SOLOMON KEN 2
2
1Ni Sharon labu naro,
lenten labu naro ka,
2Ai rongnung labu naro ka ama,
yamaji aiür rongnung kü temeim lir.
Tetsürlai Atenba
3Min süngdong rongnung metoklashi dong ama,
yamaji asangur rongnung kü meimba lir.
Tepela tulu agi ni pa akhüm nung amen.
Aser pa süngjang kü bang dang junga liasü.
4Pai ni benjong ki dangi anir aru,
aser kü madak pa nisan temeim liasü.
5Tsükmenatzü amtsük agi ni sota yuang,
metoklashi agi ni anisüngzükdakjang,
kechiaser ni temeim agi lular.
6Aia, pa tabelen teka kü kolak kübok,
aser pa teka tajichi kü dak azüita lilasang!
7Oh, Yirusalem jalatem,
arem nung shio tsüla mesüra mesü lamen atemer shidi,
nenoki pa pela-a maküm tashi temeim tarimeso
mesüra tesakdaktsü.
Tanabuba Ken: Tetsürlai Atenba
8Kü meimba ola! Ajiang, tenem manung pungtena,
tenem tokong manung joktena, pa arur.
9Kü meimba mesü ama, mesüra shitsü pungtu ka ama lir.
Ajiang, yangji ozü jara sülen pa noktaker,
pai kichibalen repranga yoker,
Ozükirang ajanga pa sasa pai sayur.
Tebursangi Atenba
10Kü meimbai jembir aser kü dang ashir;
“Shishiang, kü temeim, kü tobur ajungla, aser aruadokang,
11kechiyong angang, tsüngkhüm süiogo,
tzünglu anenogo, aser ogo.
12Alima nung narotem adoker,
ozü ken atenba mapang arua lir,
aser asen lima nung posü asaba ola angashir.
13Munguzünu dongi munguzünu atanger,
aser tsükmenatzütem teben punga lir.
Parnoki tesanem yoker,
shishiang, kü temeim, kü tobur tajung,
aser aruadokang.
14Oh kü guduru, lung jakma pok nung,
lungbang kübok nung
kü nem ne tejak ngudakjang, kü nem ne ola angashidakjang.
Kechiyong ne ola tanang, aser ne tejak tajinütsüka.
15Anati shirongtem pudi,
tsükmenatzü lu raksatsüba shirong tilatem.
Kechiyong asen tsükmenatzü lu teben punga lir.”
Tetsürlai Atenba
16Kü meimba kü meyong, aser ni pa meyong lir,
pai pa san telok labu naro rongnung chiyimdaktsür.
17Anepdang temokong mesüitem tashi, akhüm mesüitem tashi.
Aia, kü dangi meyipang, kü temeimba,
aser wabetsa nung mesü ka ama,
mesüra shitsü pungtu chanu ama asaya-ang!
Currently Selected:
SOLOMON KEN 2: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
