Popular Bible Verses from Isaias 54

Share

Walay hinagiban nga gihimo sa pagpakigbatok kanimo ang makaunsa kanimo. Matubag mo ang mga sumbong batok kanimo. Mao kini ang panulondon sa akong mga alagad; molaban ako kanila. Ako, ang  GINOO, ang nag-ingon niini.”

Bisag mangatumpag pa ang mga bukid ug mga bungtod, ang akong gugma magpabilin, ingon man ang akong kasabotan uban kaninyo nga panalanginan ko kamo. Ako, ang  GINOO nga naluoy kanimo, ang nag-ingon niini.

“Ayaw kahadlok, kay dili ka maulawan. Malimtan mo na gayod ang kaulawan sa imong pagkabatan-on ug ingon man sa imong pagkabalo.

Kay ako nga imong Magbubuhat mahimong ingon sa usa ka bana kanimo. Makagagahom nga GINOO ang akong ngalan. Ako, ang Balaan nga Dios sa Israel mao ang imong Manluluwas. Gitawag ako nga ‘Dios sa tibuok kalibotan.’

Padak-i ug lig-ona ang imong puloy-anan. Ayaw pugngi ang pagpalapad niini.

Ako mismo ang motudlo sa imong katawhan, ug magmauswagon gayod sila pag-ayo.

Tungod sa labihan kong kapungot kanimo, gitalikdan ka nako sulod sa mubong panahon. Apan tungod sa akong walay kataposang gugma, kaloy-an ka nako. Ako, ang  GINOO nga imong Manluluwas, ang nag-ingon niini.

Sa mubong panahon gibiyaan ka nako, apan sa dakong kaluoy kuhaon ka nako pag-usab.

“Alang kanako, sama kini sa panahon ni Noe diin nanumpa ako nga dili na gayod molunop dinhi sa kalibotan. Ug karon, nanumpa usab ako nga dili na gayod ako masuko o mosilot kanimo.

Gamiton ko ang mga batong rubi alang sa imong tore, ug ang matahom nga mga bato sa paghimo sa imong mga pultahan ug mga paril.