Popular Bible Verses from Hébreux 11

Share

Ö vi tâ néwèi, wè ökâré vi târ̂î ka mör̂ö yè pâr̂â kââ ré é néwèi yè-è, ré pè ye vè avâr̂i pâr̂â kââ ré é da tö rhûû. É wê aʼvè e pâr̂â pâi béâr̂i mâ' xiréé, xè-i ké wê tö xar̂a xé-r̂é tâ néwèi.

Aè nè yè yèri tâ néwèi, nè bör̂i dö tâ cérè na ké yè e yè Bâô, wè na e na kâmö ré vi vè ubwa yè Bâô cè ki tâ néwèi, êr̂ê, dè ce rö, mâ dè ce ré dè nââ pè yadii yè pâr̂â kâmö ré vi mèyè-è vè mör̂ö.

Gèré rhîâgür̂ü xè-i tâ néwèi, êr̂ê, é wê yaxai pâr̂â kââ wânii xè-i nô i Bâô, aè é da yaxai pâr̂â kââ ré é tö rhûû xè-i pâr̂â kââ ré tö vèa.

Xè-i tâ néwèi, wè na pwêr̂êwaa-è na Abérahama, tèi ökâré é aʼyè-è cè ki vi na dèxâ névâ ré é yè ye nôâ yè-è; na bör̂i wê vi na ce na na da tâwai ökâré na vi nai. Xè-i tâ néwèi, wè na cuè vè döwöö rö névâ ré é aʼvè néxâi baayê ré da névâ xi-e, mâ tö pâr̂â mwââ mwââlöö, cur̂u ûr̂û-ré na Isaka mâ Iakobo, dua béé vi ye nôâ yè-è ré é êr̂ê baayê ma'ʼ.

Xè-i tâ néwèi, wè na rhu kwâ na Noa, mâ pè mör̂u mwââr̂ö xi-e, wè na pè bwayûi-e na Bâô xè-i pâr̂â kââ ré é da tö tö rhûû tèi cér̂é-é, na bör̂i bar̂a yè-è na ce, na bör̂i rhôôr̂u bwêê jë na ce xè-i tâ néwèi, é bör̂i ye nôâ yè-è târi ka mi xè-i tâ néwèi.

Xè-i tâ néwèi, é wê pè Énoka rua cè ki da tö rhûû pèii mé na ce, na da bör̂i tö vèa tëë, wè na wê pè xi-e rua na Bâô; wè é wê ye vè avâr̂i-e baayê tèi ökâré é da tö pè xi-e, êr̂ê, na kâmö ka e yè Bâô na ce.

Xè-i tâ néwèi, na vi ye êê pwaér̂ö yè Bâô na Abéla i pè nâânévâ ka vi kwéjî rai pè nâânévâ i Kaina; é ye vè avâr̂i-e xè-i, êr̂ê, na târi na ce, na ye vè avâr̂i-e na Bâô xè-i pâr̂â kwââvâr̂â xi-e; wè na wê mé na ce, aè na bâ pè aʼ-ré na ce rö-i pâr̂â kââ-ré.

Xè-i tâ néwèi, wè é kâyâi yè Sara cè ki pâr̂i-e na ké yè tâwé, na bör̂i ër̂i o yar̂i na na wê dö béâr̂i, wè na tâ néwèi êr̂ê na avâr̂i na ce ré êr̂ê vèa baayê ma'.

Wè na târ̂î na ce népèè névâ ka mör̂ö na kavèè ré na vâi mâ pè tömâ na Bâô.

Xè-i tâ néwèi, wè na wê kau na Mosé, na bör̂i viö i na ké mâ êr̂ê-ê, êr̂ê na o i pûr̂ûbwè i Farao na ce, aè na rhî vè e ké yè bwêêpë vèâ cér̂é ba i Bâô, rai ké yè vi or̂o wa yaané ré yè yèri vi bèr̂éé, na tâ néxâi na ce, êr̂ê, na dö lèèwi na ké mâ aʼvè yaané-é na pûû-é na Kérisö rai pâr̂â lèèwi xè Aigupito, wè na tarawaa i duö pièmè yè dö pè yadii. Xè-i tâ néwèi, wè na wê kâyâi Aigupito, mâ na da bar̂a i vi rhôê i ör̂ökau. Aè na tömâ vè mör̂ö, na ûr̂û ké tö rhûû xi-e ö ce ré é da tâwai tö rhûû.

Xè-i tâ néwèi, wè na nââ Isaka na Abérahama vè êê pwaér̂ö, tö ka waa yeyèè yè-è. Dè Abérahama ré wê cëi pâr̂â nô ré é êr̂ê vèa baayê, na bör̂i nââ o xi-e ka rhaaxâ rö vè êê pwaér̂ö.

Xè-i tâ néwèi, wè na da mé cér̂é vèâ pâr̂â kâmö paxa da tâ néwèi na Rahaba, bwè kui dö wêyê, xè-i ké cëi e xi-e duö kâmö ré é tùr̂ùwaa-r̂u na ka vi rhâwaa névâ.

Xè-i tâ néwèi, wè cér̂é tawarher̂e kar̂ö rhëë ka mii rö némèr̂i, cér̂é bör̂i rhâmâ köiwaa-r̂é na pâi xè Aigupito, aè cér̂é bör̂i wê mû.

Xè-i tâ néwèi, wè na wê bèi na pèyaa rö Iériko tèi nédèè ké vâr̂â pwânûr̂i vè kanii na ma kaar̂u nédaa.

Xè-i tâ néwèi, wè na waa Paséka mâ ké yangai ö i war̂a, koa-wi paxè kâmö xè Israèl na ö ce ré yè yö vè mii pâr̂â paxanii.

Xè-i tâ néwèi, wè na êr̂ê na Ioséfa nô né ké yè vi i pâlè Israèl, tèi ökâré nè yè wê mé na ce, mâ vi câwâ wa nô né pâr̂â juu-é.

Xè-i tâ néwèi, wè na aʼvui ko dulè Ioséfa na Iakobo, tèi ökâré nè yè wê mé na ce, na bör̂i tâ nôô ria rö gwâ mèèjö xi-e.

Xè-i tâ néwèi, wè na aʼvui ko Iakobo mâ Ésau na Isaka, wè na tâ néxâi pâr̂â kââ ré yè pwa mi.