Popular Bible Verses from Hpeu‸maˍ ve li‸ 11

Share

Oˇ htaˇ, mvuhˇ naw ma tcuh yaˇ suhˍ gʼaˇ teˇ gʼaˇ behˬ heh ma meuˆ ve teˇ yanˇ, mvuhˇ naw ma hkʼoˆ lo bvuhˬ jaˇ ve awˬ hkawˇ teˇ hpaˍ tawˆ la leh kʼoˆ ve, Miˬguiˬ ve mvuhˇ miˬ lehˬ, ngaˬ hui ve Jawˇmawˇ Gʼuiˬsha ve mvuhˇmiˬ leh yawˇ ve Hkri‸ ve mvuhˇ miˬ hpeh‸ la peuˬ. Yawˇ lehˬ co co taiˍ taiˍ uˉ peunˍ tuˬ yoˬ teh‸ kʼoˆ ve yoˬ.

Mvuhˇmiˬ teˇ hpaˍ nyi ma zuhˆ jaˇ leh, nawˬ htawˇ nyi ma zuhˆ la peuˬ. Suh taˍ peuˬ ve chaw teˇ hpaˍ hta‸ suhˉ jehˬ tuˬ awˬ yanˇ gaˬ la peuˬ. Nawˬ ve awˬ ceˬ hpeh‸ ve tcuh kaˍ paˍ teˇ hpaˍ hta‸ maˇ kʼoˆ, Hkri‸ yaˇ teˇ hpaˍ hta‸ maˇ kʼoˆ, nawˬ ve awˬ meh hta‸ yawˆ yan ve, uiˍ ve i ve chaw hkʼa peu-eˬ hta‸ maˇ kʼoˆ, awˬ bon piˇ tuˬ awˬ yanˇ gaˬ la peuˬ. Miˬguiˬ hta‸ te luˬ ve chaw teˇ hpaˍ hta‸ te luˬ piˇ tuˬ ka‸ awˬ yanˇ gaˬ la peuˬ, teh‸ kʼoˆ ve yoˬ.

Ngaˬ ve shaˉ hkiˆ hkanˍ shehˍ hpaˇ nyiˇ gʼaˇ hta‸ ngaˬ kanˇ paˆ piˇ leh, yawˇ huiˉ maˬ lehˬ meh htuˉ pui hpa hta‸ veu‸ deh leh, teˇ hinˉ nyiˇ ha hkaw‸ chi nyi hkʼa gaˬ Gʼuiˬsha ve tawˇ hkawˇ maˍ piˇ tuˬ yoˬ teh‸ kʼoˆ ve yoˬ.

Shehˆ nyi teˇ sha gʼuˇ ponˬ peuˬ hkʼaw‸ nawˉ, Gʼuiˬsha awˬ hkʼaw lo tawˆ la ve a sha‸ te‸ piˇ lawˬ ve awˬ shaˉ yawˇ huiˉ maˬ awˬ hkʼaw lo lo‸-e leh, yawˇ huiˉ maˬ tu huˉ ve yoˬ. Yawˇ huiˉ maˬ hta‸ gʼa mawˬ ve chaw hui lehˬ, kawˆ jaˇ ve yoˬ.

Yawˇ huiˉ maˬ lehˬ, Gʼuiˬsha ve tawˇ hkawˇ maˍ chehˇ ve awˬ yanˇ awˬ hkʼaw lo, mvuhˇ yeˬ maˇ laˬ tuˬ mvuhˇ naw ma hta‸ hoˆ taˍ tuˬ ve kanˇ paˆ cawˬ ve yoˬ. Iˉ kaˆ teˇ hpaˍ hta‸ awˬ suhˍ hpeh‸ la piˇ lawˬ tuˬ ka‸ kanˇ paˆ cawˬ ve yoˬ. Yawˇ huiˉ maˬ hkʼaˬ nyiˇ pawˆ te gaˇ ve ka‸, fawˉ mehˍ tuˬ ve teˇ ceuˬ le le miˬguiˬ hkʼoˆ gaˬ la piˇ tuˬ ve htawˇ kanˇ paˆ cawˬ ve yoˬ.

Yawˇ huiˉ maˬ lehˬ, miˬguiˬ ve Awˬ shehˍ hpaˇ mehˆ gʼuˇ suhˍ lo cawˬ taˍ ve shaˍlonˍ cehˬ nyiˇ cehˬ hpeh‸ leh, kawˆ faiˇ nyiˇ maˬ hpeh‸ ve yoˬ. Chaw teˇ gʼaˇ gʼaˇ yawˇ huiˉ maˬ hta‸ naˬ tuˬ te gaˇ ve kʼo, yawˇ huiˉ maˬ ve maw‸ kʼaw awˬ hkʼaw lo aˬ miˍ tawˆ la leh, canˇ paˍ teˇ hpaˍ hta‸ to‸ baˬ tuˬ yoˬ. Chaw teˇ gʼaˇ gʼaˇ yawˇ huiˉ maˬ hta‸ naˬ tuˬ te gaˇ ve kʼo, oˇ hkʼe gʼa suh tuˬ yoˬ.