Dɨvidaa'nyɨ Gotɨyai daka “Evɨraamɨ gara yadelaka?” wɨda' “Aazakɨmɨna yɨlaaya naanga yadɨnyaigɨnyɨra. Gamɨnyɨ Moraaya kwaakevɨna dɨmakwodeigɨnyɨra. Mugunya savɨ Aazakɨmɨ dɨkevɨ dɨmarira'delyɨra. ‘Gotɨyarɨna wɨjaavɨdeinyɨ,’ dɨthadeigɨnyɨra.” Mi'na kuda' yɨrɨke' kavura' Evɨraamɨ jɨlɨkyaawarya dogiyavɨ dɨkɨraya yɨlakɨna kya' Aazakɨjɨ wawɨnya wɨdaayadisaraalyɨ gamɨjɨ wɨna. Kaanya kuna yadaa'nyɨ sawɨta pɨryaai kajɨnna' Moraayana kwaaka yɨ'mavaawɨna ye'. Yɨ'mavaawɨna kye' Evɨraamɨ wawɨnya wɨdaayadisaraarɨ wɨdɨna “Dava jemwaalyɨla! Nɨmɨjɨ kaimɨraayalyɨ sainaai mugunyavɨna yɨlaawaka! Gotɨyarɨna wɨdakadera. Mi'na wɨdakwoihɨri naarɨmɨ yagalaawakadera.” Sara wɨdɨna yaka Evɨraamɨ kwaari'matasɨ dɨkesɨ yengwɨtavamakuna ya'. Aazakɨ dɨkɨraya makuna ya'. Kaanna yɨlaawɨna yadaakɨri Aazakɨ Evɨraamɨmɨ wɨda' “Nɨmwai, jɨlɨkyaawarya Gotɨyarɨne wɨjaavakadei gavanako?” Kuda' Evɨraamɨ wɨda' “Nyɨbwaalɨ', Gotɨyai jɨlɨkyaawaryarɨ nehɨzaavadelyɨra.” Sabanna yɨlyɨ'mavaawɨna kyagi Evɨraamɨ simɨnye' lɨvalaabaka dɨke yabɨlɨngaka Aazakɨmɨ wɨla marapwɨyɨna yaka dɨka yabɨlɨngakevɨ a'badaa'nyɨ yɨlamaarakɨna yaka kwaari'mata maarɨna yaka dɨna “Nɨmɨ daakwɨma kwaari'mata dasɨ!” Kada' Gotɨyare ejelɨyai jaka wɨda' “Jɨwaalɨvɨ maramakɨnnera! ‘Dahaa' Evɨraamɨ nɨmɨrebwi yadelyɨra,’ daka Gotɨyai gɨmɨnyɨna yawɨ'mwa'.” Mi'na wɨdɨna kya' Evɨraamɨ tɨnna dara wanganake' “Jɨlɨkyaawaryarɨ yɨsɨkɨ gɨla'mwanna'na yɨwake' daaka!” Gawaalɨvɨ wɨlya' yaarɨna yaka gɨla'mwanna'dɨ'nyɨyai maarɨna yaka tamɨna yaka simɨnyevɨ yɨlamarakɨna yaka dɨka yɨra'na yaka Gotɨyarɨ wina ya'. Evɨraamɨ yɨleyagaala wɨda' “Dava Gotɨyai nejaavaderyaba.” Nabaai Gotɨyai Evɨraamɨmɨ jaka wɨda' “Nɨnnya yaya'na gɨthɨvanɨge' ‘Nyɨbwaalɨ' Aazakɨmɨ Gotɨyarɨna wɨjaavɨma!’ dɨwaanya'na gɨmɨre kaimɨraayara sɨlɨngaamɨnya yuyabɨsara kwala naanga naanga yɨrɨpɨ'derera. Yɨ kumɨ sara kunnya y’ kamaangeraavɨ maremwaaibɨ'derera. Yɨ kumɨnyɨna nɨmɨ a'mwe kwaakevakɨ mwaalyaraavɨne tewaanna yɨderera,” wɨda' Gotɨyai. Mi'na kuda' Evɨraamɨjɨ Aazakɨjɨ walaabɨna kyagi Evɨraamɨmɨre wawɨnya yadisaraalyɨ ayawɨ Bɨyazivana bɨna ye'.