Popular Bible Verses from Heˍbrehˇ li‸ 11

Share

Yonˍ ve teˇ ceuˬ hta‸ pa taw, ngaˬ hui dawˇ law taˍ ve teˇ hpaˍ hta‸ awˬ tehˬ awˬ na gʼa tuˬ ve hta‸ maˇ kʼoˆ, ngaˬ hui maˇ mawˬ sheˍ ve awˬ ceuˬ teˇ hpaˍ awˬ tehˬ awˬ na cawˬ taˍ ve hta‸ maˇ kʼoˆ, ngaˬ hui hkʼa deh‸ deh‸ shiˍ taˍ ve yoˬ. Aˍ sho-eˬ htaˇ ve chaw teˇ hpaˍ yonˍ ve pa taw, Gʼuiˬsha yawˇ hui hta‸ nyi hkʼaˇ suh ve yoˬ.

Chaw yaˇ lehˬ, yonˍ ve teˇ ceuˬ maˇ cawˬ ve kʼo, Gʼuiˬsha nyi hkʼaˇ suh tuˬ te maˇ gʼa. Awˬ lawn kʼo, Gʼuiˬsha geh jiˆ kʼai ve chaw lehˬ, Gʼuiˬsha cawˬ ve hta‸ maˇ kʼoˆ, yawˇ hta‸ ca ve chaw hui hta‸ awˬ bon piˇ ve hta‸ maˇ kʼoˆ, yawˇ gʼa yonˍ ve yoˬ.

Gʼuiˬsha ve tawˇ hkawˇ hta‸ pa taw sha hpa‸ laˬ hpa‸ htaˆ hkʼa peu-eˬ hpeh‸ la ve hta‸ ngaˬ hui gʼa shiˍ ve lehˬ, ngaˬ hui yonˍ ve hta‸ pa taw yoˬ. Hkʼe te leh, ngaˬ hui gʼa mawˬ ve awˬ ceuˬ teˇ hpaˍ lehˬ, maˇ mawˬ ve awˬ ceuˬ teˇ hpaˍ awˬ hkʼaw lo tawˆ la ve hta‸ ka‸ ngaˬ hui gʼa shiˍ ve yoˬ.

Aˍbraˍhanˍ lehˬ yonˍ ve hta‸ pa taw, yawˇ awˬ shinˉ gʼa tuˬ ve mvuhˇmiˬ lo kʼai tuˬ Gʼuiˬsha yawˇ hta‸ kuˬ ve teˇ yanˇ, hkʼaˬ lo gʼa kʼai tuˬ ve hta‸ yawˇ maˇ shiˍ htawˇ na yuˬ leh kʼai ve yoˬ. Yonˍ ve hta‸ pa taw, yawˇ gʼa tuˬ ve mvuhˇmiˬ awˬ hkʼaw lo, shu mvuhˇmiˬ hkʼaw ca chehˇ ve chaw hkʼe yawˇ hkehˉ chaw te chehˇ ve yoˬ. Yawˇ geh teˇ geh mvuhˇmiˬ oˇ ve hta‸ gʼa tuˬ ve Iˉcaˆ leh Yaˍkoˆ hui geh aˉ po kʼo teˇ hpaˍ awˬ hkʼaw lo yawˇ chehˇ taˍ ve yoˬ.

Noˉa‸ lehˬ yonˍ ve hta‸ pa taw, maˇ hpeh‸ la sheˍ ve awˬ ceuˬ teˇ hpaˍ awˬ lawn Gʼuiˬsha yawˇ hta‸ hto piˇ maˍ piˇ ve teˇ yanˇ, yawˆ yan ve awˬ hkʼaw lo na yuˬ leh, yawˇ ve yehˬ yaˇ kʼa yaˇ teˇ hpaˍ gʼa ponˬ tuˬ, yawˇ haw lo‸ kʼoˍ te ve yoˬ. Chi hkʼe yonˍ ve awˬ hkʼaw lo, yawˇ miˬguiˬ yaˇ hui hta‸ suhˉ taˆ leh, yonˍ ve hta‸ pa taw hteˇ ve cawˇ ve teˇ ceuˬ hta‸ gʼa ve yoˬ.

