JUDA 1
1
Khlimyaba
1Jisu Krista ni leng ode Jakob ni daphlung Juda de-
Longjao hi dongyaba, Bupha Madai ni hamjao daothaoyaba ode Jisu Krista khe naiso hi dengyarao niha:
2Khasaoma, shanti, hamjaoma nisi ni basao ha gabang lupha jao hi dong thing.
Slingriyaba gajai ni balam
3Hamjao daothaoyaba lugurao! Sogoma jing maiyaba ni balam khe, nisi niha reb hama gabang mijing la khabo, Madai boni subung gatharrao niha lonma ni grao alang si ha bo bojom khlai hi rao riyaba khe, dimkhao mani khah muh ri hi dang mani nisi sibring hi nisi niha laisi reb ma nang du thihi ang tharmai du. 4Nisi ni bising ha subung gejesi, phirik phirik hapsing phai hi dong, bo buthu de Madai khe maniyayaba subung buthu se; Madai ni khasaoma ni grao khe bonsi ni mijingma ha majang sisi thi mani khlai hi bonsi yaowai hi, jini hoja ode jini Gabra saosi mang mangyaba Jisu Krista khe mani ma bo bonsi nangjaoya, oleiyaba subung buthu khe gajai ne bonsi saikho kha.
5Nisi ebo buthu khe jamthar si tharmai blai khabo, ang nisi khe tharmai ri phin ma nang du. Gabra ning Egypt raji ni phrang Israel subung buthu khe sogo ba; thikhabo, bonsi ni bising ha lonyayarao khe sjam phin mani balam ha, 6sorgo ni deglaraobo, jar ni lama khe hamsisi naisoya hi, bonsi ni dongthan khe dangkhlaiyarao khe, bisar ni basain gedeba ha bao mani khlai hi, thaoglao ni sikol ha kha dada andar ni bakhla ha bonsi khe phraojeb kha. 7Olei jasosi ning, Sodom jang Gomorra ode boni sere bere haphai ni nogor buthu khebo, mijingma regeyaba ha bonsi khah ri bani khlai hi gibin subung buthu khe joda mani thaoglao ni wai ni saja ha bonsi rijao ma se.
8Olei jasosi ning, bonsi jar ni nangjaoma ha dongba ha, bonsi tharmai bani, bo buthu de jar ni saomang khe rege ri hi, hukhum gnang khe bonsi man khlaiya hi, sorgo subung ni muima buthu khe bonsi siji re. 9Sorgo ni degla dedao thaoyaba, Mikael ning Moses ni manggathi khe Diabol jang selai khali ha bokhe bo siji raoya, Gabra ning ningkhe jo la thing bo ning odese thi ba. 10Thikhabo, ebo subung buthu de bonsi bujiyayaba si khe bonsi siji re; bede thikhade, bonsi baoma giriyaba mih buthu lai hajai phayaba gyan ha thangyarao se bani bonsi jar khe jar hamya khlai la re. 11Bonsi ni bubain risi bi dou! Kaina ni lama ha se bonsi hem ba; rang khe riksai hi, Balaam gajai khlaiyaba ha bonsi khaising du, Kora lai grao laya hi bonsi jam kha. 12Bo buthu de nisi hamjaoma-mayama jang mel phaidyaba buthu mel majang riyayaba se, laji garhi nisi ni bising ha phai hi, nisi ni mel ha bonsi jiphai re, bonsi de bo melma bubra khe se ning hoh gablai riyarao lai se. Bonsi de dih giriyaba, jimi, bar jang sip khao jaoyarao, bongphang bathai thaiya hi phin gin thiyaba, ode yaderma phijaoyaba se. 13Bonsi de sagor ni dithon buthu, jar ni laji ha bukhuhdi baigoyarao se; sathrai daoding baiyarao, bonsi jug jug dong mani andar gisimyaba ha salai jaoyarao se.
14Ebo buthu ni grao khe Adam ni phrang jug sni, Enok ning edehe thida kha, Nai lah, Gabra de jar ni subung gathar rjing jhi jang baosi bo phai du; 15Madai khe khiyal khlaiyayarao khrip bo Madai khe khinya hi, Madai khe khinyayaba ni balam jang khrip khusi dangyaba ode, Madai khe badai hi hamsi ning grao sahi thiyarao ni balam ha bisar khlai mani bo phaisai du thi ba.
16Bo subung buthu de berba raoyaba ode subung jang niyalaiba raoyaba, phap khe se ning riksai hi, jar khe sugu hi hamba thi layaba, lab nangjaoyaba subung khe bonsi hamsi ning sugu re.
Ranyaba buthu ar sibringyaba buthu
17Thikhabo, ani lugurao, nisi de jini Gabra Jisu Krista ni yaohon rikphayarao sainthi dayaba khe wainso song lah. 18Bonsi ning nisi niha, Bubli jamthaoba buthu hade, minithaiyarao, Madai khe khiyal khlaiyayaba, jar libiba lai yaowaiyarao baigo phai ma se, thi hi bonsi nisi khe sainthi kha. 19Bo subung buthu de degaoyaba khe khaikhoyaba, saomang ni subung, Bese maiyayaba se. 20Thikhabo, lugurao, nisi ni lonma gathar ha ning milima khe judao ripha lang lah, ode Bese gathar jang bi lah. 21Madai ni hamjaoma ha ning nisi hamsisi naiso lahi thaoglao ni hayu ha so riyaba jini Gabra Jisu Krista ni khasaoma khe jon hi ning dong lah.
22Gejesi lon soya hi dongyarao khe khasao lah. 23Gejesi khe wai ni phrang khaikho hi sogo lah; thikhabo gejesi khede khin dada khasao lah, bonsi ni saomang rege regeyaba Kaina ni gainsari sosibo rege jao lah.
Hamthai ni bima
24Duha, nisi galaiya mani khlai hi, nisi khe naiso phuyaba ode boni muima ni sagang ha gajai giri hi ode hamsi ning nisi khe song riphuyaba, 25bo Madai masi mang mangyaba, bo jingkhe sogoyahba niha ning, muima buthu Raja jayaba buthu, raothai buthu, hukhum buthu, jini Gabra Jisu Krista ni dara jang sagang gede bubli dongyaba ode duha jang thaoglao sosi dongpha lang thing. Amen.
Currently Selected:
JUDA 1: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
