Popular Bible Verses from Ane rom, echî 6

Share

Echî é rî sê orʉrí mbi nne a kí fon ka obhí eyimím a ri ekʉ̂. Kən ekəp nji Obhasi á kará ane a ri ekpin ótúm-ótúm, kpe ejûm á bhó bhəp, ka é chəm biji na Ntûfâm owəré Jisos Krayis.

Ka ekpak njí, obhí ó bhó kpo fon ikom na ekpin ejə́né. Echî aŋ? Ó chəbhe ên na ekpin, é dʉ̂ ka obhô onobhá-eji Obhasi, ka obhô ebhín asík.

Ḿfa nâ e ri bəre ebhú e fúghi ayép, e chə̂m Jisos Krayis ka ekʉ̂, e gyê na yê ka oyəm. Echî é rî sê e kí fon ekpin efê na yê ka ekpak Obhasi Ńsé, ka ekpatə́m ikom ifê, a yimî yê a nyə́me ka ekʉ̂.

Nne a kâ kâm se eyô-biji ejê é jóe a ri ejûm ebhí noŋ ejûm enok nji é kí kak obhí ikom. Deê é jóe ejûm enok, é nôk enok é káre Obhasi ka nnyen-i-mbá. Karê ên biji mbâ Obhasi noŋ ane mba á kpo kən Obhasi a chə́bhe njəm a sʉ̂k ábho.

É məŋe sê etəm ekpin ejə́ré, á kum ka ego na Jisos Krayis sê á yúí ekpin obhí njí, á yíghi êt ka osʉ́ŋ obhí.

Ka ekpak njí, deê ó mə́ŋe ên sê obhí ó ká kpo fon ikom ka ekpin ejə́né. Ó chəbhe ên ka ekpin na Obhasi ka obhô ó chəm ên na Jisos Krayis.

Nâ é fap mân sê jen? É kə́t e yimá obhí e jak ochî sê é yîm onobhá-eji Obhasi ó súí a? Áno asík! Ka ebhú áji, obhí ó fon ikom ka ekpin ejə́ré, kən mfá-mfá, ikom áfi kpó cháŋ. Nâ e kâ kpô yimâ ên mân obhí ka ekpin ejə́ré.

Ó məŋe ên sê ó nok ó gbô osʉ́ŋ ó káre nne se ó tʉ́k yê, o yúghá yê, ó chəbhe nsʉ́ŋ i nne ányo. Ó bhó gbo osʉ́ŋ ebhú jə́t o káre obhí mbi ó kí choe wâ ó kâk ka ekʉ̂, o gbô fə́ne o káre Obhasi, o yúghá yê se a kó ekpin ejâ se é rî ka nnyen-i-mbá.

Ka ebhú áji o ri ên ka osʉ́ŋ obhí, kən deê é kúp Obhasi nono nji ó top ên mfoné nchot eye na ḿbə́ŋé-a-ḿbə́ŋé. Mfoné nchot nnyi o yéne ên ka achot mma e kpíi ên. Ka obhô mbí, Obhasi a yíghi ên ka osʉ́ŋ obhí se ó gbô ên a ri osʉ́ŋ ó káre ekpin nji é rî ka nnyen-i-mbá.