1 TIMOTHE 5
5
Lonyarao ni bubain buthu
1Miyah radaoyarao khe da jo bai, jar ni bupha lai mani lah, ansarao khede buphlungthu lai nai lah, 2masainjik radaoyarao khede buma lai nai lah, matlarao khede gathar jadao thaoyaba jang bahandaothu lai nai lah.
3Banjik gibi gibiyarao khe man khlai lah. 4Thikhabo, asaba banjik ni basa ja thing, busuthai ja thing boni ha dongkha de, sagang ha jar ni nokhor ni bising ha Madai khe mani mani dara ode bonsi khe naiso nuso khlaiyarao ni basao ha hamthai khe sling da la thing; bokhe se Madai de khaja ba. 5Sao jang dongyaba banjik gibiyaba de, boni asa de Madai niha se ning bo asa deng hi, sain hor nalaibo bi dada sain hi bo dong re. 6Thikhabo, banjik jar suk ja mani se ning rikha de, bo thang hi dongba habo githi se. 7Gajai giri hi bonsi dongphu mani khlai hi, yaowai mani dara ni grao buthu khe hukhum riba lai sainthi lah. 8Asaba subungbo, jar ni apnarao, bo gibi jang jar ni nokhor ni subung khe ning kharangma bo nangjaoya khade, lonma ni phrang bo degaoba se, lonyayaba subung thanebo bo hamyadao.
9Banjik maithai jang bisatham sosi boni bakhla ni niyayaba subung saosi ni bihih jakha de banjik ha bokhe reb la phu du. 10Bode hamba khusi dangyaba ni balam ha, malai jang bakhan rijao kha: basathu khe naiso kha, naorai ni basao ha hambi, subung gatharrao ni igah bo su kha, subung dukhisarao khebo juru kha, ode khrip hamba khusi dangyaba ni balam ha khah muh ri kha.
11Thikhabo, banjik ansa jadaoyarao khe de banjik ha bumu da reb; bede thikhade saomang ni libima jang Krista ni phrang dikhaolang hi, basai lama nangjao du. 12olei ning, bonsi sagang grao hanggaiyaba khe hamya khlai bani bonsi gajai ja re. 13Ode niyakhabo, noh magain hi daobai hi seleyaba khe bonsi sling du; sele jaba se ning niya kho, malai khe siji baiyaba ode daobaiba raoyaba, grao thima niyayaba khe bonsi thi re. 14Odebani, banjik ansa jadaoyarao de noh japhin hi basai mai dada nokhong si khe naiso la hi, sotrurao musi thima maiya mane ang nangjao du. 15Duhabo subung gejesi de soithan ni yaohon rikpha lang hi degao lang la kha. 16Lonyaba haingajik jar ni apnarao banjik khe dengpha khade, bonsi khebo kharangma nang du, longjom de banjik gibi khe se ning bo naiso phu mani khlai hi, longjom ni bubain risi riyaba da ja thing.
17Longjom ni khrao subung langsmai ba ringyaba, ode grao thiba ar slingri bani gede khah riyarao khe bakhan khlaima nang du. 18Madai ni laisi ha ede thi du, Musu jla mai naoba ha boni bukhuh khe da khah, thidu, ode khusi dangyaba de tholop bo mai ma nang du. 19Sakhi riyaba gini ja thing, gatham ja thing, sakhi giri thikhade, longjom ni khrao ni basao ha gajai riyaba grao khe da mani lah. 20Phap khusi dangyaba buthu khe, khrip subung ni sagang ha jo hi bujai lah, gibin khripbo khinma maiphu mani khlai hi.
21Madai jang Krista Jisu ode degla saikhoyarao ni sagang ha nisi ne ang grao ri du, ebo slingriyaba grao buthu khe khah khuru hi mani ri hi, ode gibin khlai hi musi khebo khusi da dang lah. 22Asaba ni basao habo yao dengba khe da gebre, malai ni phap buthu ha phantha da ja lah; jar khe jar gathar khlai hi ning dong lah.
23Dih khe se ning lingyaba subung da ja si, nini bohoh ne khlai hi, ode jar alang alang bohoh sabani dara jang, grep bidih ni ju khe khaisa khaisa ling lah.
24Subung sereba sereba ni phap buthu de srap nujao du, bonsi thane bonsi ni phap de bisar ha soda du, thikhabo, sereba sereba phap de yaohon ha se nujao phai ba. 25Olei jasosi ning hamba khusi dang hi dongyarao de bonsi ragao sisi nujao re, ragaosi bonsi nujaoyayaba buthubo, hui hi budu galao dongphuya.
Currently Selected:
1 TIMOTHE 5: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