Eˇnawˆ lehˬ, yonˍ ve hta‸ pa taw suh ve teˇ ceuˬ hta‸ maˇ gʼa hkanˍ tuˬ Gʼuiˬsha yawˇ hta‸ mvuhˇ naw ma lo yuˬ taˆ-e ve yoˬ. Gʼuiˬsha yawˇ hta‸ yuˬ taˆ-e ve pa taw, shu yawˇ hta‸ ca maˇ mawˬ. Gʼuiˬsha yawˇ hta‸ maˇ yuˬ taˆ-e sheˍ htaˇ, Yawˇ hta‸ ngaˬ nyi hkʼaˇ suh ve yoˬ teh‸ Gʼuiˬ sha shaˉ hkiˆ hkanˍ ve yoˬ.

Aˍbeˍlaˆ lehˬ, yonˍ ve awˬ hkʼaw lo, Kaˍiˉnaˆ ve tanˇ tuˬ a‸ kehˉ da‸ ve tanˇ tuˬ Gʼuiˬsha hta‸ tanˇ piˇ ve yoˬ. Yawˇ ve la‸ shawnˍ teˇ hpaˍ hta‸ Gʼuiˬsha ha‸ yuˬ ve pa taw, yawˇ hteˇ ve cawˇ ve chaw hpeh‸ ve yoˬ teh‸, Gʼuiˬsha yawˇ awˬ lawn shaˉ hkiˆ hkanˍ ve yoˬ. Hkʼe te leh, Aˍbeˍlaˆ suh peuˬ htawˇ, yonˍ ve oˇ ve hta‸ pa taw yawˇ tawˇ yaw chehˇ sheˍ ve yoˬ.

Saˍraˇ htawˇ yonˍ ve hta‸ pa taw, yaˇ hu ve awˬ yanˇ leh peuˬ ve htawˇ, yawˇ yaˇ hu gʼa ve yoˬ. Awˬ lawn kʼo, ka ti‸ piˇ shehˍ hpaˇ lehˬ, ka ti‸ yeˬ ve yoˬ teh‸ yawˇ dawˇ taˍ ve yoˬ.

Awˬ lawn kʼo, Gʼuiˬsha kawˍ taˍ te taˍ ve, awˬ hkuiˉ puiˍ yeˬ jaˇ ve venˇ hta‸ yawˇ dawˇ law chehˇ ve yoˬ.

Moˉseˍ lehˬ yonˍ ve hta‸ pa taw, yawˇ uiˍ la ve teˇ yanˇ htaˇ, Hpaˍrawˇ yaˇ miˇ ve awˬ yaˇ paˍ teh‸ kʼoˆ ve hta‸ yawˇ maˇ hkanˍ gaˇ. Teˇ tcuhˉ teˇ yanˇ venˇbaˆ awˬ hkʼaw ha lehˬ chehˇ ve a‸ kehˉ Gʼuiˬsha ve awˬ yaˇ awˬ duˬ teˇ hpaˍ geh hkʼa geh gʼa tu‸ gʼa hkanˍ tuˬ ve hta‸ yawˇ leuˉ leh heuˆ gaˇ ve yoˬ. Hkri‸ awˬ pon gʼa tu‸ gʼa hkanˍ ve teˇ ceuˬ lehˬ, Eˇjiˇtu‸ mvuhˇmiˬ awˬ hkʼaw lo cawˬ ve da‸ jaˇ ve mawˇ jeˬ a‸ kehˉ leuˉ leh awˬ hpfuhˇ hkʼaˆ jaˇ ve teˇ ceuˬ hpeh‸ ve teh‸, yawˇ dawˇ taˍ ve yoˬ. Awˬ lawn kʼo, yawˇ gʼa tuˬ ve la‸ shawnˍ hta‸ yawˇ chiˇ nyi tcuhˉ taˍ ve yoˬ. Yonˍ ve hta‸ pa taw, hkunˉ hawˉ hkanˇ nyi ma zuhˆ ve hta‸ yawˇ maˇ kawˆ leh, Eˇjiˇtu‸ mvuhˇmiˬ awˬ hkʼaw lo tawˆ kʼai ve yoˬ. Awˬ lawn kʼo, mawˬ maˇ hpeh‸ ve teˇ gʼaˇ hta‸ mawˬ taˍ ve hkʼe te leh, yawˇ nyi ma yeˬ ve yoˬ.

