DANGYASARAO 22

Githimyaba ha Paul grao thi ba

1Daphlungrao, bupharao, duha nisi ni sagang ha song hi, ani jaba grao nisi khe ang thi du, khna lah, ode bo thijen ba. 2Hebrai grao jang bonsi niha grao thiba khe khna ba ha, bonsi phirik phirik jadao ba.

3Boha Paul thiba, Ang de Juda subung se, Kiliki raji ni Tarsa nolei ha hajai ba; thikhabo, ebo nogor ha ning Gamaliel ni igah rogong ha kham hi sling hi ang deyaba juyaba se, jini greng buthu ni Dara gibi khe sling hi ang dongyaba se. Dini nisi lai ning, Madai ne khlai hi ang bakhan khlaiyaba se. 4Ebo lama ni subung buthu khe thima jasi ang dukhu ri re, miyah masainjik khebo ang kha hi, phatho ha jeb ri re. 5Jonthai dedao thaoyaba jang khrip khraoraobo ebo grao ni sakhi dong. Bonsi ni phrang daphlungrao ne ri mane khlai hi laisi ang mai kha; odebani Damaska ha dongyaba si khe saja ri mane khlai hi, khahi bonsi khe Jerusalem ha lang mane khlai hi ang thang ba.

Paul hajai slam mani grao khe sainthi ba

6Ang thangpha langba ha, Damaska nogor rogong gabasi ang sohiba ha, sainjer khamba bubli ha, nokhasao ni phrang ani sersi giding jdan thar ba, 7ang hah ha galai hi, aniha thi ba, Saul, Saul, ning ang khe snadi jabani dukhu ri ba? thihi ang khurang khna ba. 8Boha ang thiphin ba, Gabra, ning sere? ar Gabra ani ha, Nazareth Jisu, ning dukhu riyaba se, thihi ang khurang khna ba. 9Ani lugurao jdanba khe nu kha, thikhabo ang jang sainlai ba khurang khe de bonsi khnaya. 10Ang sing ba, Gabra, ang snadi khlai ma kho? Gabra aniha thi ba, Baija hi Damaska ha thang, ode khrip ning dangma nangyaba si khe bonsi ning nini ha thi nang, 11Bo hamsi ning jdan bani ang de musi khebo nuya kha, ode ang ani lugurao ni yao khe remhi Damaska ha phai kha.

12Bo nogor ha, subung saosi, Anania thiyaba, Dara ni balam ha Madai khe maniyaba, oraha Juda dongyarao khripbo bokhe man khlaiyaba dong. 13Bo ani rogong ha songphai hi ang khe thi ba, Hoi, daphlung Saul, ning muthai nuphin lah, boha ning ani muthai nuhi, bokhe ang nu kha. 14Bo thi ba, Jini phagararao ni Madai ni nangjaoma khe tharmai mane ar ebo dormo khe nu mane, boni khuh ni grao khe tharmai mane khlai hi bo ning khe saikho kha. 15Ning nuyaba jang khnayaba grao khe khrip subung niha boni grao ni sakhi ning ja ma. 16Ode, ning duha snadi khe jonba kho? Baija hi boni bumu khe lahi baptisma lahi, nini phap khe susa lah, ode bo ang khe thi ba.

Jentailrao niha Paul khe haiha ba

17Ang Jerusalem ha phaiphin bani yaohon ha, Madai khoh ha ang biba ha, muthang ha lai ang dong ba; 18Gebre hi Jerusalem ni phrang baigo lah, bede thikhala, eraha de ani balam ha nini sakhi riginyaba khe bonsi mani nang niya, ode bo ani ha thiba khe ang khna ba. 19Boha ang thi ba, Gabra, bojom jayaba khrip noh ha ning khe lonyaba si khe phatho ha ang jeb hi, ang suba khe bonsi mithi du; 20Ode, nini grao ni sakhi Stephan khe sthaiba ha angbo bonsi ni rogong ha dong ba, bokhe sthaiba khe angbo mani ba, ode sthaiyarao ni rih khebo ang naiso ba 21Boha Gabra ang khe thi ba, Thang lah, bede thikhade, ang ning khe Jentailrao niha gajain haiha nang.

22Bonsi ebo grao sosi khna ba, boha khurang bol jang jirik khao hi, Eleiyaba subung khe de sjam khlah. Bonthane khlai hi thanghi dongma nangya! 23Bonsi jirik khaohi, bonsi jarni rih buthu khe khokhlai hi, bonsi dangkhlai ba, ode nokhasao gede haduri dangkhu ba. 24Odebani, siphaiya ni hoja dedao thaoyaba Paul khe khorongma ni bising ha lang mane siphaiyarao khe hukhum ri ba, bokhe su mane khlai hi sumjabani olei badai hi jirik khao ba thihi tharmai mane. 25Boha migur ni wadu jang bonsi kha blai hi suba ha, Paul jarni rogong ha songyaba siphaiya rjasi ni hoja niha thi ba, Rom ni asaba subung khe gajai giri hi su mane nisi ni dara ha dong?

26Siphaiyarao ni hoja ebo grao khe khnaba jang, siphaiyarao ni hoja dedao thaoyaba niha thang hi, Ning khusi dangginyaba khe girik lah dou! Ebo subung de Rom ni subung se, thihi bo sainthi ba.

27Siphaiyarao ni hoja dedao thaoyaba boni ha phai hi sing ba, Ning Romsa se na? Ang khe thi lah, bo ode thi ba.

Paul thiphin ba, Om.

28Siphaiyarao ni hoja dedao thaoyaba thi ba, Ang de Rom nogor ni subung ja mani khlai hi rang gabang rihi se ang mai ba thi.

Paul thiphin ba, Ang de hajaiba ni phrang ning Romsa se.

29Odebani, dukhu rihi gajai rima baoyarao de bokhe srap haiger hi thang la kha; ode siphaiyarao ni hoja gedebabo bokhe Romsa se thihi tharmai ba jang bo khin hi, bokhe kha bani khlai hi bo khin ba.

Bisardarrao ni sagang ha Paul song ba

30Bo basain ni dakhna ha Judarao snadi jabani Paul khe bonsi gajai ri ba thihi hamsisi tharmaima nangjao hi siphaiyarao ni hoja gedeba ning bokhe khayaba khe khuru hi, jonthairao ni gedeba ode khrip bisardarrao khe bojom jamani khlai hi bo hukhum ri ba, ode Paul khe langpha hi, bonsi ni sagang habo khe song ri ba.

Currently Selected:

DANGYASARAO 22: DIMASBSI

Highlight

Copy