1 JOHN 5
5
Habsao deyaba lonma se
1Sere Jisu khe Krista thi hi lon du, bo Madai niha hajaiba se, odehe sere basa maiyaba khe hamjao du, bo jar ni basa khebo hamjao re. 2Madai ni basathu khe jing hamjao du thi hi jing tharmaiyaba ebo se: Madai khe jing khasao hi, bo grao riyaba buthu khe jing mani kha. 3Madai khe jing maniyaba ebo ning ja kha: bo grao riyaba buthu khe jing mani du; bo grao riyaba buthu de duya. 4Madai niha hajaiyaba si de habsao khe bonsi de du. Ode ebo ning habsao khe deyaba se, jini lonma ning. 5Jisu khe Madai ni basa se thi hi lonyaba khe garhi sere habsao khe de re?
Jisu Krista ni balam ha sakhi riyaba
6Dih jang thijao ha phaiyaba de Jisu Krista se, dih jang se ning niya hi, dih jang thijao ha jayaba se. Bokhe sakhi riyaba de Bese ning ja kha, Bese de grao gibiyaba se. 7Bonsi sakhi riyaba gatham dong: 8Bese jang dih ar thijao, bo matham de mili du. 9Subung ni sakhi khe ning jing mani kha la, Madai ni sakhi la ar dedaoyaba se, Madai ni sakhi ebo se: Bo jar ni basa ni balam ha sakhi ri du. 10Madai ni basa khe lonyaba jar ni ha ning boni sakhi dong la du. Thikhabo, Madai khe lonyayarao Madai ning jar ni basa ni balam ha bonsi ni sakhi riyaba khe bonsi lonyaba ni bokhe bonsi mosol slam du. 11Odehe, ebo ning boni grao khe sakhi ri ba se: Madai ning boni thaoglao ni hayu khe jinthane ri kha, bo hayu de basa niha dong. 12Sere basa khe mai kha, bo hayu mai kha; sere Madai ni basa khe maiya bo hayu khe maiya.
Thaoglao ni hayu
13Thaoglao ni hayu mai kha thi hi nisi mithi phu mani khlai hi, nisi Madai ni basa ni bumu khe lonyarao niha ebo grao khe ang reb ba se. 14Ode ebode boni basao ha jini khah de ma se; asaba khe bo boni nangjaothai lai jing sain khade, jing sainyaba khe bo gainsong du. 15Jing sainyaba khe bo gainsong du thi hi jing mithi du bani, boni ha jing jinis sainyaba buthu khe mai du thihi bo tharmai du.
16Sere jar ni daphlung thihma nang si phap khusi dangyayaba nu khade, bonthane sain ri nang, Madai ning bokhe hayu ri ma se. Ebode thima nang si phap khusi dangyayaba ni khlai hi se. Thima nang si phap dong, olei khusi dangyaba ne Madai bi rima nang ma thihi ang thiya. 17Khrip hamya khusi dangyaba de phap gajai se; bede thikhade thima nang si niyayaba phap bo dong.
18Sere Madai niha hajai kha phap khusi dangya kha thihi jing mithi du; Madai niha hajai kha bokhe bo dimkhao du, subung hamyayaba de bokhe dopha phuya.
19Jing Madai ni basathu se thihi jing mithi du, odehe habsao bubim jang ebo subung phaphi ni hukhum bakhla ha se dongba thihibo jing mithi du.
20Madai ni basa phai hi, Madai gibiyaba khe tharmai phu mani khlai hi, bujima khe jinthane bo ri kha thihibo jing mithi kha. Ode, jingbo boni Jisu Krista ha jing donghi, subung gibi jahi se jing dong ba. Bode Madai gibiyaba se, thaoglao ni hayubo bo ning.
21Ansarao, saokhuli ni phrang jar khe dimkhao lah.
Currently Selected:
1 JOHN 5: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