Aˍbraˍhanˍ lehˬ, yonˍ ve hta‸ pa taw, Gʼuiˬsha yawˇ hta‸ lawˇ nyi ve teˇ yanˇ, yawˇ Iˉcaˆ hta‸ yuˬ leh tanˇ piˇ ve yoˬ.

Meh maˬ lanˉ Raˍhaˆ lehˬ, yonˍ ve hta‸ pa taw maˇ na yuˬ ve chaw teˇ hpaˍ geh maˇ gʼa luˬ. Awˬ lawn kʼo, jaˆ nyi shehˍ hpaˇ teˇ hpaˍ hta‸ yawˇ ha lehˬ ha kʼa ha‸ yuˬ ve hta‸ pa taw yoˬ.

Yonˍ ve hta‸ pa taw, Iˉsaˍreˍlaˆ chaw teˇ hpaˍ lehˬ goˇ lehˍ ve miˬguiˬ hkʼoˆ hta‸ juˇ kʼai ve hkʼe, Laˇ tsuhˇ gʼuiˬ nyi hta‸ hkanˍ kʼai ve yoˬ. Ya‸ hkʼaˇ Eˇjiˇtu‸ chaw teˇ hpaˍ oˇ ve hkʼa shuˍ shuˍ hkanˍ kʼai chehˇ ve teˇ yanˇ, kʼa suh peuˬ ve yoˬ.

Yonˍ ve hta‸ pa taw, Iˉsaˍreˍlaˆ chaw hui Yeˍriˆhkoˇ venˇ hta‸ suhˍ nyi caw peuˬ hkʼaw‸ nawˉ, lanˇ venˇ paˆ ce ve yoˬ.

Yaˇ uiˍ teˇ hpaˍ hta‸ te luˬ shehˍ hpaˇ lehˬ, yawˇ hui hta‸ maˇ gʼa htawˇ tuˬ, Moˉseˍ yawˇ yonˍ ve hta‸ pa taw, Paˍsaˍhkaˍ pawehˇ te leh awˬ suhˍ hpeh‸ pfuhˍ taˍ ve yoˬ.

Yoˇseh‸ lehˬ yonˍ ve hta‸ pa taw, yawˇ ve a sha‸ leh la paˇ neˇ ve teˇ yanˇ, Iˉsaˍreˍlaˆ chaw teˇ hpaˍ gʼa tawˆ kʼai tuˬ ve awˬ lawn hto piˇ leh, yawˇ ve awˬ mu‸ ku hta‸ hkʼaˬ hkʼe te tuˬ ve awˬ lawn yawˇ tawˇ piˇ taˉ ve yoˬ.

Yaˍkoˆ lehˬ, yonˍ ve hta‸ pa taw, suh la paˇ neˇ ve teˇ yanˇ, Yoˇseh‸ ve yaˇ paˍ nyiˇ gʼaˇ hta‸ bon na‸ piˇ leh, yawˇ ve juˇ fuiˍ awˬ meuˇ awˬ hkʼoˆ boˆ taˍ leh Gʼuiˬsha hta‸ oˉ kʼoˍ pui ve yoˬ.

Iˉcaˆ lehˬ yonˍ ve hta‸ pa taw, Yaˍkoˆ leh Iˉsawˇ hta‸ awˬ hkʼaw‸ nawˉ gʼa tuˬ ve awˬ bon na‸ piˇ taˍ ve yoˬ.