Popular Bible Verses from Filípunu 4

Share

Ado ma hu mi dó nǔ ɖěbǔ wú ó; lo ɔ́, mi ɖo ninɔmɛ ɖěbǔ mɛ hǔn, mi ní nɔ sɔ́ kúdónúmɛ sín ayixa dó xo ɖɛ, bó byɔ́ nǔ e hudó mi lɛ́ɛ Mawu.

Énɛ́ ɔ́, fífá Mawu tɔn e hú gǎn nukúnnú-mɔjɛnǔmɛ gbɛtɔ́ tɔn bǐ ɔ́ ná bló ayixa mitɔn kpódó linlin mitɔn lɛ́ɛ kpó ɖó, bɔ mi ná sixú nɔ bǔ ɖo Klísu Jezu mɛ.

Nɔví ce lɛ́ɛ mi, bó ná dó fó xó ce ɔ́, un ɖo byɔ̌byɔ́ mi wɛ ɖɔ ayixa mitɔn ní nɔ nǔ e nyɔ́, bɔ susu jɛ xá lɛ́ɛ jí: nǔ e nyí nǔgbó ɔ́ bǐ, nǔ e è nǎ ɖó sísí ná é, nǔ e sɔgbe é, nǔ e mɛ́ é, nǔ e nɔ nyɔ́ mɛ nukún mɛ é kpódó nǔ e wlí yɛ̌yi ɔ́ kpán; ayixa mitɔn ní nɔ nǔ énɛ́ lɛ́ɛ jí.

Mɛ e nɔ ná hlɔ̌nhlɔ́n mì ɔ́ wɛ nɔ zɔ́n, bɔ un nɔ sixú kpé nǔ énɛ́ lɛ́ɛ bǐ wú.

Mi jɛ awǎ hwebǐnu, ɖó mi ɖo bǔ ɖo Aklúnɔ mɛ; un ɖo vǐvɔ́ ɖɔ wɛ ɖɔ mi ní jɛ awǎ.

Mawu ce ɔ́, dɔkun ɖo así tɔn bó túnflá; é ná ná nǔ e hudó mi lɛ́ɛ bǐ mi ɖo susu tɔn mɛ, gbɔn Klísu Jezu jí.

Nǔ e un kplɔ́n mi lɛ́ɛ, nǔ e mi yí ɖo gɔ̌n ce lɛ́ɛ, nǔ e mi se ɖo nu ce lɛ́ɛ, kpódó nǔ e un wa, bɔ mi mɔ lɛ́ɛ kpó ɔ́, mi zé dó wa azɔ̌ ná; énɛ́ ɔ́, Mawu e nɔ ná fífá mǐ ɔ́ ná nɔ kpɔ́ xá mi.

Mi fá xomɛ dó mɛ bǐ wú. Aklúnɔ ná wá zaanɖé din.

Un nyɔ́ wamamɔnɔgbɛ zán, bó nyɔ́ dɔkunnɔgbɛ zán. Un kplɔ́n nyɛɖée, bɔ ɖo fí ɖěbǔ e un ná ɖe ɔ́, kpódó ninɔmɛ ɖěbǔ e mɛ un ná ɖe ɔ́ kpán nɔ́ nyɔ́ nú mì; un gɔ́ xo ganjí oo, un ɖo xovɛ́ oo, ényí nǔ kpé mì kpo abǐ é hwedó mì oo, é nɔ nyɔ́ nú mì.

É ka nyí nǔɖé wɛ hudó mì wɛ zɔ́n bɔ un ɖo mɔ̌ ɖɔ wɛ ǎ, ɖó un ko kplɔ́n nyɛɖée, bɔ nǔ e un ɖó ɔ́ nɔ kpé mì.