Popular Bible Verses from Bafilipi 2

Share

Mu si ke mwa eza sika sifi kapa sifi ka ku ipahamisa, kamba ka takazo ya ku itumba ko ku si na tuso. Mu ikokobeze yo muñwi ku yo muñwi, mi mu si ke mwa hupula kuli mu fita ba bañwi. Mu tokomele za ba bañwi, isiñi za mina feela.

Mu be ni maikuto a n'a li ku Jesu Kreste.

Yena ya n'a li Mulimu luli ku zwa kwa makalelo, h'a si ka hupula kuli n'a ka hanelela ku likana ni Mulimu ka ku eza ka tata. Mane, ka ku lata kwa hae, a tuhela z'a n'a na ni zona kaufela, mi a nga sibupeho sa mutanga ka ku swana ni mutu, mi a bonahala ku swana ni batu ka mukwa kaufela. A lumela ku ikokobeza ni ku fita, mi a mamela tato ya Mulimu ku fitela lifu la hae la fa sifapahano.

Mulimu ya inzi ku mina nako kaufela, u sebeza mwa lipilu za mina, a nz'a mi susueza kuli mu tabele mi mu eze se si latwa ki yena.

Kabakaleo, Mulimu a mu pahamiseza mwa sibaka se si pahami hahulu, mi a mu fa libizo leo le li fita mabizo a mañwi kamukana. Mi cwale, ka likute le li lukela Libizo la Jesu, libupiwa ze mwahalimu kaufela, ni mwa lifasi, ni mwatas'a mubu, za mu kubamela. Mi kaufela li bulele patalaza kuli Jesu Kreste ki Mulena, ili ku lumba bulena bwa Mulimu.

Mu eze lika kaufela mu sa bilaeli, mi mu sa tongoki. Kacwalo mu ka ba ba ba sa nyazahali ni ba ba kenile, bana ba Mulimu ba ba kondile, mwahal'a batu ba ba si ka luka ni ba ba maswe ba lifasi le. Mu swanezi ku benya, mwahal'a bona, sina linaleli ha li monyeha mwa mbuyumbuyulu.

Cwalehe, balikani ba ka, sina mo ne mu ni utwelanga kamita ha ne ni sa inzi ni mina, ku tokwahala hahulu ni ku fita kuli mu ni utwe niha ni li kwahule ni mina. Ka sabo ni ka ku ngangama, mu eze misebezi ye bonisa kuli mu pulusizwe.