Popular Bible Verses from APALYNAH 12

Share

Tuu teitei thihnah thisai thongtah le a dawkhuinah pawhe bia thongtah aaning sahlo taco, ama cawh aa te myca. Aa hringnah peh zong sai he ka, thih zong aa ngang.

Mataico vaicung letah, “Kaa Khazing pachahnah le hmingtuakhynah le painah le a Khri nawhnuinah cawh atoheh a tling myca, zecawtamaw tatah kaa uny sahlo sua a putu he, ching le zai tah kaa Khazing hmekaw letei sua a putu he cawh heihly a cang myca.

Paribui alaipaw pui cawh heihly a cang. Ma paribui cawh khuahlai paribui, khachia a cang ly leh Setan tahpaw khah cang ka, khazaw pungpaluh lang a pavesah paw khah a cang. Ama le a vaiming sahlo cawh alui lang khah heihly a cang he.

Macawtaco naaning vaicung sahlo le a chung letei a ungpaw sahlo, a lawng myca o! Canghrasala, alui le rili cawh naa cing a ping, zemaw tah pawco Setan cawh naaning khatah a tlahthlah myca! Ama cawh a thing a ling tah a paling thlang, zecawtamaw tatah cai a cawngpe long ka hnui takhah a hni cawtah a cang,” tatah tahpaw o khah ka thui.

Taico vaicung letah rae a tho. Mikhal le a vaiming sahlo tah paribui khah dy he ka, paribui le a vaiming sahlo takhei aa dy hri hrah he.

Mataico, paribui cawh canuno cung leco a thingae ngetei ka, canuno a pathlah a tangpaw sahlo, Khazing biapeh nge he katei, Zisu a dawkhuipaw sahlo he khah rae dy rua pawtah a piathlah.

Khuarawha chuipaw paching pakhanah alaipaw pui sangkheh cawh avai letah a va lang. Canu pakheh cawh ning a hrei ka, thlawpaw cawh a phe rai letah ung ka, a lu letah esi sanghrawhluihning lukhu tah a khu. Ama cawh sawtei pho ka, a chai zaa ka, ny ung risaw khei a ysang.

Ma canu cawh mingphing vytei khah thaw cungcahrei tah a uh ruapaw he tah sawcapaw khah a sah. Taico a sawcapaw cawh pazah pahraw he ka, Khazing le a buidyching lang khah seikhui a cang. Canuno cawh Khazing tah ning 1260 chung mingkhai rua pawtah a pachia thahpaw raangcaa lang khah a sai.

Mataico, ahringpaw paching pakhanah a cangpaw paribui asaipaw alai ngeteipaw, lusarih hnui katei, a ki kihraw a hnuipaw, a lu maikaw letah builukhu a khupaw cawh avai letah a va lang. A lahme tah avai letei esi chythung chykheh khah cakhia hly he ka, alui lang a za thlah he. Taico, ma paribui cawh a chai a zapaw canuno a sawtei cawh a za pi cangkawleh e pawtah canuno a hme leco a daw thlang.

Canuno cawh raangcaa letei aa pachia pahpaw hminghmaw lang a zy nápawtah pahmupui a mathlaw sanghning khah peh cang ka, ma leco kung thung le a chy mingkai cang ka, paribui taco phah khy be. Mataico, paribui taco canuno cawh phohly ná seh tah ka, a kaw taitah tuivaw hratah tui a phuhly. Canghrasala alui taco canuno cawh a baw ka, a kaw ang ka, paribui tei a kaw taitah a papiapaw tuivaw tui khah a lang thlu.