MATHI 19
19
Palaba Indang Tesayuba
(Mar. 10.1-12)
1Kodang Yisui item o jembima, pai Galil toktsü aser Yordan külen aliba Yihuda linüki aru. 2Telok jenti pa sülen anitak aser idakji pai parnok anebtsü.
3Farisitem pa dangi aru aser pa atitanga asüngdang, “Teburi pei bilemba meshi-i kuli kar atema pei kinungtsü palatsü tim asü?” 4#Lip. 1.27; 5.2 Pai langzü, “Tetenzük nungi teyangluri meimchir tetsür o tebur-na yanglu ta nenoki mezüngdang no?” 5#Lip. 2.24 Aser pai ashi, “Ibayongji teburi pei tebu o tetsü-na toktsür pei kinungtsü den lungjema alitsü aser tenaprongla shi ka dang akümtsü. 6Anungji joko parnok ana masü, saka shi ka dang. Anungji Tsüngremi kechi lungjemdaktsü aji nisungi tepiladaktsü.” 7#Taz. 24.1-4; Mat. 5.31 Parnoki pa dang ashi, “Ajangla tepalatsü shiti agütsür pala-ang ta Mosai kechiba mela?” 8Yisui parnok dang ashi, “Nenok temulung merang nungji Mosai nenok dang pei kinungtsü palatsü mela, saka tetenzük nungi yamaji mali asü. 9#Mat. 5.32; 1 Ko. 7.10,11 Aser ni nenok dang ashir, ‘Shibaisa nüktapangta dak alema pei kinungtsü palar tangar tetsür agidir, pai nüktapangtar.’ ” 10Nütsüngtemi pa dang ashi, “Tebur pei kinungtsü den yamaji sentaktepa ali süra, ki mayimang tajungba.” 11Yisui parnok dang ashi, “Aji nisung ajaki agizüktetba ka masü, saka shir Tsüngremi ya asoshi shimtetogo, parnok asoshi dang alitsü. 12Kechiaser karbo tetsü nu menden nungi yanglur asoba teyangluba nisung lir, aser karbo tangari yanglutsüba, teyangluba nisung lir, aser karbo kotak yimli asoshi pei sasa yangluba nisung lir. Shibai ya agizüktsü akok pa nem agizükdakjang.”
Yisui Tila Tanurtem Moatsüba
(Mar. 10.1-16; Luk. 18.15-17)
13Idangji pa teka agi nemeta sarasademdaktsütsü asoshi tila tanurtem pa dangi anir aru; saka nütsüngtemi parnok arütsü. 14Saka Yisui ashi, “Tila tanurtemji oda tokjang, parnok kü dangi arutsü tesongtem; kechiaser kotak yimli ibala meyong lir.” 15Aser pai parnok dak teka agi nemet aser yang nungjagi pa pila-a ao.
Takar Asangur Ka
(Mar. 10.17-31; Luk. 18.18-30)
16Aser ajiang nisung ka pa dangi arua asüngdang, “Tesayur, teti taküm angutsü asoshi ni kechi mapa tajung inyaktsüla?” 17Pai pa dang ashi, “Kechi tajung lir iba indangji kechiba nai kü dang asüngdanger? Tajungbo ka dang lir. Nai taküm daki inürabang temelaba ozüngtem benshiang.” 18#Ani. 20.13; Taz. 5.17 Aser pai pa dang ashi “Kobala?” Yisui ashi, “Nai nisung tetepset, nai nüktapangta tebenshi, nai tauya, nai tiyazü kuli teyi, 19#Ani. 20.12; Taz. 5.16; Lev. 19.18 nebu aser netsü akhüm tsübuang; aser nai ne kiyonger dang pei ama meimang.” 20Asangur jagi pa dang ashi, “Item ajak ni benshia aruogo; ni ano kechi agi matoksa?” 21Yisui pa dang ashi, “Nai tabensa kümnüra, oang, na akaba yokang, aser sensaker nem agüjang aser kotak nung ne rongsen akatsü; aser arung kü sülen anitakang.” 22Saka asangur jagi ya ashiba angashidang, pa jashia oadok, kechiaser pa rongsen tulu akaba nisung ka liasü.
23Yisui pa nütsüngtem dang ashi, “Atangji ni nenok dang ashir, takari kotak yimli-i aitsü tasak lir. 24Ano tanabena ni nenok dang ashir, takar nisung kati Tsüngrem yimli-i aitsüba dang nungibo ajem ki ka ateta ut aotsü temelaba.” 25Nütsüngtemi aji angashidang kanga süngmangadok, aser ashi, “Ajangla shiba-ang kümzüktsü?” 26Yisui parnok dak ranglok aser ashi, “Nisungtem asoshi ya tamakoktsü, saka Tsüngrem asoshibo ajak takoktsü.” 27Idangji Peteri langzüa pa dang ashi, “Ajiang, onoki ajak toktsür ne sülen anitak; ajangla onoki kechi angutsü?” 28#Mat. 25.31; Luk. 22.30 Idangji Yisui parnok dang ashi, “Atangji ni nenok dang ashir, tasen yangluba nung, kodang Nisung Chir pei sentsüwangshi menden nung mendir, idangji nenok kü sülen anitakertema, Israel kidong terana o bendanga, chuba menden terana nung amentsü. 29Aser shibaisa ki süshia, chirnur süshia, lim süshia, kü nüng asoshi toktsüogo, pai noklangbena angutsü, aser teti taküm senmang amangtsü. 30Saka tamapur aika tesü akümtsü, aser tesüpur aika tama akümtsü.
Currently Selected:
MATHI 19: AONAGABSI
Highlight
Copy
Compare
Share
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
