. Oraha bo yao sugu dada bonsi khe hamthai ri ba. 51Bo bonsi khe hamthai ribani yaohon ha, bonsi khe gar dada sorgo ha sugu langjao kha. 52Bonsi bokhe khlim hi, Jerusalem ha thangphin kha. 53Ar khajasisi Madai khe bakhan khlai hi Madaikhoh ha nalai dongsong ba.
Currently Selected:
LUKE 24: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.