Popular Bible Verses from Ephesus 4

Share

Ełets'ǫ̀ naxıdzeè eteèɂı̨ welè, Zezì-Krı wet'ǫ̀ǫ̀ Nǫ̀htsı̨ naxıghǫ nahoı̨la k'ę̀ę̀ ełeghǫ nahoahłe.

Hotıì k'èeweèt'ı̨ k'ę̀ę̀ aahda, dǫ ts'ǫ̀ naxıdzeè nezı̨ welè, eyıts'ǫ ełeghǫnıahtǫ xè ełexè ts'èwhı̨į̀ aahda.

Yatıjıı t'à goahde-le, hanìkò yatı wet'à dǫ gınì nàtsoò ade ha sìı t'à goahde, hanì-ı̨dè dǫ egeèhkw'ǫǫ sìı wet'à nezı̨į̀ edexègeedì xè gıt'àhoehwhı ha.

T'asìı hazǫǫ̀ t'à ełek'èch'a aaht'ee sìı wedę aahłe. Ełets'ǫ̀ naxınì nàìtłoo, ełets'ǫ̀ ààhch'ee, ełetawhıahdèe, ełek'adaahdèe, eyıts'ǫ hołı̨ı̨ hazǫǫ̀ k'ę̀ę̀ k'ehoahɂaa sìı wedę aahłe.

“Ààhch'e nı̨dè hołı̨ı̨ hoahtsı̨-le,” dek'eèhtł'è. Sa nàɂàa ts'ǫ̀ ààhch'e-le, hanì-ı̨dè wehłı̨ı̨ naxıdaèht'è ha nıìle.

Įnę̀ę dànì naxınìłı̨ı̨ k'ę̀ę̀ aahda ı̨lèe sìı wek'ę̀ę̀ aahda-le gha hoghànaxeètǫ ı̨lè. Hołı̨ı̨ gha hòtł'ò kànıahɂaa sìı wet'à naxınì wedıhołè hǫt'e. Hanìkò naxınì ładı̨į̀ ajàa k'ę̀ę̀ aahda ha hoghànaxeètǫ ı̨lè, eyıts'ǫ dǫgòò lanì aahda ha hoghànaxeètǫ ı̨lè. Nǫ̀htsı̨ k'ę̀ę̀ hotıì ehkw'ı aahda xè degaı aaht'e ha naxıhòèlı̨ hǫt'e.

Yedàyeh Nezı̨ı̨ wedahxà dǫ ı̨łè laaht'e gha hòtł'ò eghàlaahda, eyıts'ǫ t'aats'ǫǫ̀ ełexè ts'èwhı̨į̀ aahda.

Ededı̨ sìı dǫ mǫ̀hdaa wecheekeèdeè gı̨ı̨lı̨ ha goghàhòı̨ɂǫ hǫt'e, mǫ̀hdaa nakwenàoɂǫǫ gı̨ı̨lı̨ ha, mǫ̀hdaa godı nezı̨ı̨ k'egeɂaa gı̨ı̨lı̨ ha, mǫ̀hdaa Nǫ̀htsı̨ wets'ǫ dǫ k'ègedìı gı̨ı̨lı̨ ha, eyıts'ǫ mǫ̀hdaa dǫ hoghàgogeehtǫǫ gı̨ı̨lı̨ ha agǫ̀ǫ̀là. Hanì-ı̨dè Nǫ̀htsı̨ wets'ǫ dǫ dànì Nǫ̀htsı̨ gha eghàlageeda ha sìı gık'èezǫǫ̀ agede ha, eyıts'ǫ hazǫǫ̀ ełexè Nǫ̀htsı̨ gha goınì ı̨łè zǫ lats'ede gots'ǫ̀, eyıts'ǫ Nǫ̀htsı̨ weza deghàà wek'èts'eezǫ ats'ede gots'ǫ̀, Nǫ̀htsı̨ wets'ǫ dǫ hazǫǫ̀ ełexè nàgetsoò agede ha. Hanì-ı̨dè dànì Zezì-Krı wexè hòɂǫǫ sìı wexèht'eè goxè hòɂǫ ats'ede ha.

Hanì-ı̨dè k'achı̨ bebìa lats'ı̨ı̨t'e ha-le, taatı̨į̀ t'à goxè k'etaetı̨ lanì ha-le. Dǫ goghǫyageeɂà t'à gogı̨ı̨zǫǫ sìı ładı̨į̀ hoghàgogeehtǫ nı̨dè goxè ts'ıɂǫ̀-hogeeɂà ha-le. Hanìkò ełeghǫnets'eètǫ t'à ehkw'ı ełets'ǫ̀ gots'ede ha. Goxı̨ Nǫ̀htsı̨ wets'ǫ dǫ ats'ı̨ı̨t'ee sìı Zezì wezhį̀į̀ lats'ı̨ı̨t'e, eyıts'ǫ Zezì ededı̨ gokwì elı̨ lanì hǫt'e. T'asìı hazǫǫ̀ t'à Zezì-Krı wexè nàts'etsoò ats'ede ha hǫt'e.