MATHI 24
24
Tenla Ki Raksatsü Indang Shinba
(Mar. 13.1-2; Luk. 21.5-6)
1Yisui tenla ki nungi adoker oya alidang, pa nütsüngtemi pa dang tenla ki yanglubaji sayutsü asoshi pa dangi aru.
2Saka pai parnok dang langzü, “Nenoki item ajak angur, aji oda masü ama? Atangji ni nenok dang ashir, yangi lung ka manung lung ka melokshidaktsüi anünga malitsü.”
Timtem Tekangshi Tenzükba
(Mar. 13.3-13; Luk. 21.7-19)
3Pa Oliv tenem nung mena alidang, nütsüngtemi kija pa dangi arua ashi, “Itemi kodang ataloktsü, aser na aruba, aser alima tatem temaitsü kechi alitsü onok dang shiang?” 4Yisui parnok dang ashi, “Shingaia nenok mashileni manidaktsütsü kümdangang. 5Kechiaser kü nüng nung aikati, Ni Khrista, ta jembia arutsü, aser aika mashileni anitsü. 6Nenoki raraba otsü aser rara adoktsüba osangtem angashitsü. Nenok maoksatsü kümdangang. Kechiaser itemi ataloktsüla, saka tatem ano masü. 7Kechiaser kini kin anema aser yimli-i yimli anema apusotsü, aser tesem tesem nung ayawara aser menoknok alitsü. 8Saka item ajak tekangshitsü tetenzüker.
9 #
Mat. 10.22
“Idangji parnoki nenok timtem tekangshi ngudaktsütsü bendanga agütsütsü aser nenok tepsetsü; aser kü nüng atema kin ajaki nenok sempatsü. 10Idangji aikati metsüdaktsü, aser kati ka bendanga agütsüteptsü aser kati ka sempatsü. 11Aser tiyazü ainkar aika adoktsü, aser aika mashileni anitsü. 12Aser ozüng raksar onsara nungji, nisung jenti temeim mokonga akümtsü. 13Saka shibai tatem tashi aremdir pa kümzüktsü, 14aser iba Kotak Yimli Osangtajung alima ajonga nung kin ajak dang kuli asütsü asoshi sayutsüngitsü, aser idangji tatem arutsü.
Timtem Tekangshi Tulu
(Mar. 13.14-23; Luk. 21.20-24)
15 #
Dan. 9.27; 11.31; 12.11 “Anungji Daniel ainkar ajanga jembiba tesempatsü tesamaba kodang nenoki temeshidak noktaka ngudir (Shibai azünger pai angatetang); 16idangji Yihuda lima nung shir ali parnok tenemi jenang. 17Shiba kilem manung ali pa par kidang aliba osettem abentsü teluma. 18Aser shiba alu nung ali pa pei sü abentsü meyipa tuoma. 19Saka iba tensa nung temang mazüngi alirtem aser mama yongdaktsürtem aiatai! 20Nenok ajenba asükwa mesüra amungnü masütsü sarasademang. 21#Dan. 12.1; Jad. 7.14 Kechiaser idangji timtem tekangshi tulu alitsü, lipok nungi tang tashi nung iba ama mali, aser ano malitsü. 22Item anogo mesüktoktsü asübo, nisung shinga mekümzüki lila; saka teshimtetpur asoshi item anogoji süktoktsütsü.
23“Idangji nenok dang kari, ‘Ajiang, Khrista yangi lir mesüra yangji lir’ ta shira aji tamangma. 24Kechiaser tiyazü Khristatem aser tiyazü ainkartem adoktsü aser kokra teshimtetba pura mashileni anitsü asoshi temaitsütem aser tesüngmangtsü sayatenya tulu alitsü. 25Ajiang, ni nenok dang tamasa yongi shiogo. 26#Luk. 17.37 Anungji nenok dang kari yamai shira, pa arem nung lir, tuoma: ajiang pa taktang telungba nung lir, aji tamangma. 27Kechiyong anüdoklen nungi koda tsüngpret adoka anüolen tashia angur, yamaji Nisung Chir aruba alitsü. 28Kongsa tasümang lidir, yangji hogontem külemi sentepa alitsü.
