Popular Bible Verses from Isaya 41

Usitje ngoti imi ndinawe, usitemeke mafupa ngoti ndi Ndzimu uwo. Ndowokusimisa, ndowokubhatsha. Ndowokutabila nge luboko gwangu gwakalulwama gwe luji.

Ngoti imi Yahwe Ndzimu uwo ndakakubhata nge luboko gwe luji. Ndimi ndinokudwa nditi, “Usitje, ndowokubhatsha,”

Bona, bose bakakugwadzila moyo banowobhakhwa nge shoni bakashushubala. Banogwa nawe, abatowobe tjimwe ngono banowoloba.

Ndakakutola ku phelelo dze shango, ndakakudana kudwa mu midzibo ikule nditi, “Iwe unlanda wangu, ndakakushalula, andizokulashila kutjena.”

Unowobashaka ibabo banogwisana nawe, koga awutowobawana, ibabo banogwa nawe abatowonga tjimwe.

Usitje iwe gonye Jakubo, imwi balume be Iziraela, ngoti imi ndowomubhatsha. Koleba Yahwe. Ndzutunuli wenyu, Wakayengemala we Iziraela.

Koga iwe Iziraela, nlanda wangu, iwe Jakubo wandakashalula, ludzi gwa Abhurahama nzwalani wangu.

Ndowothama njizi pezhugwi kwe shongwe dzipa lubala, ne misenya ye vula mu mikuku. Ndowothama dziba le vula mu tjilambanyika ne mu shango yakawoma kowobe ne misenya ye vula.

Bashayi ne banosheta ha beshaka vula, koga vula kusina, ngono bawoma nge nyota, imi Yahwe ndowobadabila. Imi Ndzimu we Iziraela andingabalashe.

Ndiani kene wakakuthama ikoku? Ndiani wakasika njudzi kudwa mu kutangisa? Imi Yahwe ndimi ndakabe ndilipo mu kutangisa, ne ku bupelo ndowobe we bupelo.

Mu tjilambanyika ndowomedza misida ne miwunga ne miritile ne mitoba, mu tjilambanyika ndowomedza misipuri, ne mitjetjeni ne miti ye payini, kuti bathu babone bazibe, bakumbule bahwisise, kuti luboko gwa Yahwe gwakakuthama ikoku, kuti Wakayengemala we Iziraela wakakubumba.