Popular Bible Verses from Ane rom, echî 12

Share

Deê nne a kâ kpô tóp ekpin í ngun nnyí. Deê Obhasi a yóŋé ên ḿbə́ŋé, a yim ên o kérá ên ekpak etat nji fê. Ka ekpak njí, tîk o gáe ên o yên ên ejûm nji Obhasi a wóme. Tîk o yên ên fə́ne ejûm nji é kí joé nono, é gyebhá yê ka ḿbə́ŋé, é rî fə́ne ka mfoné mbá.

Atem-abhon-í-nnyen, ka achot mma é yuk nná fép, n kí goré ên mân bəre ka obhô ekpatə́m í nsôn nnyi Obhasi a riî êt, deê ó káre ên biji ibhə́né mbâ eye. Karê ên biji ka ekpin ejə́né mbâ Obhasi noŋ kpe mbúi nnyi á kíi sê á yîm efin. Yim ên ka ekpak é kí gyebhé yê ka ḿbə́ŋé, nne a kâ fôn kpe akôp ka ochî obhê. Nâ mfoné-mfoné ejík nji Obhasi a wóme.

Deê o kâ yíghi ên ḿbə́ŋé sê Obhasi a rô yim nji a chimî. Fon ên ogyebhá-ḿbə́ŋé ka ḿbə́ŋé nnyi ó kik ên nná. Deê nne a kə́p ḿbə́ŋé ka kpe bhaghé oseŋe mbi ó tə́ma yê. Gorê ên Obhasi chénchén ebhú.

Nne a kâ kâm se obhí ó fôn érûm ka ekpin ejê, kən deê nne a kó ono a nok na obhí a fon érûm.

Tóŋe ên mfoné-mfoné okot na atem noŋ abhon-í-nnyen mba Jisos Krayis. Ntem a jíghí ntem na ogyebhá-ḿbə́ŋé.

Deê okot obhə́né na atem ó jóe ḿbə́ŋé yə́t. Maghê ên obhí, fiî ên ka onono.

Ka ibhâ biji, nok nnyen enoghóm se ó kúmi ên ka ekone na chénchén ane.

Atem í ḿbə́ŋé, nne a kâ dî ntem nkáŋ. Maghê Obhasi a yám ḿbə́ŋé na ntʉ́ghi nne ányo. We ka yám. Ka ekpak nji á séŋe sê, “Ńtâ Obhasi a chími se, ‘Nkáŋ edíím a ri mme nâ m fonê, tîk n yîm ábho m fê.’ ”

Nne a kâ kâk ojan ka etûm í Ńtâ Obhasi, yim etûm ejê na ḿbə́ŋé eya fép.

Ka onobhá-eji mbi Obhasi a karê ə̂m, n kí choe kpe nnyón nne owəné bəre a kâ kô biji se yê a chíŋi abhô. Deê ó kó ên ekpak ekəp nji Obhasi a karê ên ka ḿbə́ŋé nnyi o kíi ên na yê, ó mə́ŋe ên nji é bhíghi na ên.

Ájoé nne a yîm wâ obhí, deê o kâ yîm yê ó fé. Yim ejûm nji chénchén ane á kí yen sê é rî nono.

Joê ên ka onobhá-eji na chénchén atem-abhon-í-nnyen, kpe á rî nan. Ka yûŋ ên biji, chəm ên biji na ane mba á kí kep sê a ri ane chichi. O kâ kére ên sê ó məŋe ên ó chiŋ.

Kən á kpô séŋ sê, “Ájoé nne-ebhan owa, njaé a kí yam yê, karê yê édî. Ájoé ayép á kí kot yê, wôm ayép karê yê a gwó. Ó yim ka ekpak njí, echî é kí yup yê ekpatə́m.”

Nne á timi ên obhí, deê o kâ súri ên yê ajom, gorê ên a ri Obhasi a karé ntʉ́ghi nne ányo enare. Deê ó gyébhe ên ḿbə́ŋé eróŋ na atem mba á rî ka ogyebhá-ḿbə́ŋé. Ka mághe ên atem ka nchot a tə̂m ábho.

Ó fon, ntem á ka fon, deê ó nyáŋé yê a fon. Fiî ên ajéné na ogyebhá-ḿbə́ŋé.

Ka ekpak njí, biji nne í fóne ayô etî-etî, kpe njə́n eyô é fôn obhê obhô etûm. Nâ noŋ fə́ne êt fép é kpê na Jisos Krayis é chəm noŋ ayô ka biji bhə́t, kpe njə́n eyô é ji kone na ntem.