ISAIA 13
13
Babilon Anema Sangdong
1 #
Isa. 47.1-15; Yer. 50.1—51.64 Amoz jabaso Isaiai Babilon indang khuret anguba:
2Nenoki tenem moapu manung temaitsü ka yuang;
parnok dang ola tulu agi ja-ang,
aser tamarenertem süngkhümbongi parnok aitsü teka agi ayipang!
3Kechiyong kü ain adokba inyaktsü asoshi bendanga agütsüba kü pur dang ni melaogo.
Hau, kü temerangertem, aser tejak tenteta pelatepba kü pur ni jaogo.
4Nisung telok tulu ola mesüka tenem nung nanüngtepba angang!
Kintem chuba yimli adenshia nanüng adokba angang!
Temeranger Telok Kibubai tongbang asoshi temerangertem atenshidaktsür.
5Alima talang, nüngjang tatem nungi parnok arudagi,
alima ajonga samatsütsü,
Kibuba aser pa ain adokba nok o nü lir.
6Nenoki mang yimang, kechiyong Kibuba anogo anasa lir,
aser ajak Takoksang nungi tesamatsü arutsü.
7Anungji teka ajak tashi maiti akümtsü,
aser nisung shia temulung makai akümtsü,
8aser parnok akseta alitsü,
temulung zürep aser tejashi agi parnok dak atongtsü,
tetsür nusodang kangshi ama parnok tekangshi nung alitsü;
parnok kati ka dak tesüngmang agi rangshia reprangteptsü,
parnok tejakji milak ama alitsü.
9Ajiang! Alima azüngazünga yutsütsü,
aser iba nungi temenenpur samatsütsü,
taochi maka, terasaba aser tesashi ain adokba agi,
Kibuba anogo arur.
10 #
Isa. 47.1; Yer. 50.1; Ezk. 32.7; Mat. 24.29; Mar. 13.24; Luk. 21.15; Jad. 6.12 Kechiyong anüng petinutem aser telong tena aliba,
petinutemi pei tesangwa magütsütsü;
kodang anü adokdir,
pa tammang akümtsü, aser itai pei tesangwa mayatsü.
11Iba lima temenen asoshi ni merenshitsü,
aser nisung tamajunger parnok tai menaba asoshi ni merenshitsü;
asükümer jaksajaklemba ni anendaktsütsü,
aser ambangyimer mezümekümba teküboklen aludaktsütsü.
12Hon tajung dang nungi nisung ang,
aser Ofir hon dang nungi meimchir ang angutsü tasakba ni kümdaktsütsü.
13Anungji Temeranger Telok Kibuba terasaba ajanga,
pa tesashi ain adokba anogo nung anüngtem atententsü, aser alima pei talidak nungi anokshitsütsü.
14Ajiser tarishiba mesü mesüka,
mesüra san telok tanitener maliba telok mesüka,
parnok nisung shia pei nübur dangi meyipa aotsü,
aser nisung shia pei limai ajentsü.
15Shir ngudir ajak ateta atsüngtsü,
aser pua aruba nisung shia nok agi lepsettsü.
16Parnok kinü chanutem parnok nükdang anükanüka akusatsütsü,
parnok ki rakzükraktemtsü,
aser parnok kinungtsürtem dak sotaktsü.
17Ajiang! Ni parnok anema,
taribi asoshi mebilemba aser hon nung
tepela manguba Mede nunger ajungmesotsü,
18Parnok lijakjang agi asangurtem anüka kasatsütsü,
aser nu menden süngjang madak parnoki taochi makatsü,
mesüra tanurtem madak parnoki aochia mereprangtsü.
19Tsüngremi Sodom aser Gomora samatsüdang amato,
chuba yimli tobur tajung Kaldia nunger asüküm, sentsüwangshiba Babilon, yamaji akümtsü.
20Ajagi shinga marutsü mesüra putusa putu malitsü,
Arab nunger shingai yangji süki meyanglutsü,
sannüker shingai yangji san meyipdaktsütsü.
21 #
Isa. 34.14; 47.1; 50.1; Zef. 2.14; Jad. 18.2 Saka lisem lima arem shirurutem yangji mejangtsü,
aser kitemji asatepa aliba shirurutem agi sünga alitsü;
yangji ostrich ozütem alitsü,
aser shio tepungi yangji tsüngsangtsü.
22Parnok lung ki nung tzünüi aser chuba ki tajung nung shirongtem asateptsü;
iba mapangji tatonger, aser iba anogoji matsülangtsü.
Currently Selected:
ISAIA 13: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
