2 TIMOTHE 3
3
Bubli jamthaoba ha subung ni dongthai
1Bubli jamthaoba hade gabang dukhu hadi sophai ma se thi hi tharmai lah. 2Subung jar khe khasao layaba, rang rih harbaoyaba, subung sanggayaba, subung phuthan, Madai khe sijiyaba, buma bupha ni grao khe layayaba, khajaba ringyayaba, gusu, 3khasaoma hajai phayayaba, map giriyaba, malai khe hamya thibaiyaba, khah saiphuyayaba, bakha lamyayaba, hamba jinis khe nangjaoyayaba, 4jar khe girikjao layaba, yaohon ni grao khe baoyayaba, jar khe blajaoyaba, Madai khe hamjaoba thane jar khe sukrima nangjao daoyaba, 5bonsi jar khe hamsi ning Madai ni subung phnu ma, thikhabo, boni raothai khe maniyayarao bonsi baigo ma se. 6Bonsi ni bising ha subung sereba sereba de noh buthu ha daobai hi, masainjik raoyayaba, phap ni bubain risi hi dongyaba khrip jadi hamyayaba jang giphinyarao khe phuslai hi mani ri re. 7Oleiyaba masainjikrao de nalai sling la khabo, grao gibi khe bonsi tharmaiyayarao se. 8Janni ar Jambri thiyaba, Moses jang badai hi nanglaiba lai bonsi bo grao gibi khe badai hi bonsi nanglai du, bonsi ni baothai bo hamya ja lang la kha, lonma habo bonsi musi thima giri kha. 9Thikhabo, olei sosi so phu nang niya, Janni ar Jambri lai ning, bonsi jar ni blai jaothai khe khrip subung ni sagang ha nujaoma se.
Sibring thaoyaba
10Thikhabo, ning de ang slingriyaba ja thing, ani dongthai ja thing, ani baothai ja thing, ani khah laoma ja thing, ani hamjaoma ja thing, ani dukhu suiyaba ja thing, 11nalai ang khe dukhu riyaba ode, ani dukhu buthu khe ning tharmai thar kha. Antiokei ha ja thing, Ikoniam ha ja thing, ode Lustra ha ja thing, ani basao ha sophaiyaba buthu ode, dukhu ri jaoyaba ha ang blaiyasi blaiyasi dukhu khlai kha; thikhabo bo buthu khrip habo ang khe sogo kha. 12Gibi ning jadu, sere Krista Jisu ha Madai khe maniyaba ja ma, nangjaoyarao de bonsi dukhu ri jaoma se. 13Thikhabo, subung hamyayarao jang subung thokhi baiyarao de, bonsi ni phantha de hamyadao pha lang nang; ode, malai khe bonsi thokhi ma, malai jangbo bonsi thokhijao ma se. 14Thikhabo ning de, sere ni phrang ning slingba thi hi wainso hi, ning slingblaiyaba ode raothe the ja hi ning lonyaba ha ning dong lah; 15Krista Jisu ha lonma dong bani khlai hi se sogoma maisi ning khe gyan ri phuyaba laisi gathar buthu khe ansa ni phrang ning mithi kha. 16Madai grao rebyaba khrip khe Madai ning hang susing hi slingri bani balam ha ja thing, ode, joba ni balam ha ja thing, salai slamyaba ha ja thing, dormo ni balam ha slingriyaba ja thing, gabang se; 17Madai ni subung de gathar ja hi, khrip jadi hamba khusi sothar si dang phu mani khlai hi gainsari khe thu lah.
Currently Selected:
2 TIMOTHE 3: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
