2 KORINTH 13
13
Sibringthai jang khlim ba
1Duha jang nisi niha ang phai ba phin tham ja kha. Grao mithi phayaba gini ja thing, gatham ja thing, khuh ni phrang se ning, asaba grao khe ragao ri ma nang du. 2Nisi niha ang phin gin phaiba ha, phap khusi dangyarao ode gibin subung khrip ni sagang ha ning ang thi kha, nisi ni bising ha dongya lakha bo, nisi khe ang thiphin du: ang phaiba ha phap khusi dangyarao khe ang haiger nang niya. 3Aniha bo ang khe yaowai hi Krista ning grao thi du thi hi nai nai mani nisi smai du, bo de nisi raoya hi khusi dangya. Nisi ni bising ha raodaothao jahi se bo dang ba. 4Bo de raoyayaba ha dikpha jao hi bo dong, thikhabo, Madai ni raothai ni khlai hi bo thang hi dong. Boni ha se jingbo raoya ba; thikhabo, nisi ne jing khusi dang ba ha Madai ni raothai ni khlai hi, boni ha se jing thang hi dong ba.
5Lonma ha ning nisi dong na giri nisi jar ning nai nai hi, hamsisi nai lah. Jar ning nai nai hi nai lah. Krista Jisu de nisi niha dong thihi nisi tharmai laiya na? Nai nai ba ha ning phura jaya kha de! 6Jing de phura jaya hi dong thihi nisi mithi mani ang asa khlai du. 7Thikhabo, phap khusi musi khebo nisi dangya mani khlai hi Madai niha nisi ne bi ri du. Nai naiyaba khe lailang ba lai jing nujao phnu phu mani khlai hi jing thidaoba niya, luskan jaba lai nujao lakha bo, gibi jinis buthu khe nisi dangphu dao mani khlai hi se. 8Grao gibi khe badai hi musi khebo jing dangphuya, grao gibi ni khlai hi se ning jing dang phu ba. 9Jing raoyaba ha bo nisi rao bani jing hamsi ning khaja du. Biba ha jing gibi jang sainyaba khe, nisi phura japhu mani ebo se. 10Nisi khe hamya khlai ma niya hi, nisi khe hamba khlai mani Gabra ning a ne grao ni khemotha ri hi, nisi niha ang phaiba ha bo grao ni khemotha khe sajao si ang yaowai ma nangya mani khlai hi, ang phai mani sagang ha, ebo grao buthu khe ang reb haba se.
11Jamthaoba ha de, daphlungrao, khusi jang dong lah. Phura salai slam hi dong lah, khah masi jahi, milima jang dong lah; odese hamjaoma jang milima ni Madai de nisi jang baosi dongpha ma. 12Gathar khudimthai jang jar jang jar khe khlim lah. Subung gatharrao khripbo nisi khe bonsi khlim ha du.
13Gabra Jisu Krista ni khasaoma ode Madai ni hamjaoma, Bese Gathar maiyaba de nisi khrip ni basao ha dong thing.
Currently Selected:
2 KORINTH 13: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
