Popular Bible Verses from Yap 14

Share

Kơnơ̆ng anăm tơgŭ pơkơdơ̆ng glaĭ hăng Yahweh ôh. Laih anŭn anăm huĭ kơ ƀing mơnuih amăng anih lŏn anŭn ôh, yuakơ ƀing ta či blah dưi hĭ kơ ƀing gơñu yơh. Tơlơi pơgang ƀing gơñu đuaĭ hĭ thĕng laih, samơ̆ Yahweh dŏ hrŏm hăng ƀing ta. Anăm huĭ kơ ƀing gơñu ôh.”

‘Yahweh akaih hil, thâo khăp laih anŭn pap brơi kơ tơlơi soh hlơi pô pơkơdơ̆ng glaĭ hăng Ñu. Samơ̆ Ñu ƀu či lui hĭ tơlơi soh ƀu tŭ tơlơi pơkơhma̱l ôh; Ñu či phak pơkra ƀing ană tơčô kơ tơlơi soh ƀing ơi adon ƀing gơ̆ truh pơ rơnŭk tal klâo tal pă̱ yơh.’

Tơdah Yahweh mơak hăng ƀing ta, Ñu či ba ƀing ta mŭt amăng anih lŏn anŭn, jing anih hơmâo gơnam hiam kar hăng ia tơsâo laih anŭn ia hơni, hăng brơi hĭ anih lŏn anŭn kơ ƀing ta yơh.

Samơ̆ ding kơna Kâo Kaleb jing pô hơmâo bơngăt jua phara laih anŭn đuaĭ tui Kâo hăng abih pran jua, tui anŭn Kâo či ba ñu mŭt amăng anih lŏn ñu mŭt laih, wơ̆t hăng ƀing kơnung djuai ñu či tŭ mă mơ̆n.

Tui anŭn, laĭ kơ ƀing gơñu bĕ, ‘Yahweh pơhiăp: Kâo ƀuăn rơ̆ng ƀơi tơlơi hơdip Kâo, sĭt Kâo či ngă kơ ƀing gih hơdôm tơlơi Kâo hơmâo hơmư̆ laih ƀing gih pơhiăp brŏk anŭn yơh

Yahweh pơhiăp hăng Môseh, “Hơdôm sui dơ̆ng ƀing mơnuih anai djik djak kơ Kâo lĕ? Hơdôm sui dơ̆ng ƀing gơñu hơngah ƀu đaŏ kơnang amăng Kâo wơ̆t tơdah ƀing gơñu ƀuh laih abih bang khul tơlơi mơsêh mơyang Kâo hơmâo ngă laih amăng ƀing gơñu lĕ?

Abih bang ƀing Israel pơhiăp brŏk pơkơdơ̆ng glaĭ hăng Môseh laih anŭn hăng A̱rôn; tui anŭn abih bang ană plei laĭ kơ ƀing gơ̆, “Hiam hloh ƀing gơmơi hơmâo djai hĭ laih amăng čar Êjip anŭn! Ƀôdah ƀing gơmơi djai hĭ bĕ amăng tơdron ha̱r anai!

Yôsua ană đah rơkơi Nun laih anŭn Kaleb ană đah rơkơi Yephunneh, jing amăng ƀing kơnuă kơsem lăng anih lŏn, hek ao gơñu yuakơ rơngot hơning, laih anŭn ƀing gơñu laĭ hăng abih bang ƀing Israel tui anai, “Anih lŏn ƀing gơmơi găn nao laih kiăng kơsem lăng anŭn jing anih kơmơ̆k hiam biă mă.

Wơ̆t tơdah tui anŭn, Kâo ƀuăn rơ̆ng ƀơi tơlơi hơdip Kâo hơdip nanao laih anŭn ƀơi tơlơi ang yang Kâo amăng abih lŏn tơnah, Kâo pơsĭt tui anai: Amăng abih bang ƀing hlơi pô ƀuh laih tơlơi ang yang hăng khul tơlơi mơsêh mơyang Kâo hơmâo pơrơđah laih amăng čar Êjip laih anŭn amăng tơdron ha̱r, samơ̆ hlơi pô ƀu tui gưt kơ Kâo laih anŭn lông lăng Kâo pluh wơ̆t, sĭt ƀu hơmâo sa čô amăng ƀing gơñu ôh či ƀuh anih lŏn Kâo hơmâo ƀuăn rơ̆ng laih hăng ơi adon gơñu. Ƀu hơmâo ôh hlơi pô djik djak kơ Kâo či ƀuh anih lŏn anŭn.