GALATIA 6
6
Bubain ni balam ha sibringyaba
1Daphlungrao, hamya subung asaba bo hamya khusi dangba ha remjao kha de, nisi Bese ni subung buthu, naigrik ha ang galai phu re thihi hamsisi jar khe naiso la hi, oleiyaba subung khe grao gasain dik dik jang nisi naiso lah. 2Nisi ni bubain risi buthu saosi jang saosi khe horju lai lah. Odese, Krista ni dara khe maniyaba nisi ja ma. 3Subung musibo niya hi, jar khe subung gedeba baola khade, bo jar khe thokhi laba se. 4Khrip subungbo, jarni khusi khe ning naislam laila thing, boni yaohon ha se, malai ni balam ha niya hi jarni balam ha ning bo sanggama mai ma se. 5Bede thikhala, khrip subung jarni bubain khe hor ma nang du.
6Grao slingriyaba khe maiya kha de, khrip hamba jinis khe slingriyaba niha ri la thing.
7Jar khe da thokhijao lah, Madai khe naislema niya, khripbo jar gaiba lai ning raji ma se. 8Jarni saomang gede gaiyaba de saomang ni hamya khe bo raji ma se; thikhabo, Bese ni gede gaiyaba de Bese ni thaoglao ni hayu khe maima se. 9Odebani, jing hamba khusi khe seleya hi dang lai nang; bede thikhade bo khe jing haigerya hi dang kha de, bubli ha raji ma se. 10Odebani se, hamba bubli jing maiba lai ning khrip subung niha hamba khusi khe dang lai nang, lonyaba nokhorrao ni basao ha de ar dangdao lai nang.
Yaohonthao ni grao ar Juthai ri bani grao
11Nai lah, ang jarni yao jang ning nisi niha laijma aikhor gede gede jang ang rebyaba khe. 12Saomang ha sere subung majang rima nangjaoyarao khripbo bujuh raso hi dong mani khlai hi nisi khe haiha du, bo gibin musibo niya, Krista ni kross ni khlai hi dukhu rijaoyaba ha dukhu rijaoya mane khlai hi se ning. 13Bujuh rasoyaba Dara ni grao khe mani laiya; nisi ni saomang ha bonsi sanggama maiphu mani khlai hi bujuh raso mani nisi khe bonsi nangjao ba. 14Thikhabo, ang de jini Gabra Jisu Krista ni kross khe garhi de ang sanggaya, boni dara jang habsao ani khlai hi kross ha dikphajao kha, angbo habsao ni khlai hi dikphajao kha. 15Bede thikhade, gadain japhinya thikhade bujuh rasobabo musibo niya, bujuh rasoyayababo musi bo nidaoya. 16Bo dara ha dongyarao ni basao ha ode Madai ning Israel sarao ni basao ha bo shanti jang khasaoma dongpha lang thing!
17Duha ni phrang ang khe saosi bo dukhu da ri thing, ani saomang ha Jisu ni sin buthu khe dibai hi ang daobai du.
18Daphlungrao, Gabra Jisu Krista ni khasaoma nisi ni Bese jang baosi dongpha thing. Amen.
Currently Selected:
GALATIA 6: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
