JOHN 2
2
Kana nolei ha disingba ni mel
1Nokha sain gini jaba ha Galili ni Kana nolei ha dising jaoyaba dong ba. Jisu ni buma oraha dong ba. 2Jisu ode boni rikphayarao khebo disingyaba ha rik ba. 3Grep ni ju jamthar ba ha, Jisu ni buma bokhe thi ba, Bonsi niha grep ni ju giri kha.
4Jisu bokhe thiphin ba, Haingajik, snadi jabani ning ebo khe ani ha sainthi ma nang ba? Duha ani bubli sophaiya kho.
5Boni buma, dangyarao niha thi ba, Snadi khe bo dang mane sani ba, bokhe dang lah.
6Oraha, longthai ni dihdig madoh dong ba. Ebo dihdig khe Judarao gathar jamani khlai hi dugru khlai bani khusi ha yaowai re. Masi dihdig ha bisasi ni phrang gelen thimjhi dih jao re. 7Jisu dangyarao niha thi ba, Dihdig ha dih gablai si lusing lah. Odebani, bonsi dihdig ha gablai si lusing ba, 8odehe bonsi khe thi ba, Duha khaohon lah, ode salai hoja niha bokhe lang lah. Odebani, bonsi bokhe lang ba. 9Mel ni salai hoja bo dih khe janai nai ba ha, grep ni judih ja ba. Bo grep ni ju braha ni phrang phai ba bo baophrang phuya ba. Thikhabo, sere dih khaohonyarao ebo khe tharmai du. Ode mel salai hoja daman khe long ba, 10Ode thi ba, Khrip bo sagang thaoha ju dih buphang khe ning ronda ba se. Ode naorairao jiha phaire lingha phaire thikhase yaohonha saidaoyaba judih ri re. Thikhabo, ning duha sosi judih buphang khe mathao hi dengdu kho.
11Jisu boni gmang thaosisiyaba ebo khusi khe Galili ni Kana noleiha dangjen ba. Bo jarni muima khe phnu ri ba. Odese boni rikphayarao bokhe lon ba.
12Eboni yaohon ha Jisu, boni buma ode boni daphlungrao ode boni rikphayarao jang Kapernaum ha thang ba. Oraha basain dong thaolang ba.
Jisu bikhoh ha thang ba
(Mt. 21.12,13; Mk. 11.15-17; Lk. 19.45,46)
13Jekhali Judarao ni Baiglai ni Busu sophaima jabli ha, Jisu Jerusalem ha thang ba. 14Oraha ni bikhoh ni bising ha subung buthu musu melma ode daophri phainjiyarao ode gibin ha rang slaiyarao khe basang ha kham hi dongba khe Jisu nu ba. 15Odebani Jisu wadu khe sap hi masi goda slam hi khrip daophri, musu, melma buthu khe bikhoh ni phrang rikhon thar ba. Ode bo rang slaiyarao ni rangkhrai khe bo lukhlai thar ba, ode bonsi ni basang khe bo nephai thar ba. 16Jisu daophri phainyarao khe thi ba, Ebo buthu khe eraha ni phrang baji ha langthar lah. Ani Abai ni noh khe nisi masi hathai da slam lah. 17Boni rikphayarao wainso phin ba, Nini noh ni khlai hi ani khah jang sao jang ang khe jima ja kha thiyaba sastro ha rebyaba dong thi hi.
18Yaohon ha Judarao Jisu khe sing ba, Ebo khusi khe dangphu mane hok dong thihi jinthane sumjadi sin khe ning dang phnu ri ma?
19Jisu bonsi niha thiphin ba, Ebo bikhoh khe dophai thar khlah, ode nokha saintham ni bising ha ang songkhu phin nang.
20Odehe, Judarao thiphin ba, Ebo bikhoh khe dangba ha maithai jang bisagin maithai doh nang kha, ode ning bokhe nokha saintham ni bising ha songkhuphin ma?
21Thikhabo, Jisu bikhoh ni balam ha thiyaba grao de boni jarni saomang khe se thila ba. 22Jisu snadi khe thi ri ba thihi githi ni phrang baija phinba ni yaohon ha boni rikphayarao wainso phin ba. Yaohon ha sastro ode Jisu thilangyaba grao khe bonsi lon ba.
Jisu subung ni baothai buji ba
23Baiglai ni Busu ni basain ha Jisu Jerusalem ha dong ba, bo gmang thaosisiyaba sin ni khusi khe dangba ha, gabang subung nu ba, ode bokhe lon ba. 24Thikhabo, Jisu jarkhe bonsi ni basao ha khah deya. Bede thikhala bo khrip khe tharmai thar du. 25Subung buthu ni balam ha boniha sainthi daoma nangya, bede thikhala subung ni khasu ha dongyaba khe bo tharmai thar du.
Currently Selected:
JOHN 2: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.