MATHI 17

Yisu Sentsü Melenba

(Mar. 9.2-13; Luk. 9.28-36)

1Troknü lir külen Yisui Peter, Yakob aser tenu Yohan, parnok tenem talang kati anir pila-a atu. 2Idakji Yisu parnok tsüngdang sentsü melenadok. Aser pa tejak anü ama sangwa aser pa süoshi tesangwa ama mesünga aküm. 3Aser ajiang, pa den jembitepa Mosa aser Elija parnok tsüngdangi adok. 4Idangji Peteri Yisu dang ashi, “Kibuba, asenok yangi alitsü junger; nai mulungra, ni yangi semtu asem yangludi; na asoshi ka, Mosa asoshi ka, aser Elija asoshi ka.” 5#Lip. 22.2; Taz. 18.15; TKe. 2.7; Isa. 42.1; Mat. 3.17; 12.18; Mar. 1.11; Luk. 3.22; 2 Pe. 1.17,18 Pa jembia alidang sentsüprang mepet kati parnok süpang aser mepet nungi ola ka adoka ashi, “Ibai kü meimba jabaso, shiba dak ni temulung achir, nenoki pa dang angang!” 6Aser kodang nütsüngtemi aji angashi, parnoki tejak ali nung rembanga apudak, aser kanga tsübu. 7Idangji Yisui arua parnok dak kongshia ashi, “Noktakang aser tetsübu.” 8Aser parnoki tenük saaka reprang nung Yisu kija dak alema tangar shinga mangu.

9Parnok tenem nungi aludang Yisui parnok nem ozüng agütsüa ashi, “Nisung Chir tasü nungi shia maru tashi tangubaji shinga danga teshi.” 10Nütsüngtemi pa dang asüngdang, “Ajangla kechiba Elija tama arutsüla ta tezülurtemi ashi?” 11Yisui langzü, “Atangji Elija tama arutsü aser pai ajak yanglushitsü. 12Saka ni nenok dang ashir, Elija aruogo, saka parnoki pa memetet aser parnok inyaknütsü pa dak inyak. Yamaji Nisung Chir parnok ket nung tuo ashitsü.” 13Idangji Yohan Baptitsüba indang Yisui jembi ta pa nütsüngtemi angatet.

Nashira Aketba Tanur Ka Anebtsüba

(Mar. 9.14-29; Luk. 9.37-43a)

14Kodang parnok telok dangi aru, nisung ka pa dangi arua pa tsüngdang apudak, 15aser ashi, “Kibuba, kü jabaso dang aochiang, kechiaser pa dak nashira keter aser pa kanga mejungi kangshidaktsür; kechiaser pai aiben mi aser tzü nung pungoker. 16Ni pa ne nütsüngtem dangi anir aru saka parnoki manebtsütet.” 17Yisui langzü, “Oh tamang makaba aser mashi jajaba putu, ni nenok den kopiga alitsü? Ni nenok dang kopiga aremzüka atatsü? Pa yangi kü dangi anir arung.” 18Aser Yisui temenen tanelaji arütsü aser aji pa dak nungi tugu; aser tanurji idangyongji anebadok. 19Idangji nütsüngtemi Yisu dangi tanemi arua ashi, “Kechiba onokibo aji maridokteter?” 20Yisui parnok dang ashi, “Nenok tamang tera dang asübayong; kechiaser züngpong ni nenok dang ashir, nenok tamang jibijang teka danga lira, nenoki iba tenem dang ashitsü, yang nungi ajagi oang; aser aji aotsü; aser nenok asoshi tamakoktsü kecha malitsü. 21Saka ibai sarasadem aser lumiba ajanga dang aridokteter.”

Yisui Pa Asütsü Aser Shia Arutsü Indang Tanaben Ashir

(Mar. 9.30-32; Luk. 9.43-45)

22Parnok Galil nung senzüya alidang Yisui parnok dang ashi, “Nisung Chir nisungtem ket nung bendanga agütsütsü. 23Parnoki pa tepsettsü, saka asemnübuba nung shia arutsü.” Idangji parnok kanga jashiadok.

Tenla Ki Temelen Agütsüba

24 # Ani. 30.13; 38.26 Aser kodang parnoki Kapernaumi aru, tenla ki temelen sarurtemi Peter dangi arua ashi, “Nenok tesayuri tenlaki temelen magütsür asü?” 25Pai ashi, “Hau agütsür.” Aser kidangi aitdang Yisui tamasa pa dang jembia ashi, “Simon, nai kechi bilemer? Alima chubatemi temelen shir nungi agir? Pei chirtem nungi asü, Bendangertem nungi?” 26“Bendangertem nungi” ta Peteri langzü. Yisui pa dang ashi, “Ajangla pei chirtembo nüji küma lir. 27Saka parnok memetsüdaktsü asoshi, na tzüyimi oang, aser boroki agi nai tamasa kechi ango mesütetdir aji bener arung. Aser iba tebang nung nai taribi sen ka angutsü; ibaji ni aser na asoshi parnok nem agüjang.”

Currently Selected:

MATHI 17: AONAGABSI

Highlight

Copy