Popular Bible Verses from 1 Huan 4

Share

Kaminda tin amor, no tin miedu, al kontrario, amor realmente perfekshoná ta kore ku miedu. Miedu tin di aber ku kastigu, p'esei amor di un hende ku ainda tin miedu no a yega na perfekshon.

Mi yunan, boso ta pertenesé na Dios i boso a vense e profetanan falsu, pasobra Esun ku ta den boso ta mas poderoso ku esun ku ta den mundu.

Nos ta stima, pasobra Dios a stima nos promé!

Keridonan, laga nos stima otro, pasobra amor ta bini di Dios. Tur ku ta stima a nase di Dios i konosé Dios.

Esun ku no ta stima, no konosé Dios, pasobra Dios ta amor.

T'esaki ta amor: no ta nos a stima Dios promé, sino t'É a stima nos i a manda su Yu pa E bira e sakrifisio pa pordon di nos pikánan.

Keridonan, si t'asina Dios a stima nos, nos tambe mester stima otro!

Na esaki nos ta mira Dios su amor pa nos: El a manda su úniko Yu na mundu, pa asina nos biba pa medio di djE.

Si un hende bisa: ‘Mi ta stima Dios’, pero e no ta stima su ruman, e ta un gañadó! Pues si un hende no por stima su ruman, ku e ta mira, e no por stima Dios, ku e no ta mira, tampoko.

Esun ku rekonosé i proklamá ku Hesus ta Yu di Dios, Dios ta keda den dje i e ta keda den Dios.

Esun ku ta stima Dios mester stima su ruman tambe; esei ta e mandamentu ku nos a haña di djE.

Keridonan, no kere tur hende ku pretendé ku nan tin Spiritu di Dios, sino mira si e spiritu ku nan tin ta pertenesé na Dios. Pasobra ta hopi profeta falsu a sali bai den mundu. Ta na lo siguiente boso por mira si hende tin Spiritu di Dios òf nò: si e rekonosé ku Hesus ta e Kristu ku a bini na mundu komo ser humano. E hende akí tin e Spiritu ku ta pertenesé na Dios.

Ma esun ku no rekonosé i proklamá ken Hesus ta, no ta pertenesé na Dios. Ta e spiritu di e antikristu ta manifestá su mes den e persona ei. Boso a tende kaba ku e spiritu di e antikristu mester bini; wèl, e ta na mundu kaba!