Popular Bible Verses from Isaya 54

Share

Pele taakwe cilwisyo niciba comwe cibumbwa kukulwisya nduwe cikonzya kujana coolwe, andimi zyoonse zibuka kukubeteka uyoozipa mulandu, Nciceeco caabilo cabalanda ba-Jehova akululamikwa kwabo kuzwa kulindime, mbwaamba Jehova.

Zilundu zilakonzya kutantamuka, atulundulundu tulakonzya kusosoloka, pele luzyalo lwangu talukooyootantamuka kuzwa kulinduwe, acizuminano cangu caluumuno tacikooyoososoloka abuniini, mbwaamba Jehova uukufwida luzyalo.

Utayoowi pe, nkaambo tokooyoofwa insoni. Utakankami, nkaambo tokooyoofwisigwa bweeme. Uyooluba insoni yabwanike bwako, akusampaulwa kwabumukamufu bwako tokooyookuyeeya limbi.

Nkaambo mubumbi wako ngumulumi wako; izina lyakwe ngu-Jehova wamakamu. Uusalala wa-Israyeli ngumunununi wako; ngonguwe uuambwa kuti Leza wanyika yoonse.

Komezya kuntu nkuukede, amasani aatente lyacikalilo cako andandamikwe. Utayoowi kulampya intambo zyako akuyumya inkankamino zyako.

Bana bako boonse bayooiyisigwa Jehova. Ncobeni bana bako bayooba acoolwe cipati.

Bukali bwangu nibwakabuka, ndakasisa busyu bwangu kaindi, pele njookufwida luzyalo abuuya butamani, mbwaamba Jehova Munununi wako.

Ndakakuleka kaindi kaniini buyo, njookuboozya kulindime caluzyalo lupati.

Aya makani andibeda mbuli makani aamaanzi aa-Nowa. Mbubonya mbundakonkezya kuti maanzi aa-Nowa taakooyooboola limbi kuzoovumba nyika, mbubonya obo ndakonkezya kuti nsikooyookukalalila nikuba kukutapatila.

Insonge zyako nzooziyasya mabwe aasalala pyu, makoma aako nzooayasya mabwe aabekema, aalo malambo aako oonse azooyasigwa mabwe mayandisi.