Popular Bible Verses from IBERANI 11

Share

Puyan pengelan le, iaʹ ina puyan salet tekaʹ kimet le neng puyan iaʹ ilu nebelum ke uyan, ngan tugen tekaʹ le neng iaʹ ilu abeʹ un taʹan. Diaʹ lataʹ cen naʹaʹ iaʹ sihoʹ pengubaʹ Allah kuʹun pengelan nte.

Kelunan aheʹ pe abeʹ senteng ke niga kimet Allah buk ke abeʹ un pengelan. Moʹ aheʹ iaʹ nai ngejuma Allah, abeʹ e senteng are ngelan uba Allah iaʹ un, ngan ngelan uban Allah iaʹ naʹ bang me kelunan diaʹ mita ia.

Kuʹun pengelan ne ilu tisen uban langit ngan tanaʹ ini lepa nuyan kuʹun isiu Allah, idi puyan iaʹ ilu taʹan lepa nuyan cen puyan iaʹ ilu abeʹ senteng taʹan.

Kuʹun pengelan ne Ibrahim bayaʹ dau tegoʹ Allah mengin ia are. Penco Ibrahim tai palaʹ ca tanaʹ iaʹ Allah petuket ke naʹ mia. Kun ne mecin tanaʹ a tengen, mentung nge abeʹ un tisen kempi ia ukoʹ o ketai. Kuʹun pengelan ne Ibrahim mudip kuaʹ baʹan ca iaʹ nyakai neng tanaʹ iaʹ Allah lepa petuket naʹ mia. Kun ne mudip dalem lepau anit pun pemung ngan Isak ngan Yakup, moʹ ida dua kuaʹ alaʹ tuket ina cen Allah lete.

Kuʹun pengelan ne Nuh kenahan dau pulen Allah neng puyan iaʹ ke nuyan bayaʹ, iaʹ ia abeʹ un taʹan lepe. Nuh bayaʹ dau Allah, penco uyan ca kapen sungai iaʹ ukoʹ diaʹ pemanak ke pemung ngan ne ke mudip ʹo. Man puyan ne pekina Nuh mekun salaʹ neng kelunan kusun tanaʹ, kun ne alaʹ cen Tuhan Allah puyan peneneng iaʹ nai kuʹun pengelan.

Kuʹun pengelan ne Inuk abeʹ un matai, un sepuʹo ia tai kayang palaʹ Allah. Abeʹ un aheʹ senteng pita ia uban Allah lepa ngayang ia. Un dau Kitap badaʹ kuma ha, kena Inuk tai kayang kempau, ia iaʹ ban niga kimet Allah.

Uban kuʹun pengelan ne Habil mencai palaʹ Allah ca pencai liwa iaʹ pelapa tiga cen anun Kain. Uban kuʹun pengelan ne Habil iaʹ ban niga kimet Allah. Ca kelunan iaʹ teneng ne ia, uban Allah tengen iaʹ badaʹ seʹ e ubaʹ pencai ie. Moʹ kuʹun pengelan ne Habil caʹ pisiu ilu, naʹ pe ia lepa matai.

Kuʹun pengelan ne Ibrahim senteng tai nuyan ca amai, naʹ pe ia kaya laleʹ, ngan naʹ pe Sara tengen pe lua. Ibrahim petapi tawai ie palaʹ Allah iaʹ ke ngkang tuket te.

Moʹ Ibrahim iaʹ ngena lepoʹ iaʹ Allah nyedep ke uyan, iaʹ Allah ke medeng lete, iaʹ ina lepoʹ iaʹ un puʹun besun iaʹ salet pa majan.

Kuʹun pengelan ne Musa leko ke alaʹ ngadan anak amung neng anak Piraun tegoʹ o lepa bioʹ udip pe are. Kun ne lemileʹ tuyen pemung ngan kelunan diaʹ anun Allah neng ʹo bangen ne nuat le dalem penyalaʹ. Musa pekimet puyan dulu nyepuhoʹ ia kuʹun Keristus, ngan kuma tiga kuʹo ne bang cen puyan ina tegoʹ o pata ha ngan bang cen puyan mung pengekayaʹ lepoʹ Masir are. Un pekina dau Musa uban ne nyalet taʹat te neng bang iaʹ ia ke un bayaʹ. Kuʹun pengelan ne Musa mecin tanaʹ Masir, ngan abeʹ un takut tekaʹ kuʹun iʹa laja. Koʹ baʹan puyan ne taʹan Allah iaʹ mata le abeʹ senteng taʹan, ina ukoʹ o abeʹ un dayo tai ngeliwet.

Kuʹun pengelan ne Ibrahim mencai anak ke Isak ca pencai liwa tegoʹ Allah ten ia are. Naʹ pe ngan Ibrahim Allah uyan tuket te, Ibrahim lete iaʹ tenup tekaʹ ke mencai anak ke ca liwa.

Kuʹun pengelan ne Rakap, leto pedayang ina, abeʹ un matai pemung ngan dulu diaʹ muau neng Allah are. Uban Rakap iaʹ alaʹ kelunan melip, ngan selama dau neng ida.

Kuʹun pengelan ne lepoʹ Israil tai pelawat Banget Bala kuaʹ baʹan masat kaʹ tanaʹ re. Tegoʹ lepoʹ Masir ten ketai bayaʹ ida, penco sungai nampun ida.

Kuʹun pengelan ne iaʹ ukoʹ kerahan batu lepoʹ Yeriko mapeʹ uʹo lepa lepoʹ Israil tai masat teliling nge dalem tujoʹ tau are.

Kuʹun pengelan ne Musa nading ke nyalet Bunut Paska, ngan cuk dulu migai dahaʹ neng pamen nte, apan Melikat Patai abeʹ un lematai diaʹ anak ading kelunan Israil are.

Kuʹun pengelan ne Yusup pisiu neng puyan lepoʹ Israil ke buau cen tanaʹ Masir. Kun ne badaʹ kumpin tuk puyan nte neng tulang patai ie. Mung dau ina ia pisiu tegoʹ o kece ke matai.

Kuʹun pengelan ne Yakup naʹ peniga me anak Yusup de dua padeʹ kena ha ke matai. Kun ne nyegayau neng sekut te, mentung lemameʹ Allah.

Kuʹun pengelan ne Isak petuket ke naʹ peniga iaʹ kenai bayaʹ, palaʹ Yakup ngan Isau.