DANGYASARAO 20

Makedonia ode Akaia raji ha

1Ho jayaba magain bani yaohon ha, Paul jarni yaohon rikphayarao khe long hi bujai ba; ode bonsi jang degaolei hi Makedonia ha thang mane khlai hi bo baigo kha. 2Jarni yaohon rikphayarao khe gibin gibin grao bujai phalang hi bo raji ha thang thar hi, Akaia raji ha bo sohi kha. 3Oraha ning nokha daintham dong ba. Suria raji gede thangma baoba ha, Judarao bokhe hamjaoya ar boni balam ha hamya baothai bao du thihi mithi kha; odebani bo Makedonia raji ha srap thangphin lama bao ba. 4Boha Purrha ni basa Sopater, Beroia nolei ni subung buthu, Thessalonika ni subung Aristarka jang Sekunda thu, Derbe ni subung Gaia thu, Timothe thu, Asia raji ni subung Tukik jang Trophim thu, bo jang baosi thangpha ba. 5Bonsi sagang ha thang hi, Troas ha jing khe jon hi ning dong ba. 6Jing de humao giriyaba hon ni mel ni basain ni yaohon ha, Philippi ni phrang rung jang baigo hi, nokha sain bowa ni yaohon ha Troas ha sohi dada, oraha ning nokha sain sni jing bonsi jang dongthao kha.

Troas nolei ha Paul grao thiba

7Basain sain sni ni sainbli ha, hon sabai mane jing bojom jaba ha, Paul dakhna thangla ma baoba ni, khah jang muh jang hogjer sosi grao thihi ning dong ba. 8Khutha basao, jini bojom hathan ha, thaophari bo gabang dong ba. 9Naga saosi Eutuk thiyaba, khirki ha kham hi bo mudim ba. Paul grao thiba lao kha bani, bo thuma mijing ba, ode noh ju thak tham ni phrang bo grai hi. Bo khe sugu hiba de bo thih kha. 10Thikhabo, Paul akhai hi baipha dada, bamkhu hi, Da gmang, boni hang jamya kho! thihi bo thi ba. 11Paul noh ha gakhuphin lang hi, hon khe sabai hi bo ji kha, ode nokha naisi bonsi jang baosi dongpha hi, bujai dada bo thangla kha. 12Bonsi bo naga khe gathang jahi jarni noh ha labu hi gabang bo santi mai kha.

Mileti hahgojo ha Paul thang ba

13Jing rung ha thang hi, Assos gede baigo da kha, oraha ning Paul khe jing gapha rima bao ba. Bo oraha igah jang hemhi thang mani, jing khe olei ning dang mane thiblai kha. 14Assos ha jing bokhe goron phin dada, jing bokhe gari hi, Mitulini ha phai ba. 15Oraha ni phrang rung jang jing thangphin hi, gibin basain ha Kia hahgojo rogong ha sohi kha. Ode, gibin basain ha de Samos sohi dada, jing Mileti ha sohi kha. 16Boha Paul de Asia raji ha budu glao dongma nangjaoya bani Ephesi khe rung jang lailangma bao ba. Blai kha de Jerusalem ha Pentikos ni basain khe mairikma bao hi, bo gebre dada thangma bao ba.

Ephesi ni khraorao niha Paul grao thiba

17Mileti ni phrang Ephesi ha subung haiha hi, longjomkhoh ni khraorao khe longha ba. 18Boniha bonsi phaiba ha, Paul bonsi khe thi ba, Asia raji ha ang gasing jenba basain ni phrang dini sosi, nisi jang baosi ang dong khali ani dongthai khe nisi tharmai kha. 19Judarao ang khe gajai riba ni mudi jang dukhu ani basao ha galaiyaba khe ajao hi basasa ja dada Gabra ni khusi khe ang dang re. 20Snadi grao nisi ne lab ja kha, bokhe sainthi mane ode subung buthu ni sagang ha ode, noh noh ha sling riba khe ang asaba dara jang haigerya. 21Judarao ode Jentailrao niha bo Madai ni gede khaslai mani grao ode, jini Gabra Jisu Krista ni gede lonma ni grao khe jing tharmai ri re. 22Ode, duha Bese Gathar khe mani hi, Jerusalem ha ang thang ma, oraha ani basao ha snadi jinis sophai nang ang tharmaiya. 23Khrip nogor ha, phatho jang dukhu ang khe jon du thihi Bese Gathar ang khe khna ri du, bokhe se ning ang tharmai ba. 24Thikhabo, ang Gabra Jisu ni phrang dang mane khusi maiyaba khe dang hi phura khlai mane ar Madai ni khasaoma ni hamba graojma khe sakhi ri mane se, ani hayu khe musibo baoya. bokhe khasaoma ang bao du.

25Ang nisi khrip ni bising ha, Madai ni Raji ni grao khe jirik khao pha hi sainthi kha. Ode duha ang mithi du, ani mukhang khe nuphin nang niya kha thihi ang tharmai du. 26Odebani, ang dini ni basain ha nisi ne sakhi rihi thi du, ang khrip subung ni bithi jang gajai niya. 27Bede thikhade khrip Madai ni bisar khe jamthar si nisi niha mao ge ge jahi ang thiya. 28Odebani, Madai ni longjom, jarni thijao jang baraiyaba khe, raokhi mane khlai hi, nisi girik lah. Bede thikhade, Bese Gathar jang bonsi ni basao ha nisi khe hoja slam kha. 29Ang thangla bani yaohon ha, rasa merang buthu nisi ni bising ha hap phai nang, ode melma buthu khe haiger nang niya thihi ang tharmai du. 30Nisi ni bising ni subung ni phrang bo, lonyarao khe mosol jang lang phayaba subung baigo phaima se. 31Odebani, naidao lah, maithai tham sosi, mudi galai hi sain-hor khrip subung khe ang jo ba thaoyaba khe wainso lah.

32Duha Madai jang bo khasaoyaba grao niha nisi khe ang deng kha, bo se nisi khe gede slamphu ma, ode subung gatharrao ni bising ha nisine don ni phantha bo ri phuma. 33Ang saosi ni rang buthu, gajao buthu ode gainsari buthu khe bo libiya. 34Ebo yao buthu jang ning ang jang ani lugurao nangyaba khe phura dangba khe nisi ning tharmai la du. 35Khrip jadi khe ang dang hi nisi ne phunu kha, olei dukhu hadi jang, Gabra Jisu ni grao khe wainso hi ning subung raoyayarao khe nisi juruma nang du; bo jar ning, asaba jinis khe laba thane rihaba lab jadao bo thi du, ode bo thi ba.

36Paul olei grao thiba ni yaohon ha, yasgu thuhi bonsi khrip jang baosi jahi bi lai kha 37Bonsi khrip bo grahi, Paul khe gabao hi, bonsi khudim ba. 38Boni mukhang nuphinya bani grao thiba de bonsi hamsi ning waimu nang kha. Ode, rung sosi bonsi digar hi kha.

Currently Selected:

DANGYASARAO 20: DIMASBSI

Highlight

Copy