Popular Bible Verses from Rom 8

Share

Amu ig doottem, Kayak Nug danab aun aɗi ag nuhignu oolag mauhtte, Nug kobol ena bekkunu ag ele uɗat hetteb. Nug aɗi bekkunu matu dabmeum amu, Nug amu dabmaama, ag onilagppa eum.

Amu da imu oolppa genab doottem. Ig Kristusnu oo mauhakppa daattem amunu, aɗitai keeke laa iinab amuppanu matakkigma. Ge, mauhak, o iitta bau dayak, o iitta engel ena ag, o ouɗi nau ag, o iitta gemu haen imu aɗi keeke bette, o iitta butti keeke aɗi aɗi bekku, o iitta aɗi keeke ɠagattag ele ag, o iitta aɗi keeke wan imu attannu, o iitta aɗi keeke wan imu honapnu, amu oh oolagppanu laippu laa nug ig Kayaknu oo mauhakppa daattem imuppanu iinab matakkigkkunu elele iinab daama. Genab, aɗi ohnab Kayak heum daatteb ele, amu oh oolagppa aɗi laippu laa nug Kayaknu oo mauhak, Nug Kristus Jesus, ihinig Naɗi, Nug nuhig mauhakppa amu ippunikkom ele amu, keeke laa oo mauhak nuhig amu ooppanu matakkigkkunu elele iinab daama!

Kayak Ouɗi Nug ele ig danab ig ɠagattag iitta ehanigtte. Ig aɗi keekenu unuqidkkunig amu, ig ii doottem, ig oonigppaib gaattem, ig miag matulta ii attem, amge Kayak Ouɗi Nug ig ehanikka, ihinignu Kayak unuqidtte.

Amunu ig Kayak keeke heum ele, amu ohnu ig aɗi aot akkunig? Ig inam aot akkunig. “Kayak Nug ig ehanigtte dayeb amu, laa nug ig kekeɗ mekka eɗigkku? Iitta!” aot akkunig.

Amunu danab ah ag Kristus Jesusnu daatteb, ag hipuninnu nob nau aoglagnu ii daatteb.

Danab nug oo alagnu keekenu dabmak anuqak awawa oitte, danab amu nug mauhkku. Danab nug Kayak Ouɗinu keekenu dabmak anuqak awawa oitte, danab amu nug bauklel awa, maɗoɗ daakku.

Amge keeke amu oh ig eɗigkkulagnu am elele iitta. Iitta. Kristus Nug haen oh ihinignu oo mauhtte amunu, ig kobol nau amu oh eɗadta autta aotta aottem.

Dahil dabmak okkainab, amuppa amu, da uug guittak ele ig gemu doottem dabmein, dimppa ig keeke ena ena aognig ele dabmein, dimppanu keeke ena ena ele ⌊amuam ig Jesus ele Kayak bekkod daat, nuhig keeke enanag aognig,⌋ da keeke amunu am keeke okkainab doyen, uug ig gemu doottem am keeke nakoknab bia doottem.

Ig Kristusnu oo mauhak ooppa daattem, amu aun nug amuppanu matakkikka aokku? Uug laate; o iitta oiyak ihinigppa keeke ig mawaknu uug doottem, amute; o iitta eheɗ heikkak, amute; o iitta enug haen, amute; o iitta keekenu tutu mak, amute; o iitta qagaiettak haen, amute; o iitta mauhak, amute, o amu oolagppan laa am Kristusnu oo mauhak ooppanu matakkikka aokkute? Iittanab!

Amu Kayak, Nug danab oo unuqagnab anidtte ele, Nug nuhig Ouɗinu unuqittak amu dootte. Aɗinu? Kayak Ouɗi Nug Kayaknu danab ah oppiaawak ele dilag unuqittak awa, Nug Kayak oo niitte bia amunu unuqidtte.

Aɗinu? Danab aun aɗi ag Kayak Ouɗi Nug ib ippuanatte, ag ib amu dim lamidtteb ele, ag am Kayak bekkod.

Danab ag oo alagnu kobolppa oitteb, ag oo alagnu keekenu dabmak anuqak aotteb, amge danab ag Kayak Ouɗinu kobolppa oitteb, ag am Kayak Ouɗinu kobol, ag amunu dabmak anuqak aotteb.

Nug Bekka ig megakkunu amu Nug amunu oo ii qe, Nug ig oh ehanigkkunu me uɗiom. Nug anam heum amunu geha, keeke laa oh ele amu, Nug ig iite megakku? Yo, Nug megakku.

Kayak Ouɗi Nug ig am Kayak bekkod daattem amu, Nug amu ippunigtte. Amu ig Kayak bekkod daattem dayeb, ig geha keeke Nug megakkunu dabmette ele aognig. Laa ele amu, Kayak Nug keeke Kristus medakkunu dabmette amu, ig Nug ele oh amu aognig. Yo, ig Kristus uug mawom, uug amu genab tuɗidta maognig dayeb, dimppa ig Nug hab aabppa dayak enanag awom ele, ig amu ele aognig.

Anam daattenu diig am, danab nug oo alagnu keekenu dabmak anuqak aotte ele, nug aakku Kayaknu kekeɗ daatte. Aɗinu? Nug Kayaknu ɗo waappa ii daatte, amu nug anam hekkunu ele, elele iitta

Amunu keeke oh Kayak hattom ele, keeke amu oh am, ig Kayak bekkod, ig geha miag atiak bekkunignu haen ameg mena, ikkilag human neegna daatteb.

Amu ig doottem, keeke ohnab Kayak hattom ele, ag daanna, ah nid menukkunu guittak doyaya aeqagatte, ag amubia henan daaegeg uɗie, gemu ele anamib henana daatteb