Nisung Chir Aruba
(Mar. 13.24-27; Luk. 21.25-28)
29 #
Isa. 13.10; Yoe. 2.10,31; 3.15; Jad. 6.12; Ezk. 32.7 “Saka item timtem tekangshi anogotem temli, anü mangadoktsü, aser itai pei tesangwa magütsütsü, aser anüng tashitem anokshitsü. 30#Dan. 7.13; Zek. 12.10-14; Jad. 1.7 Idangji anüng nung Nisung Chir temaitsü adoktsü, aser idangji alima kin ajaki teku nung tsünga ajebtsü, aser parnoki Nisung Chir anüng mepet nung ain aser sentsüwangshi tulu nung aruba angutsü. 31Aser jangzü ola tulu agi pai pei tenyartem yoktsü aser parnoki anüng tatem külen nungi külen tashi kinük pezü sülen nungi pei teshimtet purtem anitentsü.
Mungudong Nungi Tatishitsü
(Mar. 13.28-31; Luk. 21.29-33)
32“Tang mungudong nungi o-entepba ka angazükang, kodang pa kongsang lanu küma to adoker, mei anasa lir ta nenoki metet. 33Anungji nenokia item ajak angudang, Nisung Chir ana nung, oda kishizüng nung lir ta metetang. 34Atangji ni nenok dang ashir, item ajak matalok tashi, iba putu süia maotsü. 35Anüng aser ali süitemtsü, saka kü O mesüitemtsü.
Memetetba Anogo Aser Mapang
(Mar. 13.32-37; Luk. 17.26-30,34-36)
36“Saka iba anogo aser mapang indang Tebu alema kotak tenyartemia, mesüra shingaia memetet. 37Noa tensa koma liasü, yamaji Nisung Chir aruba alitsü. 38Kechiaser Tzümetsüng matongdang, aser Noa rongi matu tashi parnoki koda chiyunga aser jema, anioka aser kiba kiyi yoka liasü; 39#Lip. 7.6-24 aser tzümetsüng arur parnok ajak okshia bener mao tashi, parnoki memetet, yamaji Nisung Chir aruba alitsü. 40Idangji nisung ana alu nung alitsü, ka anitsü aser ka toktsütsü. 41Tetsür ana semki ka nung tsük sena alitsü, ka anitsü aser ka toktsütsü.
42“Anungji saksalema liang, kechiaser kechi anogo nung nenok Kibuba arutsü nenoki memetet. 43#Luk. 12.39 Saka ya metetang, ki kiburi koba mapang nung auür arutsü aji metet asübo, pai nüka lila, aser pai pei ki merakpokdaktsüla. 44Anungji nenoka renema liang, kechiaser nenoki mebilemba mapang ka nung Nisung Chir arutsü.
Temulung Lemtetba Kilir Aser Tamajung Kilir
(Luk. 12.41-48)
45“Ajangla kiburi pei kilirtem nem mapang shitak nung chiyungtsü asoshi parnok madak ketdang südaktsüba temulung lemtetba aser shisa taka kilirji shiba? 46Pa pei kibur arudang kilir shiba yamaji inyaka ngudir, pa tepelatsü. 47Atangji ni nenok dang ashir, pa akaba ajak madak pai pei kilirji ketdang südaktsütsü. 48Saka iba tamajung kiliri kü kibur menua alir, ta pai pei temulung nung shira, 49aser medemer kilir dak azüktsü tenzükra, aser yi pur den chiyunga jemra; 50iba kilir kiburji pai meimlaba anogo ka nung aser pai memetetba mapang ka nung arutsü. 51Aser paanüka lepsatsü aser pa shilem asemsüba purtem den lemzüktsütsü. Idakji tajepba aser tepu shitepba alitsü.
Currently Selected:
MATHI 24: AONAGABSI
Highlight
Copy
Compare
Share
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
